(ព្រះវិហារ)៖ ដើម្បីលើកកម្ពស់សីលធម៌ គុណធម៌ និងស្មារតីដឹងគុណចំពោះអ្នកមានគុណ «គម្រោងយើងរួមគ្នា» នៃអង្គការអាដ្រា បានសហការជាមួយមន្ទីរអប់រំ យុវជន និងកីឡាខេត្តព្រះវិហារ អាជ្ញាធរឃុំស្រយង់ និងគណៈគ្រប់គ្រងសាលាអនុវិទ្យាល័យស្រយង់ បានរៀបចំទិវា «រំលឹកគុណលោកឪពុកអ្នកម្តាយ» នៅសាលាអនុវិទ្យាល័យស្រយង់ ស្ថិតក្នុងភូមិស្រយង់ជើង ឃុំស្រយង់ ស្រុកគូលែន ខេត្តព្រះវិហារ នៅថ្ងៃទី២៣ ខែមិថុនា ឆ្នាំ២០២៦។

កម្មវិធីនេះត្រូវបានរៀបចំឡើងដោយមានការឧបត្ថម្ភគាំទ្រពីមូលនិធិសាកលកាណាដា និងអង្គការអាដ្រាកាណាដា ក្រោមវត្តមានចូលរួមពីលោក ព្រឹប រ៉ន សមាជិកក្រុមប្រឹក្សាឃុំស្រយង់ និងមានការចូលរួមពីលោក ប៉ិល កូឡាន មន្ត្រីការិយាល័យសុខភាពសិក្សា តំណាងមន្ទីរអប់រំ យុវជន និងកីឡាខេត្តព្រះវិហារ លោក រ័ត្ន រម្យនា ប្រធានគម្រោង «យើងរួមគ្នា» នៃអង្គការអាដ្រាប្រចាំខេត្តព្រះវិហារ លោក ធួន សារៀត អនុប្រធានការិយាល័យអប់រំ យុវជន និងកីឡា ស្រុកគូលែន ព្រមទាំងអាជ្ញាធរមូលដ្ឋាន លោកគ្រូ អ្នកគ្រូ មាតាបិតា អាណាព្យាបាល និងសិស្សានុសិស្សយ៉ាងច្រើនកុះករ។

ថ្លែងក្នុងកម្មវិធីនេះ ថ្នាក់ដឹកនាំ និងអ្នករៀបចំកម្មវិធីបានគូសបញ្ជាក់ថា ឪពុកម្តាយគឺជាអ្នកមានគុណដ៏ធំបំផុតក្នុងជីវិត ដែលបានលះបង់ទាំងកម្លាំងកាយ កម្លាំងចិត្ត និងពេលវេលា ដើម្បីចិញ្ចឹមបីបាច់ថែរក្សា និងផ្តល់ឱកាសឱ្យកូនៗបានសិក្សារៀនសូត្រ ក្លាយជាពលរដ្ឋល្អក្នុងសង្គម។

កម្មវិធី «រំលឹកគុណលោកឪពុកអ្នកម្តាយ» ត្រូវបានរៀបចំឡើងក្នុងគោលបំណងបណ្តុះស្មារតីយុវសិស្សឱ្យចេះគោរព ស្រឡាញ់ ដឹងគុណ និងតបស្នងសងគុណចំពោះឪពុកម្តាយ ខណៈដែលសង្គមបច្ចុប្បន្នកំពុងប្រឈមនឹងការប្រែប្រួលផ្នែកសង្គម និងឥរិយាបថរបស់យុវវ័យមួយចំនួន។

អ្នកចូលរួមបានលើកឡើងពីសារសំខាន់ៗមួយចំនួនដើម្បីដាស់ស្មារតីយុវវ័យ រួមមាន៖

ឪពុកម្តាយជាមនុស្សដែលស្រឡាញ់ និងលះបង់គ្រប់យ៉ាងដើម្បីកូន ដោយមិនរំពឹងការតបស្នង។ ការគោរពស្តាប់បង្គាប់ និងខិតខំរៀនសូត្រ គឺជាការតបស្នងគុណដ៏មានតម្លៃបំផុតសម្រាប់ឪពុកម្តាយ។ កុំចាំដល់ពេលបាត់បង់ ទើបដឹងពីតម្លៃ និងសេចក្តីស្រឡាញ់របស់លោកឪពុកអ្នកម្តាយ។ យុវវ័យត្រូវជៀសវាងអំពើអបាយមុខ គ្រឿងញៀន និងទង្វើដែលធ្វើឱ្យឪពុកម្តាយព្រួយបារម្ភ។ ត្រូវចេះថ្លែងអំណរគុណ ស្រឡាញ់ និងយកចិត្តទុកដាក់ចំពោះឪពុកម្តាយជារៀងរាល់ថ្ងៃ មិនមែនរង់ចាំតែថ្ងៃពិសេសនោះទេ។ ភាពជោគជ័យរបស់កូន គឺជាក្តីសុខ និងមោទនភាពដ៏ធំបំផុតរបស់ឪពុកម្តាយ។

តាមរយៈទិវានេះ សិស្សានុសិស្សជាច្រើនបានបង្ហាញពីការយល់ដឹងកាន់តែច្បាស់អំពីគុណបំណាច់របស់អ្នកមានគុណ និងបានប្តេជ្ញាចិត្តខិតខំរៀនសូត្រ ប្រព្រឹត្តល្អក្នុងសង្គម និងធ្វើជាកូនល្អ ដើម្បីក្លាយជាធនធានមនុស្សប្រកបដោយគុណភាព និងសីលធម៌សម្រាប់គ្រួសារ៕