បុរសកម្ពុជាជិះកង់ឆ្លងទ្វីបចម្ងាយជិត ៦ម៉ឺនគីឡូម៉ែត្រ ទីវ តារារិទ្ធិ ស្នើយុវជនប្រើចំណេះ និងទេពកោសល្យជួយសង្គម ចៀសជាងទៅធ្វើអ្វីដែលសង្គមស្អប់ខ្ពើម (Video inside)
25-06-2026 16:19
(ភ្នំពេញ)៖ លោក ទីវ តារារិទ្ធិ អ្នកជិះកង់ដើម្បីកុមារកម្ពុជា បានអំពាវនាវដល់យុវជនកម្ពុជាទាំងអស់ សូមយកភាពវៃឆ្លាត សមត្ថភាព ទេពកោសល្យ និងចំណេះដឹងដែលខ្លួនមានធ្វើអ្វីដែលមានប្រយោជន៍ជួយដល់សង្គមជាតិ ចៀសជាងយកចំណុចទាំងនេះ ទៅធ្វើអ្វីដែលលេងសើចជ្រុលហួសហេតុពេក ឬធ្វើអ្វីដែលមិនមានប្រយោជន៍។
ការស្នើបែបនេះរបស់យុវជន ទីវ តារារិទ្ធិ បានធ្វើឡើងបន្ទាប់ពីលោកមើលឃើញយុវជនមួយចំនួនតូច បានផលិតវីដេអូចែករំលែកនៅលើបណ្តាញសង្គម ដែលប៉ះពាល់ដល់គុណតម្លៃ សេចក្តីថ្លៃថ្នូរ និងប្រើប្រាស់កាយវិការមិនសមរម្យ ជាពិសេសរូបភាពអាសអាភាស ឬពាក្យពេចន៍គ្មានសីលធម៌។
ថ្លែងក្នុងឱកាសផ្តល់បទសម្ភាសដល់អ្នកសារព័ត៌មាន នៅមន្ទីរពេទ្យគន្ធបុប្ផា នារសៀលថ្ងៃទី ២៤ ខែមិថុនា ឆ្នាំ២០២៦ បន្ទាប់ពីបញ្ចប់បេសកកម្មជិះកង់ឆ្លងទ្វីប ដើម្បីកុមារកម្ពុជា, លោក ទីវ តារារិទ្ធិ បានបន្ថែមថា កិច្ចការដែលអាចជួយសង្គមបានអាចមានដូចជា៖ ការជួយសម្អាតបរិស្ថាន ចូលរួមកាត់បន្ថយគ្រោះថ្នាក់ចរាចរណ៍ ឬរកថវិកាជួយគ្រួសារ សាលារៀន ឬជួយកុមារកម្ពុជាដូចរូបលោកជាដើម។
សូមជម្រាបថា លោក ទីវ តារារិទ្ធិ អ្នកជិះកង់ដើម្បីកុមារកម្ពុជា បានធ្វើមាតុភូមិនិវត្តន៍ត្រឡប់មកកម្ពុជាវិញ នាថ្ងៃទី២២ មិថុនា ឆ្នាំ២០២៦ បន្ទាប់ពីជិះកង់អស់ជិត ៦ម៉ឺនគីឡូម៉ែត្រ ដោយឆ្លងកាត់ប្រទេសចំនួន៤០ និងប្រើរយៈពេល២ឆ្នាំ។
គួរបញ្ជាក់ថា លោក ទីវ តារារិទ្ធិ បានចាប់ផ្ដើមចេញដំណើរចេញពីមន្ទីរពេទ្យកុមារអង្គរ ដែលស្ថិតក្នុងក្រុងសៀមរាប កាលពីថ្ងៃទី៦ មិថុនា ឆ្នាំ២០២៤ ហើយឆ្លងកាត់ ៣ទ្វីប គឺទ្វីបអាស៊ី អឺរ៉ុប និងអាហ្វ្រិកខាងត្បូង។ យោងតាមបណ្តាញផ្លូវការរបស់លោក ពេលមកកម្ពុជាវិញ ការងារសំខាន់ៗត្រូវធ្វើគឺការផ្តល់បទសម្ភាសន៍ជាមួយអ្នកសារព័ត៌មាន រៀបចំធ្វើដំណើរជិះកង់ពីទីក្រុងភ្នំពេញ ទៅកាន់ខេត្តសៀមរាប បិទកម្មវិធីជិះកង់សប្បុរសធម៌នៅមន្ទីពេទ្យគន្ធបុប្ផា និងមន្ទីពេទ្យកុមារអង្គរ ផលិតខ្សែភាពយន្តឯកសារខ្លីនៃការធ្វើដំណើររបស់ខ្ញុំ “២ ឆ្នាំជាមួយកង់ TWO YEARS ON A BIKE” រៀបចំចងក្រង សៀវភៅ “២ ឆ្នាំជាមួយកង់ TWO YEARS ON A BIKE”៕
