ប្រធានស្តីទីព្រឹទ្ធសភា អនុញ្ញាតជូន លោក គីម ជុងណាម ប្រធានមូលនិធិចែករំលែកសង្គ្រោះជីវិតសកលនៃសាធារណរដ្ឋកូរ៉េ ចូលជួបសម្តែងការគួរសម និងបំពាក់គ្រឿងឥស្សរិយយស
25-06-2026 20:45
(ភ្នំពេញ)៖ លោក អ៊ុច បូររិទ្ធ ប្រធានស្តីទីព្រឹទ្ធសភា នៃកម្ពុជា បានអនុញ្ញាតឲ្យលោក គីម ជុងណាម ប្រធានមូលនិធិចែករំលែកសង្គ្រោះជីវិតសកល នៃសាធារណរដ្ឋកូរ៉េ និងគណៈប្រតិភូ ចូលជួបសម្តែងការគួរសម នៅសាលភក្តីវិក្រម៣ វិមានព្រឹទ្ធសភា នៅព្រឹកថ្ងៃទី២២ ខែមិថុនា ឆ្នាំ២០២៦។
ក្នុងឱកាសនៃជំនួបនោះ លោកប្រធានស្តីទី បានសម្តែងការស្វាគមន៍យ៉ាងកក់ក្តៅជូនលោក គីម ជុងណាម ប្រធានមូលនិធិចែករំលែកសង្គ្រោះជីវិតសកល(GLS) និងគណៈប្រតិភូ ដែលបានមកបំពេញទស្សនៈកិច្ចការងារ មនុស្សធម៌ជាថ្មីម្តងទៀតនៅកម្ពុជា ដោយសង្កត់ធ្ងន់ថា វត្តមានរបស់លោកប្រធាន គីម ជុងណាម និងគណៈប្រតិភូនាពេលនេះ ជាសាក្ខីភាពបង្ហាញពីភាពរីកចម្រើនឥតឈប់ឈរនៃចំណងមិត្តភាព និងកិច្ចសហប្រតិបត្តិការល្អប្រសើរ រវាងប្រទេសជាតិទាំងពីរ ដែលត្រូវបានពូនជ្រុំដោយ សម្តេចតេជោ ហ៊ុន សែន អតីតនាយករដ្ឋមន្ត្រី និងអតីតប្រធានាធិបតី លោក គីម យ៉ុងសាម ដែលជាសហស្ថាបនិកនៃការផ្សាភ្ជាប់ឡើងវិញនូវទំនាក់ទំនងការទូតរវាងប្រទេសទាំងពីរកាលពីឆ្នាំ១៩៩៦។
លោកប្រធានស្តីទី បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់លោក គីម ជុងណាម ប្រធានមូលនិធិនិធិចែករំលែកសង្គ្រោះជីវិតសកល និងសហការី ដែលជាបន្តបន្ទាប់ គិតចាប់តាំងពីឆ្នាំ២០២២មក មូលនិធិGLS បាននិងកំពុងបន្តផ្តល់ជំនួយមនុស្សធម៌ជូនដល់ប្រជាជនកម្ពុជា ក្នុងវិស័យសុខាភិបាល អប់រំ សង្គមកិច្ច។ល។ នៅតាមបណ្តារាជធានី ខេត្តមួយចំនួននៅទូទាំងប្រទេសកម្ពុជា។
ក្នុងក្របខណ្ឌអនុវត្តតាមស្មារតីនៃអនុ-ស្សរណៈយោគយល់គ្នានេះ លោកប្រធានស្តីទីព្រឹទ្ធសភា បានសម្តែងនូវការពេញចិត្ត និងកោតសរសើរ ចំពោះ លោក ម៉ម ប៊ុននាង ប្រធានគណៈកម្មការទី១០ព្រឹទ្ធសភា និងលោក គីម ជុងណាម ប្រធានមូលនិធិចែករមលែកសង្គ្រោះជីវិតសកល ដែលនឹងចុះហត្ថលេខាលើការបន្តអនុស្សរណៈនៃការយោគយល់គ្នា ជាលើកទី៣ ដើម្បីផ្តល់ជំនួយមនុស្សធម៌បន្ថែមដល់ព្រឹទ្ធសភាកម្ពុជា សម្រាប់ជួយដល់ប្រជាជនក្រីក្រ និងជនងាយរងគ្រោះនៅខេត្តកែប ខេត្តព្រៃវែង និងខេត្តបាត់ដំបង ក្នុងទំហំទឹកប្រាក់សរុបចំនួន ១៥លានដុល្លាអាមេរិក សម្រាប់អនុ-វត្តរយៈពេល ៥ឆ្នាំ គឺចាប់ពីឆ្នាំ២០២៦ ដល់ឆ្នាំ២០៣១ បន្ថែមលើអនុស្សារណៈដែលមានស្រាប់។
