អធិការរងនគរបាលខណ្ឌជ្រោយចង្វារម្នាក់ ចូលបំភ្លឺនៅស្នងការដ្ឋាននគរបាលខេត្តកណ្តាល ក្រោយរងការចោទថា បង្ខំឲ្យយុវជនជាមន្ត្រីជាប់កិច្ចសន្យាចរាចរណ៍លោតទឹកសម្លាប់ខ្លួន
25-06-2026 15:26
(កណ្ដាល)៖ លោក សម រីណា អធិការរងនគរបាលខណ្ឌជ្រោយចង្វារ រាជធានីភ្នំពេញ បានចូលខ្លួនមកបំភ្លឺនៅស្នងការដ្ឋាននគរបាលខេត្តកណ្ដាលនៅថ្ងៃទី២៤ ខែមិថុនា ឆ្នាំ២០២៦ ក្រោយរងការចោទថា បានបង្ខំឲ្យមន្ត្រីជាប់កិច្ចសន្យាចរាចរណ៍ម្នាក់ ដែលលោតទឹកសម្លាប់ខ្លួនពីលើសាឡាង។
ការលោតទឹកសម្លាប់ខ្លួននេះ បានកើតឡើងនៅពេលដែលរូបគេ ត្រូវបានលោក សម រីណា និងកូនចៅ បានទៅឃាត់ដោយចោទថា ជនរងគ្រោះបានលួចគាស់បន្ទប់ជួលភរិយារបស់ខ្លួន ដែលធ្វើឲ្យជនរងគ្រោះភ័យខ្លាចជាប់ទោស ក៏សម្រេចចិត្តលោទទឹកតែម្តង។
យុវជនដែលស្លាប់នេះមានឈ្មោះ ចាន់ ណារ៉ុង អាយុ១៩ឆ្នាំ ជាមន្ត្រីជាប់កិច្ចសន្យានគរបាលចរាចរណ៍។ ហេតុការណ៍នាំឲ្យមានភ្ញាក់ផ្អើលនេះ បានកើតឡើងកាលពីវេលាម៉ោងប្រមាណ ៧៖១០នាទីយប់ ថ្ងៃទី១៧ ខែមិថុនា ឆ្នាំស២០២៦ នៅតាមដងទន្លេមេគង្គ ក្នុងភូមិស្វាយជ្រុំ សង្កាត់ស្វាយជ្រុំ ក្រុងអរិយក្សត្រ ហើយសពត្រូវបានរកឃើញនៅម្តុំកោះនរា ខណ្ឌច្បារអំពៅ រាជធានីភ្នំពេញ។
តាមសេចក្តីរាយការណ៍ដែលភ្នាក់ងារព័ត៌មាន Fresh News ទទួលបាន, ពេលចុះទៅឃាត់មនុស្សក្នុងសម្លៀកបំពាក់ស៊ីវិល និងមិនស្ថិតក្នុងដែលសមត្ថកិច្ចរបស់ខ្លួន, លោកវរសេនីយ៍ទោ សម រីណា ពុំបានសហការ ឬផ្តល់ដំណឹងដល់សមត្ថកិច្ចមូលដ្ឋាននោះទេ។ លុះថ្ងៃទី១៩ ខែមិថុនា ឆ្នាំ២០២៦ ក្រោយបាត់ខ្លួនកូនប្រុសរកមិនឃើញ ទើបម្តាយជនរងគ្រោះឈ្មោះ យិន ម៉ាលីស មកដាក់ពាក្យបណ្តឹងនៅអធិការដ្ឋាននគរបាលក្រុងអរិយក្សត្រ ខេត្តកណ្តាល។
