(សាធារណរដ្ឋកូរ៉េ)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅព្រឹកថ្ងៃទី២៥ ខែមិថុនា ឆ្នាំ២០២៦ បានទទួលជួបពិភាក្សា និងសំណេះសំណាល ជាមួយតំណាងក្រុមហ៊ុនកម្ពុជាចំនួន៤ ដែលកំពុងចូលរួមតាំងពិព័រណ៍ផលិតផលខ្មែរនៅទីក្រុងសេអ៊ូល ដើម្បីស្តាប់ការចែករំលែកបទពិសោធន៍ បញ្ហាប្រឈម និងពិភាក្សាអំពីការជំរុញឱកាសនាំផលិតផលកម្ពុជា ចូលទីផ្សារសាធារណរដ្ឋកូរ៉េ។

ជំនួបនេះ ធ្វើឡើងនៅស្ថានទូតកម្ពុជាប្រចាំសាធារណរដ្ឋកូរ៉េ ដោយមានការចូលរួមពីតំណាងក្រុមហ៊ុនចំនួន៤ រួមមាន៖ ១៖ TL AGRI FOOD, ២៖ AWESOME PICK, ៣៖ MAYANY ENTERPRISE និង៤៖ ក្រុមហ៊ុន SEPAKAM PONLEI THAMACHEAT ក្នុងឱកាសដែលក្រុមហ៊ុនទាំងនេះចូលរួមពិព័រណ៍ផលិតផលខ្មែរ ក្នុងកម្មវិធីចំនួន២ គឺ «ASEAN PANORAMA» ដែលរៀបចំដោយមជ្ឈមណ្ឌលអាស៊ាន-កូរ៉េ (ASEAN-Korea Center: AKC) និង «Korea Import Expo 2026» ដែលរៀបចំដោយសមាគមអ្នកនាំចូលកូរ៉េ (Korea Importers Association: KOIMA)។

ក្នុងជំនួបនេះ លោក ឃួន ផុនរតនៈ បានស្តាប់ការចែករំលែកបទពិសោធន៍ និងបញ្ហាប្រឈមពីតំណាងក្រុមហ៊ុន ដែលបានមកចូលរួមពិព័រណ៍នៅសាធារណរដ្ឋកូរ៉េដោយផ្ទាល់ ព្រមទាំងស្វែងយល់ពីបំណងរបស់ក្រុមហ៊ុន ក្នុងការស្វែងរកដៃគូវិនិយោគ និងដៃគូពាណិជ្ជកម្មជាមួយក្រុមហ៊ុនកូរ៉េ ដើម្បីពង្រីកការនាំផលិតផលកម្ពុជាចូលទីផ្សារកូរ៉េ។

ក្នុងឱកាសនោះ តំណាងក្រុមហ៊ុនទាំង៤ បានថ្លែងអំណរគុណដល់ស្ថានទូតកម្ពុជា ប្រចាំសាធារណរដ្ឋកូរ៉េ ដែលបានជួយសម្របសម្រួលឱ្យក្រុមហ៊ុនអាចចូលរួមកម្មវិធីពិព័រណ៍ទាំងពីរ និងបានបង្ហាញនូវក្ដីរីករាយ ដែលមានឱកាសនាំយកផលិតផលរបស់ខ្លួនទៅផ្សព្វផ្សាយដល់អ្នកប្រើប្រាស់នៅប្រទេសកូរ៉េ ឱ្យបានស្គាល់កាន់តែទូលំទូលាយ ព្រមទាំងបង្កើនឱកាសក្នុងការនាំចូលផលិតផល ទៅកាន់ទីផ្សារកូរ៉េ។

តំណាងក្រុមហ៊ុនក៏បានលើកឡើងថា ការចូលរួមពិព័រណ៍អន្តរជាតិនេះ បានផ្ដល់ឱកាសឱ្យពួកគេបានទស្សនា និងសិក្សាពីការរៀបចំស្តង់ និងការបង្ហាញផលិតផលរបស់បណ្តាប្រទេសផ្សេងៗ ដើម្បីយកបទពិសោធន៍មកកែលម្អគុណភាពផលិតផល និងការរៀបចំស្តង់របស់កម្ពុជាឱ្យកាន់តែមានភាពទាក់ទាញនៅក្នុងព្រឹត្តិការណ៍នាពេលខាងមុខ។

ជាចុងក្រោយ តំណាងក្រុមហ៊ុនបានស្នើសុំឱ្យមានឱកាសចូលរួមពិព័រណ៍អន្តរជាតិកាន់តែច្រើននាពេលខាងមុខ ដើម្បីបង្កើនការទទួលស្គាល់ផលិតផលកម្ពុជា ក្នុងចំណោមអ្នកប្រើប្រាស់កូរ៉េ ព្រមទាំងបានស្នើឱ្យស្ថាប័នពាក់ព័ន្ធរៀបចំវេទិកាផ្លាស់ប្តូរយោបល់អំពីបញ្ហាប្រឈម និងដំណោះស្រាយក្នុងការនាំផលិតផលកម្ពុជាចេញទៅកាន់ទីផ្សារអន្តរជាតិ៕