(បរទេស)៖ ៧ក្រុមដែលបានធ្លាក់ចេញពីព្រឹត្តិការណ៍បាល់ទាត់ពិភពលោក World Cup 2026 ជាស្ថាពរ ក៏នឹងទទួលបានប្រាក់រង្វាន់លើកទឹកចិត្តប្រមាណ ១០.៥លានដុល្លារ ក្នុង ១ក្រុម ដើម្បីត្រឡប់ទៅវិញដែរ។

ក្រុមទាំងនោះរួមមាន សាធារណរដ្ឋឆេក កាតា ហៃទី កូរ៉ាសៅ ទុយនេស៊ី អ៊ូសបេគីស្ថាន និងប៉ាណាម៉ា ដែលឈរបាត តារាងនៃពូលរៀងៗខ្លួនសម្រាប់ World Cup លើកទី២៣ ដោយមានសហរដ្ឋអាមេរិក មិចស៊ិក និងកាណាដាធ្វើម្ចាស់ផ្ទះរួមគ្នា ចាប់ផ្តើមពីថ្ងៃព្រហស្បតិ៍ ទី១១ ខែមិថុនាមក ដោយខ្លះទើបលេងបាន ២ប្រកួត និងខ្លះទៀត បញ្ចប់វគ្គសន្សំពិន្ទុរួចរាល់។

មែនទែនទៅបើយោងតាមការចេញផ្សាយនៅលើគេហទំព័រ FIFA បានគូសបញ្ជាក់ថា បណ្តាក្រុមហាលអាវចាប់ពីលេខ៣៣ ដល់លេខ៤៨ (១៦ក្រុម) ដែលមិនអាចឆ្លងទៅវគ្គ ៣២ក្រុមបាននោះ នឹងទទួលបានប្រាក់ពីការលេង ៣ប្រកួតក្នុងពូលតែ ៩លានដុល្លារទេ ក៏ប៉ុន្តែសហព័ន្ធគ្រប់គ្រងបាល់ទាត់ខាងលើបានផ្តល់ប្រាក់ ១.៥លានដុល្លារស្មើៗគ្នា ចំពោះទាំង ៤៨ក្រុម ដែលបានឡើងមកលេង World Cup 2026 នេះ។

នៅចាំបានថា ក្នុងកិច្ចប្រជុំក្រុមប្រឹក្សាភិបាល FIFA កាលពីចុងឆ្នាំ២០២៥ សហព័ន្ធកំពូលមួយនេះក៏បានអនុម័តកញ្ចប់ថវិកាសរុប ៧២៧លានដុល្លារ ដើម្បីធ្វើជាប្រាក់រង្វាន់នៅ World Cup ឆ្នាំនេះ និងមានការកើនឡើង ៥០% ផងដែរបើធៀបនឹង World Cup កាលពី ៤ឆ្នាំមុន ដែលរៀបចំនៅប្រទេសកាតា។

- ជើងឯក៖ ៥០លានដុល្លារ
- ជើងឯករង៖ ៣៣លានដុល្លារ
- ក្រុមលេខ៣៖ ២៩លានដុល្លារ
- ក្រុមលេខ៤៖ ២៧លានដុល្លារ
- លេខ៥-៨៖ ១៩លានដុល្លារ
- លេខ៩-១៦៖ ១៥លានដុល្លារ
- លេខ១៧-៣២៖ ១១លានដុល្លារ
- លេខ៣៣-៤៨៖ ៩លានដុល្លារ៕