សន្តិបណ្ឌិត ឡូយ សុផាត អញ្ជើញចុះពិនិត្យរោងចក្រផលិតចំណីសត្វ និងកសិដ្ឋានចិញ្ចឹមសត្វរបស់ក្រុមហ៊ុន ម៉ុង ឫទ្ធី គ្រុប នៅខេត្តព្រះសីហនុ
26-06-2026 14:27
(ព្រះសីហនុ)៖ សន្តិបណ្ឌិត ឡូយ សុផាត ប្រធានគណៈកម្មការទី៣ នៃរដ្ឋសភា នាព្រឹកថ្ងៃទី២៥ ខែមិថុនា ឆ្នាំ២០២៦ បានដឹកនាំគណៈប្រតិភូសមាជិក និងសមាជិកាគណៈកម្មការទី៣ អញ្ជើញចុះពិនិត្យ និងសិក្សាស្វែងយល់អំពីការគ្រប់គ្រង ការដឹកនាំ និងការអនុវត្តបច្ចេកទេសកសិកម្មទំនើបនៅរោងចក្រផលិតចំណីសត្វ អិមភីក (M's Pig ACMC) ដែលស្ថិតនៅភូមិមនោរម្យ ឃុំតានៃ ស្រុកព្រៃនប់ និងកសិដ្ឋានចិញ្ចឹមត្រី និងកសិដ្ឋានពាណិជ្ជកម្ម អិមភិក ទី៣ (ចិញ្ចឹមជ្រូក) នៅភូមិអន្លង់ក្រពើ ឃុំតានៃស្រុកព្រៃនប់ ខេត្តព្រះសីហនុ។
ក្នុងឱកាសនោះ ឧកញ៉ា ម៉ុង ចាន់ថុល អគ្គនាយករងក្រុមហ៊ុន ម៉ុង ឫទ្ធី គ្រុប បានស្វាគមន៍និងធ្វើបទបង្ហាញអំពីសកម្មភាពនិងសមិទ្ធផលសំខាន់ៗរបស់ក្រុមហ៊ុនក្នុងវិស័យកសិកម្មនិងបសុសត្វជូនដល់គណៈប្រតិភូរដ្ឋសភា។
រោងចក្រផលិតចំណីសត្វ អិមភីក(M's Pig ACMC) ជាសមិទ្ធផលដ៏សំខាន់មួយក្នុងការអភិវឌ្ឍវិស័យកសិកម្មនិងបសុសត្វនៅកម្ពុជា។រោងចក្រនេះផលិតចំណីសត្វដែលមានគុណភាពខ្ពស់សម្រាប់ជ្រូក ត្រី មាន់ និងសត្វចិញ្ចឹមផ្សេងៗ ដោយប្រើប្រាស់វត្ថុធាតុដើមប្រមូលទិញពីប្រជាកសិករក្នុងស្រុក។ ក្រៅពីរួមចំណែកធានាគុណភាពផលិតកម្មបសុសត្វ រោងចក្រនេះក៏បានជួយបង្កើតទីផ្សារសម្រាប់ផលិតផលកសិកម្មក្នុងស្រុក និងលើកកម្ពស់ជីវភាពប្រជាកសិករផងដែរ។
ដោយឡែក កសិដ្ឋានចិញ្ចឹមជ្រូក និងចិញ្ចឹមត្រីរបស់ក្រុមហ៊ុន ត្រូវបានវិនិយោគ និងគ្រប់គ្រងតាមបច្ចេកវិទ្យាទំនើប ស្របតាមស្តង់ដារអន្តរជាតិ ដើម្បីធានាគុណភាព សុវត្ថិភាព និងប្រសិទ្ធភាពនៃផលិតកម្ម។
កសិដ្ឋានចិញ្ចឹមជ្រូក M's Pig ACMC ត្រូវបានគេទទួលស្គាល់ថាជាកសិដ្ឋានបង្កាត់ពូជជ្រូកដ៏ធំមួយនៅកម្ពុជា ខណៈការចិញ្ចឹមត្រីក៏ជាផ្នែកមួយដ៏សំខាន់នៃខ្សែច្រវាក់ផលិតកម្មកសិកម្មរួម ដែលជួយបង្កើនការផ្គត់ផ្គង់ផលិតផលក្នុងស្រុក និងកាត់បន្ថយការពឹងផ្អែកលើការនាំចូល។
ដំណើរទស្សនកិច្ចនេះ ឆ្លុះបញ្ចាំងពីការយកចិត្តទុកដាក់របស់គណៈកម្មការទី៣ នៃរដ្ឋសភា ក្នុងការតាមដានស្ថានភាពជាក់ស្តែង និងជំរុញការអភិវឌ្ឍវិស័យកសិកម្មកម្ពុជាឱ្យកាន់តែមាននិរន្តរភាព និងសមត្ថភាពប្រកួតប្រជែងខ្ពស់។
ក្នុងឱកាសចុះពិនិត្យ និងសិក្សាស្វែងយល់នេះ សន្តិបណ្ឌិត ឡូយ សុផាត ប្រធានគណៈកម្មការទី៣ នៃរដ្ឋសភា បានវាយតម្លៃខ្ពស់ចំពោះការវិនិយោគ និងការអភិវឌ្ឍរបស់ក្រុមហ៊ុន ម៉ុង ឫទ្ធី គ្រុប ក្នុងវិស័យកសិកម្ម និងបសុសត្វដែលបានអនុវត្តបច្ចេកវិទ្យាទំនើបស្របតាមស្តង់ដារគុណភាពនិងសុវត្ថិភាព។
លោកបានមានប្រសាសន៍ថា៖ ការអភិវឌ្ឍខ្សែច្រវាក់ផលិតកម្មកសិកម្មចាប់ពីការផលិតចំណីសត្វ ការបង្កាត់ពូជ ការចិញ្ចឹម រហូតដល់ការផ្គត់ផ្គង់ទីផ្សារ គឺជាគំរូដ៏ល្អមួយដែលរួមចំណែកលើកកម្ពស់សន្តិសុខស្បៀង បង្កើតការងារ បង្កើនប្រាក់ចំណូលដល់ប្រជាពលរដ្ឋ និងជំរុញកំណើនសេដ្ឋកិច្ចជាតិ។
លោកសន្តិបណ្ឌិត ក៏បានលើកទឹកចិត្តឱ្យក្រុមហ៊ុនបន្តពង្រីកការវិនិយោគ ការផ្ទេរបច្ចេកទេស និងការសហការជាមួយប្រជាកសិករ ដើម្បីលើកកម្ពស់ផលិតភាព គុណភាព និងការប្រកួតប្រជែងនៃផលិតផលកសិកម្មកម្ពុជា ទាំងក្នុងទីផ្សារក្នុងស្រុក និងអន្តរជាតិ ស្របតាមគោលនយោបាយរបស់រាជរដ្ឋាភិបាលក្នុងការអភិវឌ្ឍវិស័យកសិកម្មប្រកបដោយនិរន្តរភាព៕
