(តាកែវ)៖ លោក វ៉ី សំណាង អភិបាលខេត្តតាកែវ បានស្វាគមន៍ចំពោះក្រុមហ៊ុនកូរ៉េ ដែលមានបំណងចុះមកសិក្សាដើម្បីធ្វើការវិនិយោគទៅលើការផ្គត់ផ្គង់ទឹកស្អាត និងធ្វើអាងប្រព្រឹត្តកម្មទឹកកខ្វក់នៅក្នុងខេត្តតាកែវ។

ថ្លែងនៅក្នុងជំនួបជាមួយតំណាងក្រុមហ៊ុន Inya Water របស់កូរ៉េខាងត្បូង នៅសាលាខេត្តតាកែវ នាព្រឹកថ្ងៃទី២៥​ ខែមិថុនា ឆ្នាំ២០២៦ លោក វ៉ី សំណាង បានលើកឡើងថា បច្ចុប្បន្ននេះប្រជាពលរដ្ឋខេត្តតាកែវ មានទឹកស្អាតប្រើប្រាស់ប្រមាណ ៤៥ភាគរយ ហើយ ៥៥ភាគរយទៀត ប្រើប្រាស់ទឹកត្រពាំង ស្រះ ឬទឹកភ្លៀង តាមរយៈសិប្បករផ្គត់ផ្គង់ទឹកនៅមូលដ្ឋាន។ ដោយឡែកអាងប្រព្រឹត្តកម្មទឹកកខ្វក់ខេត្តមិនទាន់មានទេ ក៏ប៉ុន្តែខេត្តមានគម្រោងនឹងធ្វើនៅពេលខាងមុខឆាប់ៗនេះ។

អភិបាលខេត្តតាកែវ បានបន្ថែមថា ដោយសារអាត្រាប្រជាពលរដ្ឋខេត្តតាកែវ មានការកើនឡើង ជាពិសេសកំណើនរោងចក្រសហគ្រាសនៅក្នុងខេត្តតាកែវ កាន់តែច្រើន តម្រូវឱ្យការប្រើប្រាស់ទឹកស្អាត និងអាងប្រព្រឹត្តកម្មទឹកកខ្វក់ ដើម្បីបញ្ចេញកាកសំណល់ពីរោងចក្រ សហគ្រាស ដូច្នោះក្រុមហ៊ុនអាចធ្វើការសិក្សាគម្រោងវិនិយោគនេះនៅស្រុកចំនួន២ ដែលមានរោងចក្រសហគ្រាសច្រើន គឺនៅស្រុកបាទី និងស្រុកសំរោង។

នៅក្នុងឱកាសនោះ អភិបាលខេត្តតាកែវ ក៏បានស្នើឱ្យក្រុមហ៊ុនកុំសិក្សាយូរពេកប្រៀបដូចជាការអាំងដំរី ព្រោះកន្លងមកកាសិក្សាពីគម្រោងអភិវឌ្ឍន៍របស់ក្រុមហ៊ុន និងអង្គការខ្លះចំណាយពេលយូរឆ្នាំដែលធ្វើឱ្យកន្លែង អភិវឌ្ឍន៍ត្រូវបានប្រជាពលរដ្ឋរស់នៅពាសពេញ។

នៅក្នុងឱកាសនោះ តំណាងក្រុមហ៊ុន Inya Water បានលើកឡើងថា ក្រុមហ៊ុននឹងធ្វើការសិក្សាពីគម្រោងវិនិយោគផ្គត់ផ្គង់ទឹកស្អាត និងការកសាងអាងប្រព្រឹត្តកម្មទឹកកខ្វក់ឱ្យបានឆាប់បំផុតពោល គឺប្រហែល៦ខែហើយខាង ក្រុមហ៊ុនក៏បានស្នើឱ្យអាជ្ញាធខេត្តជួយសម្របសម្រួលពីការចុះមកសិក្សាគម្រោងវិនិយោគផងដែរ៕