(កណ្ដាល)៖ លោក គួច ចំរើន អភិបាលខេត្តកណ្ដាល បានអំពាវនាវពលរដ្ឋឲ្យមានការប្រុងប្រយ័ត្នខ្ពស់ចំពោះបញ្ហាជំងឺគ្រុនឈាម ក្រោយមានស្លាប់កុមារ ៤នាក់ នៅក្រុងសំពៅពូន និងកំពុងផ្ទុះខ្លាំងនៅស្រុកកៀនស្វាយ។

លោកអភិបាលខេត្ត បានអំពាវនាវបែបនេះ កាលថ្ងៃទី២៤ ខែមិថុនា ឆ្នាំ២០២៦ ក្នុងឱកាសដែលលោក និងលោក នូ សាខន ប្រធានក្រុមប្រឹក្សាខេត្តកណ្តាល អញ្ជើញជាគណៈអធិបតីក្នុងពិធីសម្ពោធដាក់ឱ្យប្រើប្រាស់សមិទ្ធផលនានា ក្នុងវិស័យអប់រំ នៅក្រុងសំពៅពូន ខេត្តកណ្តាល នៅបរិវេណវិទ្យាល័យ ហ៊ុន សែន សំពៅពូន ស្ថិតក្នុងសង្កាត់សំពៅពូន ក្រុងសំពៅពូន ខេត្តកណ្ដាល។

លោកអភិបាលខេត្តថា ខណៈដែលរដូវវស្សានេះ ជំងឺគ្រុនឈាមបានផ្ទុះរីករាលដាល ដូច្នេះសូមប្រជាពលរដ្ឋទាំងអស់ បើមានការសង្ស័យសូមទៅជួបក្រុមគ្រូពេទ្យជំនាញ ដើម្បីធ្វើការពិនិត្យ និងព្យាបាលឱ្យទាន់ពេលវេលា សូមកុំបន្តព្យាបាលនៅផ្ទះឱ្យសោះ ព្រោះជំងឺគ្រុនឈាម ប្រសិនបើយើងបណ្ដែតបណ្ដោយ នោះធ្វើឱ្យយើងអាចប្រឈមឬឈានដល់ការបាត់បង់ជីវិត។

ជាមួយគ្នានេះដែរលោកអភិបាលខេត្តកណ្ដាល ក៏បានណែនាំដល់មន្ទីរសុខាភិបាលខេត្ត ក្រុមគ្រូពេទ្យគ្រប់មន្ទីរពេទ្យបង្អែក និងគ្រប់មណ្ឌលសុខភាពទាំងអស់ ត្រូវយកចិត្តទុកដាក់តាមដាននូវសញ្ញានៃជំងឺគ្រុនឈាមនេះ ដើម្បីធ្វើការបន្តពិនិត្យ និងព្យាបាលប្រជាពលរដ្ឋឱ្យបានទាន់ពេលវេលា។

បន្ថែមពីនេះមន្ទីរសុខាភិបាលខេត្ត ត្រូវធ្វើការអប់រំស្តីអំពីវិធានការការពារជំងឺគ្រុនឈាមដល់សហគមន៍ និងតាមសាលារៀន។ ចុះបាញ់ថ្នាំសម្លាប់មូសខ្លាដែលជាភ្នាក់ងារចម្លងជំងឺគ្រុនឈាមនៅតំបន់មានការរាតត្បាតជំងឺគ្រុនឈាម និងបន្តរការដាក់ថ្នាំអាបេតនៅតំបន់មានការកើនឡើងនៃជំងឺគ្រុនឈាម៕