ឧត្តមសេនីយ៍ត្រី ម៉េង ស្រ៊ុន ចាត់តំណាងជួយសម្របសម្រួលសង្គ្រោះជីវិតគ្រួសារលោក គួង ឡុងឌី ដែលមានជំងឺមហារីកគ្រាប់ឈាមធ្ងន់ធ្ងរ ត្រូវការឈាមសង្រ្គោះជីវិត
25-06-2026 10:12
(ភ្នំពេញ)៖ ក្នុងស្មារតីមនុស្សធម៌ ជួយគ្នាក្នុងគ្រាលំបាក លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ តែងតែបរិច្ចាគនូវថវិកាផ្ទាល់ខ្លួន ក្នុងការចូលរួមយ៉ាងសកម្មចំពោះការងារមនុស្សធម៍ ដើម្បីជួយសង្រ្គោះបងប្អូនប្រជាពលរដ្ឋ ដែលមានជីវភាពទីទាល់ក្រ ជួបការលំបាកខ្វះខាតក្នុងជីវភាពរស់នៅ និងមានបញ្ហាផ្សេងៗ ក្នុងភូមិសាស្ត្រខេត្តកំពង់ស្ពឺ ជាពិសេសលោកតែងតែគិតគួរនិងយកចិត្តទុកដាក់បំផុតដល់នាយទាហាន នាយទាហានរង កងរាជអាវុធហត្ថគ្រប់រូប ដែលមានបញ្ហាសុខភាពដូចជាឈឺថ្កាត់ និងជួបបញ្ហាផ្សេងៗ លោកតែងតែចុះសួរសុខទុក្ខដោយផ្ទាល់ដើម្បីឲ្យយល់ច្បាស់ពីស្ថានភាពជាក់ស្តែង ដោយបានឧបត្ថម្ភជាថវិការ ព្រមទាំងបានផ្តល់នូវសម្ភារៈគ្រឿងឧបភោគបរិភោគផ្សេងៗផងដែរ។
ជាក់ស្ដែងនាពេលនេះ បន្ទាប់ពីទទួលបានព័ត៍មានពីក្រុមការងារនូវស្ថានភាពប្រជាពលរដ្ឋមួយគ្រួសារ កំពុងជួបការលំបាកមានជំងឺមហារីកគ្រាប់ឈាមធ្ងន់ធ្ងរ ត្រូវការឈាមជាបន្ទាន់ មានអ្នកជំងឺមានឈ្មោះ ឃួន សារី ភេទស្រី អាយុ ២៤ឆ្នាំ និងប្តីឈ្មោះ គួង ឡុងឌី អាយុ ២៣ឆ្នាំ បច្ចុប្បន្នស្នាក់នៅបន្ទប់ជួលស្ថិតក្នុងភូមិព្រៃស្លា សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតភូមិធ្នុង ឃុំស្វាយធំ ស្រុកស្វាយជ្រុំ ខេត្តស្វាយរៀង និងជាអកុសលប្អូនស្រី ឃួន សារី មានជំងឺរលាកលំពែងធ្ងន់ធ្ងរ មានជាតិពុលលើសកម្រិត មហារីកគ្រាប់ឈាម ត្រូវការឈាមសង្រ្គោះជីវិតជារៀងរហូត ហើយពេលនេះកំពុងសម្រាក់ព្យាបាលជំងឺថែទាំសុខភាព នៅអគារសង្រ្គោះបន្ទាន់កណ្តាលនៃមន្ទីពេទ្យកាល់ម៉ែត រាជធានីភ្នំពេញ។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការ ដោយក្តីអាណិតអាសូរពន់ពេក ក្នុងស្នារតីមនុស្សធម៏ ទឹកចិត្តខ្មែរស្រលាញ់ខ្មែរ ខ្មែរជួយខ្មែរ បានចាត់ឲ្យលោកអនុសេនីយ៍ឯក ស្រេង លីហួរ ជាបន្ទាន់ឲ្យធ្វើការទំនាក់ទំនងទៅកាន់គ្រួសារលោក គួង ឡុងឌី ដែលកំពុងតែត្រូវការឈាមជាបន្ទាន់ ដោយសម្របសម្រួលជាមួយមជ្ឈមណ្ឌលជាតិផ្តល់ឈាម ដោយទទួលបានឈាមចំនួនបីសក្តិ ក្នុងការបញ្ចូលឈាមដល់ប្អូនស្រី ឃួន សារី ដើម្បីជួយសង្គ្រោះដល់អាយុជីវិត។
សូមបញ្ជាក់ផងដែរថា ដោយសារតែជំងឺមានសភាពធ្ងន់ធ្ងរ និងត្រូវការឈាមសង្រ្គោះជីវិតជារៀងរហូត ដើម្បីសង្គ្រោះអាយុជីវិតប្អូនស្រី ឃួន សារី ដូច្នេះលោកឧត្តមសេនីយ៍ត្រី ម៉េង ស្រ៊ុន បានចាត់ឲ្យក្រុមការងារ សម្របសម្រួលជាមួយមជ្ឈមណ្ឌលជាតិផ្តល់ឈាម បន្តផ្តល់ឱ្យបន្ថែមទៀតទៅតាមតម្រូវការចំបាច់ ក្នុងការលាងឈាមដើម្បីបន្តជីវិត៕
