(កំពង់ធំ)៖ ក្រុមគ្រូពេទ្យស្ម័គ្រចិត្តមកពីអង្គការមនុស្សធម៌នៃក្តីស្រលាញ់ និងមូលនិធិចក្ខុខ្មែរ រួមជាមួយក្រុមយុវជនស្ម័គ្រចិត្តធនាគារជាតិនៃកម្ពុជា និងដៃគូពាក់ព័ន្ធនានា សហការចុះពិនិត្យ និងព្យាបាលភ្នែកជូនប្រជាពលរដ្ឋ ក្នុងស្រុកសណ្ដាន់ដោយឥតគិតថ្លៃ ដើម្បីចូលរួម លើកកម្ពស់សុខភាពភ្នែករបស់ប្រជាពលរដ្ឋឱ្យល្អប្រសើរ។

លោក រ័ត្ន សុវណ្ណនរៈ ទេសាភិបាលរងធនាគារជាតិនៃកម្ពុជា លើកឡើងនៅក្នុងកម្មវិធីពិនិត្យ និងព្យាបាលភ្នែកជូនប្រជា- ពលរដ្ឋ នៅស្រុកសណ្តាន់ ខេត្តកំពង់ធំ នៅទី២៥ ខែមិថុនា ឆ្នាំ២០២៦នេះថា រាជរដ្ឋាភិបាលកម្ពុជាក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាអ្នកបន្តមរតកដឹកនាំក្រោមដំបូលសន្តិភាពពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បាននិងកំពុងធ្វើដំណើរទៅមុខយ៉ាងស្វាហាប់ និងបន្តយកចិត្តទុកដាក់យ៉ាងខ្លាំងទៅលើវិស័យសំខាន់ៗនានា ក្នុងការអភិវឌ្ឍសេដ្ឋកិច្ចជាតិ និងសង្គម ក្នុងនោះមានយុទ្ធសាស្ត្របញ្ចកោណដំណាក់កាលទី១ យុទ្ធសាស្ត្រទី១ ផ្តោតជាសំខាន់ទៅលើ ធនធានមនុស្ស ដែលរួមមានសុខុមាលភាពប្រជាជនជាកត្តាចម្បង។

បញ្ហានេះរាជរដ្ឋាភិបាលចាត់ទុកវិស័យសុខាភិបាល ជាវិស័យអាទិភាពមួយ ក្នុងចំណោមវិស័យអាទិភាពទាំង៦ ត្រូវបាននិង កំពុងបន្តពង្រឹងទាំងថ្នាក់ជាតិ និងថ្នាក់ក្រោមជាតិ ក្នុងគោលបំណងពង្រឹងសុខមាលភាពប្រជាពលរដ្ឋឆ្ពោះទៅការគ្របដណ្ដប់សុខភាព ជាសកលរួមមាន៖
១៖ ការពង្រីកសេវាសុខាភិបាលរហូតដល់ទៅ ៧ថ្ងៃ/២៤ម៉ោង នៅតាមបណ្តាមន្ទីរពេទ្យ និងមណ្ឌលសុខភាព។
២៖ ការដាក់សម្ពោធមន្ទីរពេទ្យបង្អែកនៅសៀមរាប ដែលអាចទទួលព្យាបាលអ្នកជំងឺធ្ងន់ធ្ងរមកពីខេត្តនៅក្បែរនោះ។
៣៖ ការពង្រឹងសមត្ថ- ភាព និងគុណភាពគ្រូពេទ្យ និងបរិក្ខារពេទ្យនៅតាមមន្ទីរពេទ្យ និងមណ្ឌលសុខភាព។
៤៖ ការបំពាក់ប្រព័ន្ធអឺនធើណែតសម្រាប់ ក្រុមគ្រូពេទ្យនៅតាមបណ្តាខេត្ត អាចទាក់ទងពិគ្រោះយោបល់ជាមួយក្រុមគ្រូពេទ្យនៅភ្នំពេញជាដើម។

លោកបានបន្តថា ជាក់ស្ដែងថ្ងៃនេះ ក្រុមគ្រូពេទ្យស្ម័គ្រចិត្តចំនូន២៩រូប មកពីអង្គការមនុស្សធម៌នៃក្តីស្រលាញ់ របស់ប្រទេស សិង្ហបុរី និងមូលនិធិចក្ខុខ្មែរ សហការជាមួយជាមួយក្រុមយុវជនស្ម័គ្រចិត្តធនាគារជាតិនៃកម្ពុជាចំនួន ១៩ រូប ការចូលរួមពីសំណាក់ ធនាគារអេស៊ីលីដា, ធនាគារ AMK, ធនាគារ KB Prasac, ព្រមទាំងយុវជន ស.ស.យ.ក ស្រុកសណ្តាន់ ដើម្បីផ្តល់ជូនការពិនិត្យ និង ព្យាបាល ភ្នែកដោយឥតគិតថ្លៃ ជូនអ៊ំ ពូ មីង និងបងប្អូន ប្រជាពលរដ្ឋក្នុងស្រុកសណ្ដាន់ និងមកពីស្រុកប្រាសាទសំបូរមួយចំនួន សរុបប្រមាណជាង ១ ពាន់នាក់ ដែលកម្មវិធីនេះគ្រោងរយៈពេល២ថ្ងៃ គឺថ្ងៃទី២៥ ដល់ថ្ងៃ ២៦ ដើម្បីចូលរួមចំណែកក្នុងការធ្វើឱ្យសុខភាព ភ្នែករបស់ប្រជាពលរដ្ឋកាន់តែប្រសើរ ដើម្បីអាចមានលទ្ធភាពចូលរួមក្នុងសកម្មភាពសេដ្ឋកិច្ចឱ្យកាន់តែសកម្ម ដែលជាផលវិជ្ជមានទៅ ដល់ការអភិវឌ្ឍកំណើនសេដ្ឋកិច្ចជាតិទាំងមូលផងដែរ៕