គួរបញ្ជាក់ថា ចាប់តាំងពីឆ្នាំ២០២២ ដល់ឆ្នាំ២០២៦ មូលនិធិចែករំលែកសង្គ្រោះជីវិតកល បានប្រគល់ជំនួយមនុស្សធម៌ដល់ព្រឹទ្ធសភាកម្ពុជា ចំនួន ២២លើករួចមកហើយក្នុងទំហំទឹកប្រាក់ប្រមាណជាង ៣៤លានដុល្លារអាមេរិក។
តាងនាម សម្តេចប្រធានព្រឹទ្ធសភា និងប្រជាជនកម្ពុជា លោកប្រធានស្តីទីព្រឹទ្ធសភា បានបំពាក់គ្រឿង ឥស្សរិយយសជូនដល់ លោកប្រធានមូលនិធិចែករំលែកសង្គ្រោះជីវិតសកល និងគណៈប្រតិភូ ដើម្បីជាការថ្លែងអំណរគុណ និងលើកទឹកចិត្តដល់លោក គីម ជុងណាម និងមូលនិធិចែករំលែកសង្គ្រោះជីវិសកល នៃសាធារណរដ្ឋកូរ៉េ ដែជានិច្ចកាលបានខិតខំប្រឹងប្រែងអស់ពីកម្លាំងកាយចិត្ត និងស្មារតីកៀរគររកជំនួយសប្បុរសធម៌មកជួយលើកកម្ពស់គុណភាពជីវិត និងសុខុមាលភាពប្រជាជនកម្ពុជាឱ្យបានកាន់តែប្រសើរឡើងថែមទៀត។
ជាការឆ្លើយតប លោក គីម ជុងណាម ប្រធានមូលនិធិចែករំលែកសង្គ្រោះជីវិតសកល បានថ្លែងអំណរគុណចំពោះ ឯកឧត្តមប្រធានស្តីទីព្រឹទ្ធសភា ដែលបានផ្តល់ឱកាស និងពេលវេលាដ៏មានតម្លៃសម្រាប់ជំនួបដ៏មានសារៈខាន់នេះ។
លោកប្រធានមូលនិធិ បានគូសបញ្ជាក់ពីការប្តេជ្ញាចិត្តក្នុងការបន្តពង្រឹងកិច្ចសហប្រតិបត្តិការទ្វេភាគី ជាពិសេសជាមួយគណៈកម្មការទី១០ ព្រឹទ្ធសភា ដឹកនាំដោយឯកឧត្តម ម៉ម ប៊ុននាង ឱ្យបានកាន់តែរឹងមាំ និងពង្រីកទំហំជំនួយមនុស្សធម៌ឱ្យកើនដល់ ១០០លានដុល្លាអាមេរិក សម្រាប់ជួយលើកកម្ពស់គុណភាពជីវិតរបស់ប្រជាជនកម្ពុជាឱ្យបានកាន់តែប្រសើរនៅទូទាំងព្រះរាជាណាចក្រកម្ពុជា។
ក្នុងឱកាសនៃការបំពេញទស្សនកិច្ចការងារមនុស្សធម៌នៅកម្ពុជា គណៈប្រតិភូគណៈកម្មការទី១០ ព្រឹទ្ធសភា និងគណៈប្រតិភូមូលនិធិចែករំលែកសង្គ្រោះជីវិតសកល បានអញ្ជើញចុះជួបសំណេះសំណាល និងនាំយកអំណោយមនុស្សធម៌ដែលរួមមានៈ ឱសថ សម្លៀកបំពាក់ សម្ភារសិក្សា និងទឹកដោះគោ ព្រមទាំងថវិកាមួយចំនួន ជូនដល់មជ្ឈមណ្ឌលកុមារកំព្រា និងអង្គការកុមារកំព្រាក្នុងសេចក្តីសង្ឃឹមថ្មីនៅខេត្តកំពង់ស្ពឺ ព្រមទាំងលោកគ្រូ អ្នកគ្រូ និងសិស្សានុសិស្សនៅសាលារៀន ឌ្រីម ស្វាយអំពារ ខេត្តកណ្តាល៕
