(ភ្នំពេញ)៖ លោក ផែ ច័ន្ទត្រាវុឌ្ឍ អគ្គនាយកឧស្សាហកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ថា ក្រសួងឧស្សាហកម្ម នឹងបន្តពង្រឹងវិធានការគាំទ្រ កែលម្អបរិយាកាសធុរកិច្ច និងជំរុញដំណើរការធ្វើទំនើបកម្មឧស្សាហកម្ម ឱ្យកាន់តែមានប្រសិទ្ធភាព។

ការគូសបញ្ជាក់បែបនេះ ធ្វើឡើងក្នុងឱកាសដែល លោក ផែ ច័ន្ទត្រាវុឌ្ឍ អញ្ជើញចូលរួមជាអធិបតីភាព ក្នុងកម្មវិធីសន្និសីទសារព័ត៌មាន ស្ដីពី មហាសន្និបាតអភិវឌ្ឍន៍ឧស្សាហកម្មកម្ពុជា និងពិព័រណ៍ឧស្សាហកម្ម កម្ពុជា-ចិន ឆ្នាំ២០២៦ នាព្រឹកថ្ងៃទី២៦ ខែមិថុនា ឆ្នាំ២០២៦។

លោក ផែ ច័ន្ទត្រាវុឌ្ឍ បានបញ្ជាក់យ៉ាងដូច្នេះថា «នៅពេលខាងមុខ ក្រសួងនឹងបន្តពង្រឹង ការដាក់ចេញនូវវិធានការគាំទ្រ កែលម្អបរិយាកាសធុរកិច្ច និងជំរុញដំណើរការ ធ្វើទំនើបកម្មឧស្សាហកម្ម ឱ្យកាន់តែមានប្រសិទ្ធភាព»។

បន្ថែមពីនោះទៀត លោក ផែ ច័ន្ទត្រាវុឌ្ឍ បានឲ្យដឹងថា ក្រសួងក៏ទន្ទឹងរង់ចាំ ធ្វើការជាមួយដៃគូជាតិ និងអន្តរជាតិបន្ថែមទៀត ដើម្បីរួមគ្នាជំរុញវិស័យឧស្សាហកម្មកម្ពុជា ឱ្យឈានទៅកាន់ ការអភិវឌ្ឍប្រកបដោយគុណភាពខ្ពស់ និងចីរភាព។

បើតាមលោក ផែ ច័ន្ទត្រាវុឌ្ឍ, បច្ចុប្បន្នកម្ពុជា កំពុងស្ថិតក្នុងដំណាក់កាលដ៏សំខាន់ នៃការធ្វើបរិវត្តកម្ម និងការធ្វើទំនើបកម្មវិស័យឧស្សាហកម្ម ប្រែក្លាយជាកម្លាំងចលករដ៏សំខាន់ ក្នុងការអភិវឌ្ឍសេដ្ឋកិច្ចជាតិ ប្រកបដោយចីរភាព។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចូលរួមយ៉ាងសកម្មក្នុងការជំរុញ និងធ្វើឱ្យប្រសើរឡើង នៃរចនាសម្ព័ន្ធឧស្សាហកម្ម ពង្រឹងកិច្ចសហប្រតិបត្តិការអន្តរជាតិ ដើម្បីទាក់ទាញ វិនិយោគគិន ដែលមានគុណភាពខ្ពស់ ឱ្យចូលមកវិនិយោគនៅកម្ពុជា។

ជាមួយគ្នានេះ លោក ផែ ច័ន្ទត្រាវុឌ្ឍ ក៏សូមកោតសរសើរយ៉ាងខ្លាំងចំពោះ សមាគមលើកកម្ពស់សេដ្ឋកិច្ចឧស្សាហកម្មកម្ពុជា ដែលបានខិតខំប្រឹងប្រែងយ៉ាងសកម្ម ក្នុងការជំរុញកិច្ចសហប្រតិបត្តិការ វិស័យឧស្សាហកម្មរវាងកម្ពុជា-ចិន។

លោក Allen Lee ប្រធានសមាគមលើកកម្ពស់សេដ្ឋកិច្ចឧស្សាហកម្មកម្ពុជា បានឲ្យដឹងថា ការរៀបចំសន្និសីទសារព័ត៌មាននៅថ្ងៃនេះ គឺជាការបើកទំព័រថ្មីមួយសម្រាប់ ពិព័រណ៍ឧស្សាហកម្មកម្ពុជាឆ្នាំ២០២៦។

ក្នុងនាមសមាគម លោក Allen Lee សូមថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំក្រសួងឧស្សាហកម្ម និងស្ថាប័នរដ្ឋពាក់ព័ន្ឋទាំងអស់ ដែលបានផ្តល់ការគាំទ្រ និងការណែនាំដ៏មានតម្លៃ។ លោកក៏សូមស្វាគមន៍យ៉ាងកក់ក្តៅចំពោះសហគ្រាស និងតំណាងអ្នកតាំងពិព័រណ៍ទាំងអស់ ដែលបានធ្វើដំណើរមកពីទីជិតទីឆ្ងាយ។

បើតាមលោក Allen Lee, សមាគមលើកកម្ពស់សេដ្ឋកិច្ចឧស្សាហកម្មកម្ពុជា គឺជាស្ថាប័នដែលបានចុះបញ្ជី ស្របច្បាប់ក្រោមក្រសួងមហាផ្ទៃ។ គោលបំណង នៃការបង្កើតសមាគម គឺដើម្បីក្លាយជាស្ពានតភ្ជាប់ដ៏សំខាន់ សម្រាប់កិច្ចសហប្រតិបត្តិការ ឧស្សាហកម្មរវាងកម្ពុជា និងចិន។

សូមជម្រាបថា សមាគមលើកកម្ពស់សេដ្ឋកិច្ចឧស្សាហកម្មកម្ពុជា គ្រោងនឹងរៀបចំ «មហាសន្និបាតអភិវឌ្ឍន៍ឧស្សាហកម្មកម្ពុជា និងពិព័រណ៍ឧស្សាហកម្មកម្ពុជា-ចិន ឆ្នាំ២០២៦» នៅថ្ងៃទី១៧ និងទី១៨ ខែកក្កដា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍អន្តរជាតិកោះពេជ្រ រាជធានីភ្នំពេញ។

ព្រឹត្តិការណ៍នេះ គឺជាវេទិកាឧស្សាហកម្ម ដ៏មានសារៈសំខាន់ ដែលនឹងបង្កើតឱកាសសម្រាប់សហគ្រាស ក្នុងការផ្លាស់ប្តូរ បទពិសោធន៍ ពង្រឹងកិច្ចសហប្រតិបត្តិការ ជំរុញការផ្ទេរបច្ចេកវិទ្យា និងការចែករំលែកធនធាន។ ទន្ទឹមនឹងនេះ វាក៏នឹងរួមចំណែកលើកកម្ពស់តួនាទី និងភាពប្រកួតប្រជែងរបស់កម្ពុជា ក្នុងខ្សែសង្វាក់ ឧស្សាហកម្ម និងខ្សែសង្វាក់ផ្គត់ផ្គង់ក្នុងតំបន់ផងដែរ។

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សូមប្រកាសគាំទ្រយ៉ាងពេញទំហឹងចំពោះ ការរៀបចំព្រឹត្តិការណ៍នេះ និងសូមលើកទឹកចិត្តដល់សហគ្រាសទាំងក្នុង និងក្រៅប្រទេសឱ្យចូលរួមយ៉ាងសកម្ម៕