(ភ្នំពេញ)៖ អគ្គនាយកដ្ឋានផ្លូវទឹក នៃក្រសួងសាធារណការ និងដឹកជញ្ជូន នាថ្ងៃទី២៥ ខែមិថុនា ឆ្នាំ២០២៦នេះ បានសហការជាមួយក្រុមហ៊ុនសាជីវកម្មស្ពានថ្នល់ចិន( CRBC) រៀបចំបាឋកថា ចែករំលែកចំណេះដឹងពីគម្រោងគ្រប់គ្រងធនធានចម្រុះហ្វូណនតេជោ (FTC) ក៏ដូចជាណែនាំពីគម្រោងនេះដល់សាស្ត្រាចារ្យ និងនិស្សិតនៃវិទ្យាស្ថានបច្ចេកវិទ្យាកម្ពុជា (តិចណូ) ប្រមាណជិត ៤០០នាក់ ក្នុងគោលបំណងឱ្យបានយល់កាន់តែច្បាស់ពីអត្ថប្រយោជន៍នៃគម្រោងសាងសង់ព្រែកជីកដ៏មានសារៈសំខាន់មួយនេះ។

ពិធីនេះបានធ្វើឡើងក្រោមវត្តមានលោក ហួន រតន៍ អនុប្រធាននាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់​ កំពង់ផែ តំណាងលោក ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ​ នៃក្រសួងសាធារណការ និងដឹកជញ្ជូន និងលោក ចាង ហៀងឡុង នាយករងប្រតិបត្តិក្រុមហ៊ុនហ្វូណនតេជោ ខូសថល អ៉ីនឡេន វ័រធើវេយ ឯ.ក (FTC) នៃសាជីវកម្មស្ពានថ្នល់ចិន( CRBC) រួមទាំងមានតំណាងមកពីក្រសួងហិរញ្ញវត្ថុ និងថ្នាក់ដឹកនាំនៃគម្រោងគ្រប់គ្រងធនធានចម្រុះហ្វូណនតេជោ​ ជាច្រើនរូបទៀត។

នាឱកាសនោះលោក លាវ ចៅវៃ ប្រធានគ្រប់គ្រងទូទៅនៃគម្រោង FTC បានបញ្ជាក់ឱ្យដឹងថា គម្រោងនេះគឺជាគំនិតផ្តួចផ្តើមមួយ ក្នុងចំណោមគំនិតផ្តួចផ្តើមហេដ្ឋារចនាសម្ព័ន្ធសំខាន់បំផុតរបស់កម្ពុជា ហើយក្រុមហ៊ុន CRBC នឹងប្រកាន់ខ្ជាប់នូវគោលការណ៍សុវត្ថិភាព ការការពារបរិស្ថាន និងការសាងសង់ប្រកបដោយការទទួលខុសត្រូវ ដើម្បីកាត់បន្ថយផលប៉ះពាល់ដល់សហគមន៍ ហើយនឹងពង្រឹងទំនាក់ទំនងជាមួយស្ថាប័នអប់រំ និងសាធារណជន ដើម្បីបំពេញទំនួលខុសត្រូវសង្គម និងសហការដើម្បីសាងសង់គម្រោងសំខាន់នេះឱ្យទទួលបានជោគជ័យ។

លោក ចាង ហៀងឡុង បានបញ្ជាក់ដែរថា គម្រោងគ្រប់គ្រងធនធានចម្រុះហ្វូណនតេជោនេះ គឺជាគំនិតផ្តួចផ្តើមជាយុទ្ធសាស្ត្ររបស់កម្ពុជា ដែលមានការវិនិយោគរួមពីភាគីកម្ពុជា និងចិន ហើយទទួលបានការគាំទ្រយ៉ាងខ្លាំង។

លោក ចាង ហៀងឡុង បានបន្ថែមថា គម្រោងប្រវត្តិសាស្ត្រនេះ នឹងផ្តល់អត្ថប្រយោជន៍ក្នុងវិស័យការគ្រប់គ្រងធនធានទឹក កសិកម្ម ទេសចរណ៍អេកូ និងការដឹកជញ្ជូនតាមផ្ទៃទឹក ក៏ដូចជាបង្កើតការងារ និងអភិវឌ្ឍជំនាញ ស្របជាមួយយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។ គម្រោងនេះនឹងបន្ថែមភាពរឹងមាំដល់ «មិត្តភាពដែក» រវាងកម្ពុជា និងចិន ដើម្បីធ្វើឱ្យទំនាក់ទំនងនេះកាន់តែរឹងមាំ និងជាមរតកជូនដល់អ្នកជំនាន់ក្រោយផងដែរ។

សូមបញ្ជាក់ដែរថា គម្រោងព្រែកជីកហ្វូណនតេជោ គឺជាគម្រោងដឹកជញ្ជូនផ្លូវទឹក តភ្ជាប់រវាងទន្លេ និងសមុទ្រដ៏មានសក្តានុពលមួយរបស់កម្ពុជា។ គម្រោងនេះតភ្ជាប់ពីទន្លេទៅសមុទ្រ មានប្រវែងជិត ១៨០គីឡូម៉ែត្រ ចាប់ផ្តើមពីព្រែកតាកែវនៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្រ្តខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។

គម្រោងព្រែកជីកនេះនឹងត្រូវសាងសង់ស្ទើរទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណដែលបានបន្សល់ទុកស្រាប់តាំងពីសម័យអាណាចក្រហ្វូណនមកម្ល៉េះ ក្នុងនោះផ្លូវទឹកដែលមានស្រាប់ មានប្រវែងប្រមាណ ១៣៥គីឡូម៉ែត្រ ផ្លូវទឹកត្រូវជីកតម្រង់កុំឱ្យកោងពេក មានប្រវែងប្រមាណ ៣៨គីឡូម៉ែត្រ និងផ្លូវទឹកជីកថ្មីមានប្រវែងប្រមាណ ៧គីឡូម៉ែត្រ ដើម្បីកាត់បន្ថយកំណោង និងកាត់បន្ថយចម្ងាយតភ្ជាប់ទៅកាន់សមុទ្រ។ គម្រោងនេះក៏ជួយក្នុងការបង្កើតតំបន់ពាណិជ្ជកម្ម និងតំបន់សេដ្ឋកិច្ចពិសេស ព្រមទាំងការអភិវឌ្ឍផែរណបថ្មីៗជាច្រើន ក៏ដូចជាការបង្កើនប្រព័ន្ធធារាសាស្ត្រ ការអភិវឌ្ឍកសិកម្ម វារីវប្បកម្ម ទេសចរណ៍ ការជួយរំដោះទឹកជំនន់ក្នុងរដូវវស្សា ការជួយបង្កើនផលត្រីទឹកសាបនៅតាមព្រែក និងការពង្រីកវិស័យអចលនទ្រព្យ ព្រមទាំងការវិនិយោគផ្សេងៗទៀត៕