(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ និងដេប៉ាតឺម៉ង់ វិស្វកម្មសំណង់ស៊ីវិល នៃសាកលវិទ្យាល័យន័រតុន នៅថ្ងៃទី២៥ ខែមិថុនា ឆ្នាំ២០២៦នេះ បានបើកសិក្ខាសាលាបណ្តុះបណ្តាល ស្តីពី «បញ្ហាប្រឈមសំណង់គ្រឹះ និងមេកានិចដីនៅកម្ពុជា»។

សិក្ខាសាលានេះ មានការចូលរួមចម្រុះពីស្ថាប័នអប់រំ និងបណ្តាក្រុមហ៊ុនឯកជន អ្នកម៉ៅការ សំណង់ចំនួន៣៨ស្ថាប័ន និងមានសិក្ខាកាមសរុបទាំងអស់ ចូលរួមប្រមាណ ៣០០នាក់ ដែលរៀបចំធ្វើឡើង នាទីស្តីការ ក្រសួងរៀបចំដែនដី នគរូបនីយកម្ម និងសំណង់។

លោកបណ្ឌិត លឹម សុខតៃ តំណាងសាស្ដ្រាចារ្យ ចាន់ សុខឃាង សាកលវិទ្យាធិការ នៃសាកលវិទ្យាល័យន័រតុន បានឲ្យដឹងថា សិក្ខាសាលានេះ ផ្តល់នូវភាពសមស្របសម្រាប់ ការផ្លាស់ប្តូរចំណេះដឹង ការចែករំលែកបទពិសោធន៍ជាក់ស្តែង ការពិភាក្សាអំពីមេរៀនដែលបានរៀន ពីគម្រោងពិតជាក់ស្តែង។

ជាមួយគ្នានេះ លោកបណ្ឌិត លឹម សុខតៃ ក៏បានលើកទឹកចិត្ត ដល់អ្នកចូលរួមគ្រប់រូប ឱ្យចូលរួមយ៉ាងសកម្មជាមួយនឹងបទបង្ហាញ កត់ចំណាំ សួរសំណួរ និងប្រើប្រាស់ឱកាសនេះ ដើម្បីរៀនពីអ្នកជំនាញដែលមានបទពិសោធន៍ច្រើនឆ្នាំ ក្នុងវិស័យនេះ។

ការពិភាក្សាជាក្រុម នឹងផ្តល់ឱកាសដើម្បីស្វែងយល់ពីបញ្ហា ប្រឈមជាក់ស្តែងដែលឧស្សាហកម្មសំណង់ប្រឈមមុខ ពិភាក្សាអំពីបច្ចេកវិទ្យា និងវិធីសាស្ត្រច្នៃប្រឌិត ពិនិត្យមើល និន្នាការនាពេលអនាគត និងពិចារណាយុទ្ធសាស្ត្រសម្រាប់ការកែលម្អការអនុវត្តវិស្វកម្មនៅកម្ពុជា។ នេះជាការបញ្ជាក់បន្ថែម របស់លោកបណ្ឌិត លឹម សុខតៃ។

លោកបណ្ឌិត លឹម សុខតៃ បានលើកឡើងថា ការពិភាក្សាបែបនេះ គឺមានសារៈសំខាន់ណាស់ ពីព្រោះវិស្វកម្មមិនមែន គ្រាន់តែជាការស្វែងរកចម្លើយនោះទេ វាក៏និយាយអំពីការសួរសំណួរត្រឹមត្រូវ ឡើងជាបន្តបន្ទាប់ផងដែរ និងការស្វែងរកដំណោះស្រាយកាន់តែប្រសើរ។

សូមជម្រាបថា គោលបំណងសំខាន់ នៃសិក្ខាសាលានេះ ធ្វើឡើងដើម្បីចែករំលែកបទពិសោធន៍ និងជំរុញលើកកម្ពស់វិស័យវិស្វកម្មសំណង់ស៊ីវិល លើបញ្ហាប្រឈមសំណង់គ្រឹះ និងមេកានិចដី នៅក្នុងប្រទេសកម្ពុជា ឱ្យមានលក្ខណៈស៊ីជម្រៅ និងទូលំទូលាយ ដែលជាប្រយោជន៍ប្រើប្រាស់ ដល់អ្នកសិក្សាស្រាវជ្រាវ និងនិស្សិត។

សិក្ខាសាលានេះ ក៏ជំរុញការយល់ដឹងពីគ្នាទៅវិញទៅមក ការអភិវឌ្ឍសម្រាប់ការបណ្តុះបណ្តាល និងជួយពង្រឹងដល់សមត្ថភាពវិជ្ជាជីវៈ ប្រកបដោយគុណភាព ឲ្យសមស្របតាមការអភិវឌ្ឍសង្គម នាពេលបច្ចុប្បន្ន និងអនាគត៕