(ណាននីង)៖ លោកបណ្ឌិត ជា មុនីឫទ្ធិ ពីទីក្រុងណានីង ភូមិភាគស្វយ័តក្វាងស៊ី ប្រទេសចិន នៅថ្ងៃទី២៦ ខែមិថុនានេះ បានបង្ហាញនូវរូបគំនូរនៃការជួបគ្នារវាងទូក «ង» របស់កម្ពុជា និងទូក «នាគ» របស់ចិន ដែលនេះមិនត្រឹមជាការបង្ហាញពីសិល្បៈ និងប្រពៃណីនៃការប្រណាំងទូករបស់ប្រទេសទាំងពីរប៉ុណ្ណោះទេ ប៉ុន្តែថែមទាំងជានិមិត្តរូបនៃចំណងមិត្តភាពដ៏ជ្រាលជ្រៅ ដែលត្រូវបានតភ្ជាប់ដោយទន្លេឡានឆាង-មេគង្គ។

ក្នុងនាមប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន លោកបណ្ឌិត ជា មុនីឫទ្ធិ បានបញ្ជាក់ថា ទន្លេឡានឆាងនៅប្រទេសចិន ហូរចុះមកក្លាយជាទន្លេមេគង្គ ដែលផ្តល់ជីវិតដល់ប្រជាជននៅតាមបណ្តាប្រទេសនានា រួមទាំងកម្ពុជាផងដែរ។ ដូច្នេះ ការណាត់ជួបរវាងទូកប្រពៃណីទាំងពីរ គឺជាសារបង្ហាញពីការគោរពអរិយធម៌ទៅវិញទៅមក ការផ្លាស់ប្តូរវប្បធម៌ និងការពង្រឹងទំនាក់ទំនងប្រជាជននិងប្រជាជន។

ចង្វាក់ចែវដ៏រឹងមាំរបស់ទូក «ង» និងស្មារតីឯកភាពរបស់ទូក «នាគ» សុទ្ធតែឆ្លុះបញ្ចាំងពីតម្លៃរួមនៃការសាមគ្គី ការសហការ និងការតស៊ូដើម្បីឈានទៅរកវឌ្ឍនភាព។ ការជួបគ្នានេះបានបញ្ជាក់ថា ទន្លេឡានឆាង-មេគង្គ មិនត្រឹមជាខ្សែទឹកដែលតភ្ជាប់ភូមិសាស្ត្រប៉ុណ្ណោះទេ ប៉ុន្តែជាស្ពានមិត្តភាពដែលបន្តពង្រឹងទំនាក់ទំនងកម្ពុជា-ចិន ឱ្យកាន់តែរឹងមាំ និងឈានទៅរកអនាគតរួមប្រកបដោយភាពរុងរឿង៕