(ភ្នំពេញ)៖ លោក ប៊ុន ឈួន ប្រធានក្រុមប្រឹក្សាស្រុកតាំងគោក លោក ហាក់ ម៉ុងហួត អភិបាលស្រុកតាំងគោក នាថ្ងៃទី២៦ ខែមិថុនា ឆ្នាំ២០២៦នេះ បានដឹកនាំរៀបចំវេទិកាផ្សព្វផ្សាយ និងពិគ្រោះយោបល់ជូនដល់ប្រជាពលរដ្ឋនៅក្នុងឃុំចំនួនពីរ គឺ ឃុំស្រឡៅ និង ឃុំទ្រៀល ក្នុងគោលបំណងស្តាប់នូវរាល់ក្តីកង្វល់ បញ្ហាប្រឈម និងសំណូមពរនានា ដើម្បីស្វែងរកដំណោះស្រាយជូនប្រជាពលរដ្ឋនៅមូលដ្ឋាន។

វេទិកានេះបានប្រព្រឹត្តទៅដោយមានការអញ្ជើញចូលរួមពីសំណាក់សមាជិកក្រុមប្រឹក្សាស្រុក, គណៈអភិបាលស្រុក, ប្រធានការិយាល័យ- អង្គភាពជុំវិញស្រុក, អាជ្ញាធរឃុំ, មេភូមិ, កងកម្លាំងប្រដាប់អាវុធទាំងបីប្រភេទ និងបងប្អូនប្រជាពលរដ្ឋប្រមាណ ២៤២នាក់។

នៅក្នុងឱកាសនោះអង្គពិធីបានបើកឱកាសយ៉ាងទូលំទូលាយជូនដល់ប្រជាពលរដ្ឋក្នុងការលើកឡើងជាមតិយោបល់ សំណួរ និងសំណូមពរផ្ទាល់មាត់ ក៏ដូចជាតាមរយៈលិខិត ដែលភាគច្រើនផ្តោតទៅលើ ការអភិវឌ្ឍន៍ហេដ្ឋារចនាសម្ព័ន្ធ៖ ការជួសជុល និងស្ថាបនាផ្លូវលំជនបទ, ប្រព័ន្ធធារាសាស្ត្រ (ប្រឡាយទឹកសម្រាប់ធ្វើស្រែចំការ)។ សេវាសាធារណៈ៖ ការផ្តល់សេវារដ្ឋបាលនៅថ្នាក់ឃុំ និងស្រុកឱ្យកាន់តែលឿន និងមានប្រសិទ្ធភាព។សន្តិសុខ សណ្តាប់ធ្នាប់៖ ការពង្រឹងភូមិ-ឃុំមានសុវត្ថិភាព និងការបង្ក្រាបបញ្ហាគ្រឿងញៀន និងល្បែងស៊ីសង។

នាឱកាសនោះលោក ហាក់ ម៉ុងហួត បានធ្វើការបកស្រាយបំភ្លឺយ៉ាងក្បោះក្បាយទៅលើរាល់កង្វល់របស់ប្រជាពលរដ្ឋ, ចំពោះសំណើដែលអាចដោះស្រាយបានភ្លាមៗ គណៈអភិបាលស្រុកបានចាត់ចែងឱ្យមន្ត្រីជំនាញចុះអនុវត្តភ្លាម។ ចំណែកឯសំណើដែលហួសពីសមត្ថកិច្ចរបស់ស្រុក គណៈកម្មការរៀបចំវេទិកានឹងកត់ត្រាចូលក្នុងរបាយការណ៍ ដើម្បីស្នើសុំទៅថ្នាក់លើជួយដោះស្រាយបន្ត។

សូមបញ្ជាក់ដែរថា វេទិកាផ្សព្វផ្សាយ និងពិគ្រោះយោបល់នេះធ្វើឡើងស្របតាមច្បាប់ស្តីពីការគ្រប់គ្រងរដ្ឋបាលឃុំ ស្រុក ខណ្ឌ ដើម្បីធានាថា ប្រជាពលរដ្ឋទទួលបានព័ត៌មានពីការងារអភិវឌ្ឍន៍របស់ស្រុក, បង្កើនភាពស្និទ្ធស្នាល និងទំនុកចិត្តរវាងអាជ្ញាធរ និងប្រជាពលរដ្ឋ, ឆ្លើយតបទៅនឹងតម្រូវការជាក់ស្តែងរបស់មូលដ្ឋានតាមគោលការណ៍តម្លាភាព និងគណនេយ្យភាព។

ជាកិច្ចបញ្ចប់នាឱកាសនោះ លោក ប៊ុន ឈួន និងលោក ហាក់ ម៉ុងហួត បានថ្លែងអំណរគុណយ៉ាងជ្រាលជ្រៅចំពោះប្រជាពលរដ្ឋទាំងអស់ដែលបានចំណាយពេលចូលរួម និងផ្តល់មតិរិះគន់ដើម្បីស្ថាបនា ដែលនេះជាកត្តាជំរុញឱ្យស្រុកតាំងគោកកាន់តែមានការអភិវឌ្ឍរីកចម្រើនបន្ថែមទៀត៕