(ភ្នំពេញ)៖ លោក ម៉ែន សាម៉ន អនុរដ្ឋលេខាធិការក្រសួងព័ត៌មាន និងជាសមាជិកក្រុមការងារត្រួតពិនិត្យការផ្សាយពាណិជ្ជកម្មគ្រឿងស្រវឹង តំណាងលោក នេត្រ ភក្ត្រា រដ្ឋមន្ត្រីក្រសួងព័ត៌មាន នាព្រឹកថ្ងៃទី២៦ ខែមិថុនា ឆ្នាំ២០២៦នេះ បានអញ្ជើញជាអធិបតីក្នុងពិធីប្រកួតវោហារសព្ទជាក្រុមវគ្គផ្តាច់ព្រ័ត្រ ស្តីពីឥទ្ធិពលនៃគ្រឿងស្រវឹង ដែលបានរៀបចំឡើងនៅសាលទន្លេសាប អគារខេមរវិទូ នៃរាជបណ្ឌិតសភាកម្ពុជា។

ពិធីនេះដែរក៏មានការចូលរួមពីលោកបណ្ឌិត យង់ ពៅ អគ្គលេខាធិការរាជបណ្ឌិតសភាកម្ពុជា លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា និងមានតំណាងមកពីក្រសួងអប់រំ យុវជន និងកីឡា តំណាងមកពីក្រសួងសុខាភិបាល តំណាងអង្គការសុខភាពពិភពលោកប្រចាំកម្ពុជា រួមទាំងមាន យុវជន និងនិស្សិតមកពីតាមបណ្តាសាកលវិទ្យាល័យជាច្រើនទៀត។

សូមជម្រាបថា កម្មវិធីប្រកួតវោហារសព្ទជាក្រុម ស្តីពីឥទ្ធិពលនៃគ្រឿងស្រវឹង មានយុវជនចំនួនជាង ៧០០នាក់ បានផ្ញើអត្ថបទចូលរួមការប្រកួតវោហារស័ព្ទជាក្រុម ស្តីពីឥទ្ធិពលនៃគ្រឿងស្រវឹង ដែលរៀបចំឡើងរាជបណ្ឌិតសភាកម្ពុជា សហការជាមួយអង្គការចលនាដើម្បីសុខភាពកម្ពុជា ចាប់ពីថ្ងៃទី១០ ខែឧសភា រហូតដល់ថ្ងៃទី០៩ ខែមិថុនា ឆ្នាំ២០២៦ ហើយនៅក្នុងវគ្គផ្តាច់ព្រ័ត្រនៃការប្រកួតវោហារស័ព្ទជាក្រុមនេះ មានបេក្ខជនចំនួន៤ក្រុម បានឡើងបង្ហាញសមត្ថភាព ដើម្បីទទួលបានប្រសិទ្ធនាមជាជ័យលាភីនៃការប្រកួតវោហារសព្ទជាក្រុម នៅចំពោះមុខគណៈកម្មការផ្តល់ពិន្ទុ និងអ្នកចូលរួមសរុបប្រមាណ ៣០០រូប។

ថ្លែងនាឱកាសនោះលោក ម៉ែន សាម៉ន បានថ្លែងអរគុណដល់គ្រប់ស្ថាប័ន និងអង្គការក្រៅរដ្ឋាភិបាលទាំងអស់ ដែលបានរៀបចំកម្មវិធីដ៏មានសារសំខាន់នេះឡើង និងបានថ្លែងកោតសរសើរដល់ក្រុមយុវជន និងនិស្សិតទាំងអស់ ដែលមានក្លាហានក្នុងការឡើងប្រកួតវោហារសព្ទស្តីពីឥទ្ធិពលនៃគ្រឿងស្រវឹងដ៏មានសារសំខាន់មួយនេះ ព្រោះជាវេទិកាមួយដែលយើងបានស្តាប់លឺសម្លេងរបស់យុវជនព្រួយបារម្ភពីគ្រឿងស្រវឹង និងយកធាតុចូលរបស់ក្មួយៗទៅពិចារណាសម្រាប់ការចាត់វិធានការបន្តទៀត។

លោក ម៉ែន សាម៉ន ក៏បានវាយតម្លៃខ្ពស់នូវកិច្ចខិតខំប្រឹងប្រែងរបស់ក្រុមនិស្សិត​ និងយុវជនទាំងអស់​ដែលបានខិតខំស្រាវជ្រាវនូវចំណេះដឹងថ្មី​ ក៏ដូចជាក្តីកង្វល់ផ្សេងៗមកចែករំលែកនាពេលនេះ​ និងបានបញ្ជាក់ថា​ រាជរដ្ឋាភិបាលកម្ពុជាតែងតែស្តាប់នូវរាល់ក្តីកង្វល់របស់ប្រជាពលរដ្ឋ ក៏ដូចជាយុវជន​ និងយកមកពិចារណា​ ដេីម្បីធ្វើដោះស្រាយផងដែរ។

សូមបញ្ជាក់ដែរថា​ ក្រុមយុវជន​ និងនិស្សិតជ័យលាភីនៃប្រកួតវោហារសព្ទនេះ លេខ១៖ ទទួលបានមេដាយជ័យលាភី ថវិកា​ ៣លាន ២០ម៉ឺនរៀល និងវិញ្ញាបនបត្របញ្ជាក់ជ័យលាភី,​ លេខ២៖ មេដាយជ័យលាភី ថវិកា​ ២លាន​ ៤០ម៉ឺនរៀល និងវិញ្ញាបនបត្របញ្ជាក់ជ័យលាភី,​ លេខ៣៖ មេដាយជ័យលាភី ថវិកា ១លាន ៦០ម៉ឺនរៀល និងវិញ្ញាបនបត្របញ្ជាក់ជ័យលាភី​ និងរង្វាន់លើកទឹកចិត្តលេខ៤ ទទួលបានថវិកា​ ៤០ម៉ឺនរៀល និងវិញ្ញាបនបត្របញ្ជាក់ការចូលរួម៕