(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានថ្លែងជំរុញឱ្យមន្ត្រីឆ្មបទាំងអស់ បន្តពង្រឹងសមត្ថភាពវិជ្ជាជីវៈ និងលើកកម្ពស់គុណភាពសេវាថែទាំមាតា និងទារក ដើម្បីអនុវត្តន៍ដោយប្រសិទ្ធភាព សំដៅចូលរួមចំណែកកាត់បន្ថយអត្រាមរណៈភាពមាតា និងទារក។

ការថ្លែងណែនាំរបស់លោកវេជ្ជបណ្ឌិត គួង ឡូ ធ្វើឡើងក្នុងឱកាសដែលលោកអញ្ជើញដឹកនាំកិច្ចប្រជុំក្រុមសម្របសម្រួល និងសម្ព័ន្ធភាពឆ្មប (M-CAT Meeting) ដែលរៀបចំឡើងនាព្រឹកថ្ងៃទី២៦ ខែមិថុនា ឆ្នាំ២០២៦ នៅសាលប្រជុំធំ នៃមន្ទីរសុខាភិបាលខេត្តព្រះវិហារ ដោយមានការចូលរួមពីមន្ត្រីឆ្មប និងបុគ្គលិកសុខាភិបាលដែលកំពុងបម្រើការនៅតាមមន្ទីរពេទ្យ មណ្ឌលសុខភាព និងប៉ុស្តិ៍សុខភាពក្នុងខេត្ត។

នៅក្នុងកិច្ចប្រជុំនោះ លោកវេជ្ជបណ្ឌិត គួង ឡូ បានថ្លែងផ្តល់អនុសាសន៍សំខាន់ៗ ដោយណែនាំឱ្យមន្ត្រីឆ្មបទាំងអស់ យកចិត្តទុកដាក់រៀបចំបន្ទប់សម្រាលកូន និងបន្ទប់ថែទាំមុនសម្រាលឱ្យមានភាពស្អាត មានអនាម័យ និងសុវត្ថិភាព។ ជាមួយគ្នានេះ ត្រូវស្លៀកពាក់ឯកសណ្ឋានឆ្មបឱ្យបានត្រឹមត្រូវ ស្អាត និងសមរម្យ ស្របតាមវិជ្ជាជីវៈ។

លោកប្រធានមន្ទីរ ក៏បានណែនាំឱ្យពង្រឹងការកត់ត្រា Partograph ឱ្យបានទាំងបរិមាណ និងគុណភាព ដើម្បីតាមដានដំណើរការសម្រាលកូនឱ្យមានប្រសិទ្ធភាព។ ទន្ទឹមនឹងនេះ មន្ត្រីឆ្មបត្រូវសិក្សា និងវាយតម្លៃស្ថានភាពសុខភាពរបស់ស្ត្រីមានផ្ទៃពោះ ឱ្យបានគ្រប់ជ្រុងជ្រោយ ក្នុងពេលមកទទួលសេវាពិនិត្យថែទាំមុនសម្រាល (ANC) រួមមាន៖

* ប្រវត្តិមានផ្ទៃពោះ និងការសម្រាលកូនកន្លងមក
* ប្រវត្តិសុខភាពរបស់ម្តាយ
* កត្តាហានិភ័យអំឡុងពេលមានផ្ទៃពោះ *កត្តាសង្គម និងការត្រៀមសម្រាប់ការសម្រាល
* ការវាយតម្លៃស្ថានភាពការមានផ្ទៃពោះ ដើម្បីអាចរកឃើញហានិភ័យ និងផ្តល់ការថែទាំបានទាន់ពេលវេលា។

ជាពិសេស លោកវេជ្ជបណ្ឌិត គួង ឡូ ក៏បានថ្លែងណែនាំបន្ថែមឱ្យ មន្ទីរពេទ្យបង្អែកខេត្ត ១៦ មករា ខេត្តព្រះវិហារ រៀបចំដាក់ឱ្យដំណើរការ សេវាសម្រាលកូនដោយគ្មានការឈឺចាប់ (Painless Delivery/Accouchement sans douleur) ដើម្បីជាជម្រើសសម្រាប់ស្ត្រីមានផ្ទៃពោះ និងរួមចំណែកលើកកម្ពស់គុណភាពសេវាសម្ភពឱ្យកាន់តែទំនើប និងមានប្រសិទ្ធភាព។

ជាមួយគ្នានេះ លោក គួង ឡូ ក៏បានថ្លែងណែនាំផងដែរ ដល់មណ្ឌលសុខភាពឆែប (ស្ថិតក្នុងស្រុកឆែប) និងមណ្ឌលសុខភាពច្រាច់ (ស្ថិតក្នុងស្រុកជ័យសែន) ដែលក្រុមការងារមន្ទីរសុខាភិបាលខេត្ត បានចុះធ្វើការពិនិត្យផ្ទៃពោះដោយម៉ាសុីនអេកូសាស្ត្រ ដល់ស្ត្រីមានផ្ទៃពោះនៅតំបន់ដាច់ស្រយាលកន្លងមក សូមមណ្ឌលសុខភាពទាំង២ធ្វើការទំនាក់ទំនង ជាមួយស្ត្រីមានផ្ទៃពោះឱ្យជាប់ ដើម្បីឱ្យគាត់បានមកពិនិត្យផ្ទៃពោះទៀតទាត់ និងដើម្បីមកសម្រាលនៅមណ្ឌលសុខភាព ឬមន្ទីរពេទ្យ។

លោកវេជ្ជបណ្ឌិតប្រធានមន្ទីរសុខាភិបាលខេត្តព្រះវិហារ បានថ្លែងបញ្ជាក់ថា អនុសាសន៍ទាំង៥នេះ ត្រូវបានពន្យល់លម្អិត និងលើកឧទាហរណ៍ជាក់ស្តែង ដើម្បីឱ្យមន្ត្រីឆ្មបទាំងអស់ អាចយកទៅអនុវត្តបានត្រឹមត្រូវ និងមានប្រសិទ្ធភាព សំដៅកាត់បន្ថយហានិភ័យក្នុងពេលមានផ្ទៃពោះ និងសម្រាលកូន ព្រមទាំងលើកកម្ពស់សុខុមាលភាពរបស់មាតា និងទារកនៅទូទាំងខេត្តព្រះវិហារ៕