(ភ្នំពេញ)៖ វិស័យទេសចរណ៍កម្ពុជា បន្តបង្ហាញសញ្ញាវិជ្ជមានគួរឱ្យកត់សម្គាល់ក្នុងឆ្នាំ២០២៦នេះ ដោយចំនួនភ្ញៀវទេសចរជាតិដើរកម្សាន្តក្នុងស្រុក បានកើនឡើងដល់ជាង ២០,៣លាននាក់ ក្នុងរយៈពេល ៥ខែដំបូងនៃឆ្នាំ២០២៦ ស្មើនឹងកំណើន ៥៤,២% បើធៀបនឹងរយៈពេលដូចគ្នាកាលពីឆ្នាំមុន។

កំណើនដ៏គួរឱ្យមោទនភាពនេះ កើតឡើងក្រោមការអនុវត្តយន្តការគន្លឹះទាំង៦ សម្រាប់ជំរុញវិស័យទេសចរណ៍ និងការដាក់ចេញនូវយុទ្ធនាការទេសចរណ៍ថ្មីៗ ក្រោមការដឹកនាំប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួមមានយុទ្ធនាការ «ទស្សនាកម្ពុជារដូវកាលបៃតង» និង «រដូវកាលទេសចរណ៍សាមគ្គីភាព» ដែលបានជួយជំរុញការធ្វើដំណើរកម្សាន្តក្នុងស្រុក និងបង្កើនភាពទាក់ទាញនៃគោលដៅទេសចរណ៍នានាទូទាំងប្រទេស។

ទន្ទឹមនឹងនេះ កត្តាសុខសន្តិភាព ស្ថិរភាពនយោបាយ និងសង្គម ក៏ដូចជាការរៀបចំព្រឹត្តិការណ៍ទេសចរណ៍ និងកម្សាន្តជាច្រើននៅតាមបណ្តាខេត្ត-រាជធានី បានរួមចំណែកបង្កើតបរិយាកាសអំណោយផល និងជំរុញឱ្យប្រជាពលរដ្ឋកាន់តែច្រើនចេញដើរលេងកម្សាន្តក្នុងស្រុក។

ជាពិសេស ការអភិវឌ្ឍផលិតផលទេសចរណ៍ថ្មីៗ និងការកែលម្អហេដ្ឋារចនាសម្ព័ន្ធតាមគោលដៅទេសចរណ៍សំខាន់ៗ បានជួយបង្កើនជម្រើសសម្រាប់ភ្ញៀវទេសចរ និងលើកទឹកចិត្តឱ្យប្រជាពលរដ្ឋស្វែងយល់ពីសក្តានុពលទេសចរណ៍ធម្មជាតិ វប្បធម៌ និងប្រវត្តិសាស្ត្ររបស់កម្ពុជាកាន់តែច្រើនឡើង។

កំណើនទេសចរជាតិជាង ២០,៣លាននាក់ក្នុងរយៈពេលត្រឹមតែ ៥ខែនេះ ត្រូវបានចាត់ទុកថា ជានិន្នាការវិជ្ជមានថ្មីមួយ និងជាសញ្ញាបង្ហាញពីភាពរឹងមាំនៃទីផ្សារទេសចរណ៍ក្នុងស្រុក ដែលកំពុងដើរតួនាទីសំខាន់ក្នុងការគាំទ្រកំណើនសេដ្ឋកិច្ច បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋនៅតាមសហគមន៍ទេសចរណ៍ទូទាំងប្រទេស៕