បើតាមតាមរបាយការណ៍របស់សមត្ថកិច្ច, កាលពីរសៀលថ្ងៃទី១៧ ខែមិថុនា កន្លងទៅ ប្រពន្ធរបស់លោក សម រីណា ជាម្ចាស់ផ្ទះជួលបានទូរស័ព្ទទៅឈ្មោះ ចាន់ សម្បត្តិ ជាបងរបស់ជនរងគ្រោះឈ្មោះ ចាន់ ណារ៉ុង មកយកលុយចាយនៅម្តុំផ្សាររាត្រី។ ពេលមកដល់ក៏ត្រូវគេចាប់រុញចូលឡាន ហើយលោក សម រីណា បានសម្លុតឱ្យប្រាប់កន្លែងជនរងគ្រោះ។ ដោយភ័យឈ្មោះ ចាន់ សម្បត្តិ ក៏បានទូរស័ព្ទទៅមិត្តស្រីរបស់ ចាន់ ណារ៉ុង ទើបដឹងថា ប្អូនប្រុសកំពុងនៅជាមួយសង្សារ ឯភូមិព្រែកតាកូវ សង្កាត់ព្រែកតាកូវ ក្រុងអរិយក្សត្រ។
ពេលទៅដល់មុខផ្ទះ, លោក សម រីណា ឈប់ឡានហើយស្រែកហៅ ចាន់ ណារ៉ុង ពេលជនរងគ្រោះចេញមក ក៏នាំគ្នាស្ទុះទៅក្របួចកអាវហើយចាប់ញាត់ចូលឡាន រួចឱ្យគ្នីគ្នាម្នាក់ជិះម៉ូតូជនរងគ្រោះចេញ និងបានប្រាប់សង្សារ ជនរងគ្រោះថា បើចង់ដឹងច្បាស់ទាក់ទងតាមលេខទូរស័ព្ទ ០៨៨ ៣០ ៦៥ ៥៥៥ រួចក៏បើកចេញបាត់ទៅ។
ពេលធ្វើដំណើរក្រុមរបស់លោក សម រីណា បានវាយសួររឿងលួចគាស់បន្ទប់ជួលលួចទ្រព្យសម្បត្តិរហូតជនរងគ្រោះ ចាន់ ណារ៉ុង ទទួលស្គាល់ ហើយពេលសាឡាងកំពុងធ្វើដំណើរជិតដល់ពាក់កណ្តាលទន្លេ ជនរងគ្រោះក៏សុំបត់ ជើងតូច និងបានលោតចូលក្នុងទន្លេតែម្តងទៅ។
បន្ទាប់ពីជនរងគ្រោះលោតទឹកទន្លេបាត់ខ្លួនមក, លោកស្រី ស បញ្ញា ហៅដេត ប្រពន្ធលោក សម រីណា បានទូរស័ព្ទទៅម្តាយជនរងគ្រោះឱ្យប្រញ៉ាប់ឡើងមកភ្នំពេញ ដោះស្រាយសងសំណងចំនួន ៣,០០០ដុល្លារ រឿង ចាន់ ណារ៉ុង លួចគាស់បន្ទប់ជួល ហើយពេលទៅដល់ម្តុំអូតែលសុខា, អ្នកស្រីក៏សុំម៉ូតូដែលក្រុមលោក សម រីណា ដកហូតដើម្បីជិះស្វែងរកកូន ប៉ុន្តែលោកស្រី ស បញ្ញា មិនឱ្យនោះទេ និងបានដេញ២នាក់ ម្តាយកូនចេញពីផ្ទះទៀតផង។
របាយការណ៍ដដែលបានបន្តថា ដោយតាមរកកូនប្រុសមិនឃើញ ព្រឹកថ្ងៃទី១៩ ខែមិថុនា ឆ្នាំ២០២៦ អ្នកស្រីក៏បានដាក់ពាក្យបណ្តឹងនៅអធិការដ្ឋាននគរបាលក្រុងអរិយក្សត្រ និងបានតាមរកសពកូនឃើញអណ្តែតលើ ទន្លេមេគង្គម្តុំកោះនរា ខណ្ឌច្បារអំពៅ រាជធានីភ្នំពេញ នៅរសៀលថ្ងៃខែឆ្នាំ ដដែល នាំយកទៅធ្វើបុណ្យតាមប្រពៃណីនៅឯស្រុកកំណើត និងស្នើសុំឱ្យសមត្ថកិច្ចជួយផ្តល់យុត្តិធម៌ដល់ក្រុមគ្រួសាររបស់គាត់ផង៕
