(សៀមរាប)៖ លោក យឿន ចាន់ អនុប្រធានមន្ទីរព័ត៌មានទទួលបន្ទុករួម ខេត្តសៀមរាប បានលើកឡើងថា បច្ចុប្បន្នវិស័យព័ត៌មានជាផ្នែកមួយយ៉ាងសំខាន់ក្នុងការផ្សព្វផ្សាយចំណេះដឹង និងដើរតួជាកញ្ចក់ឆ្លុះបញ្ចាំងសង្គមក្នុងយុគសម័យឌីជីថល។ ស្របពេលបច្ចេកវិទ្យាកាន់តែជឿនលឿនព័ត៌មានក្លែងក្លាយក៏បានជះឥទ្ធិពលអាក្រក់ជាច្រើនដល់សង្គមជាតិ យ៉ាងធ្ងន់ធ្ងរក្នុងយុគសម័យឌីជីថល ដែលបំផ្លាញទំនុកចិត្តសាធារណៈ បង្កការភ័យខ្លាច និងអាចញុះញង់ឱ្យមានជម្លោះក្នុងសង្គម។

ការថ្លែងយ៉ាងដូច្នេះរបស់លោក យឿន ចាន់ បានធ្វើឡើងនៅក្នុងទស្សនាកិច្ចសិក្សា និងពង្រឹងសមត្ថភាពអ្នករាយការណ៍សហគមន៍ លើការផលិតព័ត៌មាន និងមាតិកា របស់យុវជននៃសហគមយុវជនខ្មែរ នាថ្ងៃទី២៤ ខែមិថុនា ឆ្នាំ២០២៦ នៅមន្ទីរព័ត៌មានខេត្តសៀមរាប ដើម្បីពង្រឹងសមត្ថភាពអ្នករាយការណ៍សហគមន៍ លើការយល់ដឹងអំពីវិស័យប្រព័ន្ធផ្សព្វផ្សាយ ការសរសេរអត្ថបទព័ត៌មាន និងការផលិតមាតិកាដោយគោរពតាមក្រមសីលធម៌ និងវិជ្ជាជីវៈ។

លោកបានបន្តថា ទស្សនកិច្ចរបស់ប្អូនៗនាពេលនេះ ជាឱកាសដ៏ល្អមួយសម្រាប់ការផ្លាស់ប្តូរបទពិសោធន៍ ចែករំលែកចំណេះដឹងលើការផលិតព័ត៌មាន និងមាតិកាដល់ប្អូនៗ ដើម្បីផ្តល់ការបំពាក់បំប៉នជំនាញថ្មីមួយនេះ សម្រាប់យុវជននៅក្នុងការផ្សព្វផ្សាយការងារ សមិទ្ធផលនានា ក្នុងសហគមន៍ និងមូលដ្ឋាន ដើម្បីជាឆ្លើយតបនិងលុបបំបាត់ព័ត៌មានក្លែងក្លាយក្នុងសហគមន៍ និងពង្រឹងកិច្ចសហប្រតិបត្តិការឱ្យកាន់តែប្រសើរឡើង ដែលបង្ហាញអំពីគុណតម្លៃ និងកិច្ចខំប្រឹងប្រែងពង្រឹងសក្ដានុពលយុវជនរបស់ប្រទេសកម្ពុជា។

លោកបានបន្ថែមថា នៅក្នុងសម័យបច្ចេកវិទ្យាឌីជីថលនេះ ការចែករំលែកនូវព័ត៌មានជាច្រើននៅលើបណ្តាញសង្គម កាន់តែកើនឡើងគួរឱ្យកត់សម្គាល់ ស្របពេលដែលព័ត៌មានក្លែងក្លាយក៏មានលាយឡំនៅក្នុងនោះផងដែរ។

លោក យឿន ចាន់ បញ្ជាក់ថា ដើម្បីឆ្លើយតបនឹងបញ្ហានេះ មន្ទីរព័ត៌មានខេត្តសៀមរាប ក៏នឹងត្រៀមបន្តយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ នៅតាមបណ្តាវិទ្យាល័យមួយចំនួនក្នុងខេត្តសៀមរាប ដើម្បីផ្តល់ចំណេះដឹងបន្ថែមទៅដល់សិស្សានុសិស្ស ប្រជាពលរដ្ឋ ពង្រឹងអក្ខរកម្មព័ត៌មាន បង្កើនការប្រុងប្រយ័ត្ន ការចេះពិចារណាផ្ទៀងផ្ទាត់ប្រភពព័ត៌មានផ្លូវការ និងការប្រើប្រាស់បណ្តាញសង្គមប្រកបដោយការទទួលខុសត្រូវ មុននឹងសម្រេចចិត្តចែករំលែកព័ត៌មានណាមួយ។

លោកស្រី ប្រាក់ មន្នីរ័ត្ន ប្រធានសមាគមយុវជនខ្មែរ បានបង្ហាញថា ទស្សនកិច្ចនេះ គឺដើម្បីពង្រឹងសមត្ថភាពទៅដល់អ្នករាយការណ៍សហគមន៍អំពីវិស័យប្រព័ន្ធ ផ្សព្វផ្សាយ នៅក្នុងការសរសេរ និងផលិតមាតិកា ដែលមានគោលបំណងនៅក្នុងការលើកកម្ពស់សិទ្ធិស្ត្រី និងសមភាពយេនឌ័រ តាមរយៈមាតិកាផ្សព្វផ្សាយ ព្រមទាំងបង្កើតបណ្តាញណែនាំ ដោយភ្ជាប់រវាងអ្នករាយការណ៍ សហគមន៍ជាមួយអ្នកសារព័ត៌មានអាជីព ដើម្បីផ្តល់ការគាំទ្រ និងអភិវឌ្ឍជំនាញជាក់ស្ដែង។

លោកស្រីបានបញ្ជាក់ថា តាមរយៈការចែករំលែកបទពិសោធន៍ពីមន្ទីរព័ត៌មានខេត្តសៀមរាប នឹងជួយឱ្យយុវជនទទួលបានចំណេះដឹង និងជំនាញថ្មីៗ ក្នុងការផលិតមាតិកាព័ត៌មាននៅលើបណ្ដាញសង្គម ដោយរក្សាបាននូវភាពត្រឹមត្រូវ ច្បាស់លាស់ គ្រប់ជ្រុងជ្រោយ និងមានការទទួលខុសត្រូវចំពោះសង្គម៕