(ពោធិ៍សាត់)៖ លោកស្រី អាំង សុជាតា ខូយ រីដា អនុប្រធានកិត្តិយស និងជាប្រធានក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជា ខេត្តពោធិ៍សាត់ នាព្រឹកថ្ងៃទី២៦ ខែមិថុនា ឆ្នាំ២០២៦នេះ បានដឹកនាំក្រុមការងារ ចុះជួបសំណេះសំណាលសួរសុខទុក្ខ និងផ្តល់ការអប់រំសុខភាពជូនស្ត្រីមានផ្ទៃពោះ ស្ត្រីត្រៀមសម្រាល ស្ត្រីសម្រាលកូនរួច និងអ្នកផ្ទុកមេរោគអេដស៍ សរុបចំនួន១៤នាក់ នៅមណ្ឌលសុខភាពតាសាស់ ស្ថិតក្នុងឃុំផ្ទះរុង ស្រុកតាលោសែនជ័យ ខេត្តពោធិ៍សាត់។

ថ្លែងក្នុងឱកាសនោះ លោកស្រី អាំង សុជាតា ខូយ រីដា បានពាំនាំនូវប្រសាសន៍ផ្តាំផ្ញើសាកសួរសុខទុក្ខដោយក្តីនឹករលឹក និងអាណិតស្រឡាញ់ជាទីបំផុត ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែយកចិត្តទុកដាក់ខ្ពស់ ចំពោះសុខទុក្ខរបស់បងប្អូនប្រជាពលរដ្ឋគ្រប់រូប ជាពិសេសស្ត្រីមានផ្ទៃពោះ ស្ត្រីទើបសម្រាលកូន និងបងប្អូនអ្នកផ្ទុកមេរោគអេដស៍ ដោយមិនប្រកាន់វណ្ណៈ ឬនិន្នាការនយោបាយអ្វីឡើយ។

លោកស្រីបានគូសបញ្ជាក់ថា ការចុះមកជួបជុំគ្នានៅពេលនេះ មិនត្រឹមតែដើម្បីផ្តល់ជាអំណោយមនុស្សធម៌បន្តិចបន្តួចសម្រាប់សម្រាលការលំបាកក្នុងជីវភាពប៉ុណ្ណោះទេ ប៉ុន្តែគោលដៅសំខាន់បំផុតគឺការផ្តល់ចំណេះដឹង ក្នុងគោលបំណងលើកកម្ពស់ចំណេះដឹងដល់ស្ត្រីជាមាតា និងសហគមន៍ អំពី “អនាម័យជាជំនាញរបស់ម្តាយ” ព្រោះសុខភាពមាតា និងកុមារ គឺជាគ្រឹះដ៏សំខាន់ ក្នុងការកសាងមូលធនមនុស្សប្រកបដោយគុណភាព សម្រាប់សង្គមជាតិ។

លោកស្រី អាំង សុជាតា ខូយ រីដា បានសង្កត់ធ្ងន់លើការអនុវត្ត “រស់នៅស្អាត ៣យ៉ាង ហូបស្អាត ផឹកស្អាត និងរស់នៅស្អាត” ដើម្បីការពារជំងឺរាគ គ្រុនចាញ់ គ្រុនឈាម និងជំងឺពោះវៀនផ្សេងៗ, ត្រូវពិនិត្យផ្ទៃពោះយ៉ាងតិច ៤ដង, ទទួលទានអាហារមានជីវជាតិ និងសម្រាលកូននៅមណ្ឌលសុខភាព ឬមន្ទីរពេទ្យ, ត្រូវបំបៅកូនដោយទឹកដោះម្តាយតែមួយមុខគត់រហូតដល់អាយុ ៦ខែ និងបន្តដល់អាយុ ២ឆ្នាំ រួមជាមួយអាហារបន្ថែម ព្រមទាំងចាក់វ៉ាក់សាំងឱ្យបានគ្រប់ចំនួន និងកែប្រែទម្លាប់រស់នៅ តាមរយៈការកាត់បន្ថយស្ករ អំបិល ខ្លាញ់ ឈប់ជក់បារី និងគ្រឿងស្រវឹង ព្រមទាំងហាត់ប្រាណឱ្យបានទៀងទាត់។

ក្នុងឱកាសនោះ ស្ត្រី និងអ្នកចូលរួមក៏បានយល់ដឹងបន្ថែម ពីតួនាទីរបស់ក្រុមការងារឥស្សរជនឆ្នើមថ្នាក់ជាតិ ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា ក្នុងការដឹកនាំសកម្មភាពឆ្លើយតបបញ្ហាសុខភាពស្ត្រី កុមារ និងមេរោគអេដស៍នៅកម្ពុជា។

ដើម្បីរួមចំណែកលើកកម្ពស់ជីវភាព និងអាហារូបត្ថម្ភ ក្រុមការងារបានផ្តល់អំណោយមនុស្សធម៌ដល់ ស្ត្រីចំនួន៨នាក់ (ទទួលបានមុង សារ៉ុង កន្សែង ឈុតកូនង៉ា សាប៊ូ និងថវិកាមួយចំនួន) និងអ្នកផ្ទុកមេរោគអេដស៍ ចំនួន៥នាក់ (ទទួលបានអង្ករ ២៥គីឡូក្រាម មី ត្រីខ ឃីត និងថវិកាមួយចំនួន)។ លើសពីនេះ ក៏មានការឧបត្ថម្ភថវិកាជូនដល់គ្រូពេទ្យ យុវជនកាកបាទក្រហម និងកម្លាំងការពារសន្តិសុខ ទទួលបានសាប៊ូកក់សក់ «ក្លិន» ក្នុងម្នាក់១ដបផងដែរ៕