(បាត់ដំបង)៖ លោក អ៊ុក ឃ្នួច អគ្គលេខាធិការរងតំណាង នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្រ្តីអនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា និងលោក សុខ លូ អភិបាលខេត្ត និងជាប្រធានគណៈកម្មាធិការសមាគមអតីតយុទ្ធជន និងនិវត្តជន (អ.ន.ក) ខេត្តបាត់ដំបង បានអញ្ជើញបើកវគ្គបណ្ដុះបណ្ដាលស្ដីពី ការងាររដ្ឋបាល និងការងារបេឡាមរណសង្រ្គោះសមាគមអតីតយុទ្ធជន និងនិវត្តជនជូនថ្នាក់ដឹកនាំក្រុមការងារនៃគណៈកម្មាធិការ អ.ន.ក ខេត្ត ក្រុង ស្រុក និងសាខាឃុំ សង្កាត់ ខេត្តបាត់ដំបង និងខេត្តប៉ៃលិន។

វគ្គបណ្ដុះបណ្ដាលនេះបានធ្វើឡើងនាថ្ងៃទី២៥ ខែមិថុនា ឆ្នាំ២០២៦ នៅសាលប្រជុំសាលាខេត្តបាត់ដំបង។

លោក សុខ លូ បានបញ្ជាក់ថា គិតត្រឹមខែឧសភា ឆ្នាំ២០២៦ អតីតយុទ្ធជន និងនិវត្តជនក្នុងខេត្តបាត់ដំបងមានចំនួន ១៨,១១៧នាក់ បានចូលជាសមាជិក អ.ន.ក. ខេត្ត ចំនួន ១១,៨២៥នាក់ ក្នុងនោះមាន៖ ជនពិការ ៥,៦១៤នាក់, និវត្តជន ៤,១៨៩នាក់,គ្រួសារជនពលី១,៦៧៤នាក់ គ្រួសារជនមរណៈ ២២៦នាក់, ជនបាត់បង់សមត្ថភាពការងារ១២២នាក់។

លោកអភិបាលខេត្តបានបន្តថា វគ្គបណ្តុះបណ្តាលនេះធ្វើឡើងដើម្បីពង្រឹងសមត្ថភាពការងាររដ្ឋបាល ការទទួលខុសត្រូវ និងការគ្រប់ គ្រងទិន្នន័យឱ្យបានច្បាស់លាស់ ឆ្លើយតបទៅនឹងលក្ខន្តិកៈ និងបទបញ្ជាផ្ទៃក្នុងរបស់សមាគម។ ភាពចាំបាច់នៃបេឡាមរណៈសង្គ្រោះ គឺជាការងារដោះស្រាយផលប្រយោជន៍ និងការសម្រាលទុក្ខលំបាករបស់គ្រួសារសមាជិក អ.ន.ក. ពេលទទួលមរណភាព។ ដូច្នេះ ទាមទារឱ្យមានតម្លាភាព ភាពត្រឹមត្រូវ និងទាន់ពេលវេលាដោយមិនត្រូវទុកឱ្យឯកសារគាំង ឬយឺតយ៉ាវឡើយ។

លោកបានសង្កត់ធ្ងន់ថា ការធ្វើបច្ចុប្បន្នភាពទិន្នន័យត្រូវក្តាប់ឱ្យបានច្បាស់លាស់នូវចំនួនសមាជិក អ.ន.ក.ជាក់ស្តែងក្នុងមូលដ្ឋាន ទាំងអ្នកកំពុងរស់នៅ អ្នកផ្លាស់ប្តូរទីលំនៅ និងអ្នកទទួលមរណភាពដើម្បីងាយស្រួលក្នុងការគ្រប់គ្រង និងផ្ដល់ការឧបត្ថម្ភ។ ការធ្វើលិខិតស្នាម ការបញ្ជូនរបាយការណ៍ពីសាខាឃុំ សង្កាត់ មកថ្នាក់ក្រុង ស្រុក និងបន្តមកថ្នាក់ខេត្ត ត្រូវធ្វើឡើងតាមទម្រង់បទដ្ឋានរដ្ឋបាលដែលបានរៀនសូត្រ និងធានាឱ្យបានលឿនរហ័ស។ ចំពោះការបញ្ចូលសមាជិកថ្មី ត្រូវសហការរៀបចំបញ្ចូល និងទទួលស្គាល់សមាជិកសកម្មថ្មីៗ ទាំងអតីតយុទ្ធជន និងនិវត្តជនឱ្យបានឆាប់រហ័ស ដើម្បីពង្រីកវិសាលភាពគាំពារ។

លោក សុខ លូ បានណែនាំដល់សិក្ខាកាមទាំងអស់ត្រូវយកចិត្តទុកដាក់ត្រងត្រាប់ស្ដាប់ការឧទ្ទេសនាមរបស់ក្រុមសម្របសម្រួលថ្នាក់ជាតិ ក្រេបជញ្ជក់ចំណេះដឹង បទពិសោធន៍ និងលើកឡើងនូវរាល់បញ្ហាប្រឈមជាក់ស្តែង ដែលធ្លាប់ជួបប្រទះក្នុងមូលដ្ឋាន ដើម្បីយកមកពិភាក្សា រកដំណោះស្រាយរួមគ្នាក្នុងវគ្គបណ្តុះបណ្តាលនេះ។ ក្រោយបញ្ចប់វគ្គបណ្តុះបណ្តាល ត្រូវយកចំណេះដឹងទាំងនេះទៅអនុវត្តជាក់ស្តែងប្រកបដោយប្រសិទ្ធភាព ភាពស្មោះត្រង់ និងការទទួលខុសត្រូវខ្ពស់បំផុត ដើម្បីជាការតបស្នងគុណបំណាច់ដ៏ធំធេងរបស់អតីតយុទ្ធជនចំពោះជាតិមាតុភូមិ។

លោក អ៊ុក ឃ្នួច បានថ្លែងអំណរគុណដល់ថ្នាក់ដឹកនាំ អ.ន.ក ខេត្តបាត់ដំបង និងខេត្តប៉ៃលិនគ្រប់លំដាប់ថ្នាក់ដែលបានខិតខំបំពេញការងារបម្រើដល់អតីតយុទ្ធជន និងនិវត្តជនបានយ៉ាងល្អប្រសើរ៕