អគ្គនាយកដ្ឋានគយ និងរដ្ឋាករកម្ពុជា ផ្សព្វផ្សាយពីការគ្រប់គ្រង ការលើកទឹកចិត្តពន្ធ និងអាករ ជាលើកទី១ ប្រចាំឆ្នាំ២០២៦
26-06-2026 14:44
(ភ្នំពេញ)៖ លោក ប៊ុន ជីវ ប្រធាននាយកដ្ឋានរបបគយ និងលោកបណ្ឌិត ឈន វឿន នាយកសាលាជាតិគយ តំណាងលោកបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានអញ្ជើញជាអធិបតីភាព ក្នុងសិក្ខាសាលាផ្សព្វផ្សាយ ស្ដីពី «ការគ្រប់គ្រងការលើកទឹកចិត្តពន្ធ និងអាករ» នៅសាលាជាតិគយ នៃអគ្គនាយកដ្ឋានគយ និងរដ្ឋាករកម្ពុជា នាថ្ងៃទី២៣ ខែមិថុនា ឆ្នាំ២០២៦។
សិក្ខាសាលានេះ រៀបចំឡើងជាលើកទី១ ប្រចាំឆ្នាំ២០២៦ អនុលោមតាមផែនការសកម្មភាព ឆ្នាំ២០២៦ របស់អគ្គនាយកដ្ឋានគយ និងរដ្ឋាករកម្ពុជា ក្រោមកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ (PFM) ដំណាក់កាលទី៤ សម្រាប់មន្រ្តីគយនិងរដ្ឋាករ សរុបប្រមាណជាង ១០០ រូប ដើម្បីផ្សព្វផ្សាយនូវបទប្បញ្ញត្តិ ពាក់ព័ន្ធនឹងការលើកទឹកចិត្តពន្ធគយនិងអាករ សម្រាប់គម្រោងវិនិយោគមានលក្ខណៈសម្បត្តិគ្រប់គ្រាន់ ការអនុវត្តវិធានការមុតស្រួចក្នុងការបង្ការនិងបង្រ្កាបបទល្មើស និងការរៀបចំទិន្នន័យចំណាយសារពើពន្ធ ស្របតាមច្បាប់និងបទប្បញ្ញត្តិជាធរមាន។
ថ្លែងក្នុងពិធីបើកសិក្ខាសាលា លោក ប៊ុន ជីវ បានជម្រាបជូនអង្គសិក្ខាសាលាទំាងមូលអំពីវឌ្ឍនភាពថ្មីៗ ពាក់ព័ន្ធនឹងការផ្តល់ការលើកទឹកចិត្តពន្ធគយ និងអាករសម្រាប់គម្រោងវិនិយោគ ស្របតាមច្បាប់ និងបទប្បញ្ញត្តិពាក់ព័ន្ធនឹងការវិនិយោគ ដែលអគ្គនាយកដ្ឋានគយនិងរដ្ឋាករកម្ពុជា បាននិងកំពុងចូលរួមយ៉ាងសកម្មក្នុងការពិនិត្យនិងផ្តល់យោបល់លើការស្នើសុំការលើកទឹកចិត្ត ពន្ធនិងអាករនេះ នៅគ្រប់ដំណាក់កាល។
ជាមួយគ្នានេះ គម្រោងវិនិយោគមួយចំនួន ក៏បានទទួលការលើកទឹកចិត្ត ក្នុងក្របខ័ណ្ឌអនុគណៈកម្មាធិការវិនិយោគរាជធានី-ខេត្តផងដែរ។
ដើម្បីគាំទ្រដល់ ការគ្រប់គ្រងការលើកទឹកចិត្តនេះ ប្រកបដោយប្រសិទ្ធភាព អគ្គនាយកដ្ឋានគយនិងរដ្ឋាករកម្ពុជា បានបន្តផ្សព្វផ្សាយបទប្បញ្ញត្តិ និងវិធានការចំបាច់នានា ដល់វិស័យឯកជននិងក្រសួង-ស្ថាប័នពាក់ព័ន្ធ និងបានបន្តអភិវឌ្ឍ និងកែលម្អប្រព័ន្ធបច្ចេកវិទ្យាព័ត៌មាន សម្រាប់គាំទ្រកិច្ចដំណើរការបំពេញបែបបទបញ្ចេញទំនិញពីគយ ឱ្យកាន់តែមានភាពទុកចិត្តបាន រហ័ស សុវត្ថិភាព តម្លាភាព និងមិនផ្តល់បន្ទុកបន្ថែមដល់វិស័យឯកជន ក្នុងគោលដៅចូលរួមលើកកម្ពស់កិច្ចសម្រួលពាណិជ្ជកម្មបន្ថែមទៀត, កាត់បន្ថយ ចំណាយឡូជីស្ទីក និងកែលម្អបរិយាកាសធុរកិច្ចនៅកម្ពុជា ក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
ក្នុងបរិការនៃស្ថានភាពសេដ្ឋកិច្ច និងសង្គម មានការប្រែប្រួលដោយមិនអាចប៉ាន់ប្រមាណបាន ដោយកើតចេញពីវិបត្តិជាសកលនោះផងដែរ បានតម្រូវឱ្យអគ្គនាយកដ្ឋានគយ និងរដ្ឋាករកម្ពុជា ដាក់ចេញនូវវិធានការមុតស្រូច ក្នុងការបង្រ្កាបអំពើរត់គេចពន្ធ និងកែលម្អអភិបាលកិច្ចក្នុងរដ្ឋបាលគយ ក្នុងន័យដើម្បីពង្រឹងប្រសិទ្ធភាពនៃ
ការប្រមូលចំណូលជូនរដ្ឋ និងបង្កើនកិច្ចសម្រួលពាណិជ្ជកម្ម ដែលជាកាតព្វកិច្ច ត្រូវចូលរួមអនុវត្តដោយគ្រប់អង្គភាពគយ និងរដ្ឋាករ និងវិស័យឯកជនពាក់ព័ន្ធ។
ជាលទ្ធផលនៃអង្គសិក្ខាសាលា តាមរយៈសំណួរ និងចម្លើយយ៉ាងផុសផុល សិក្ខាកាមទាំងមូលបានទទួលនូវចំណេះបន្ថែមលើប្រធានបទសំខាន់ៗដូចជា៖ * ការលើកទឹកចិត្តពន្ធគយ និងអាករ សម្រាប់គម្រោងវិនិយោគក្រោមក្របខ័ណ្ឌច្បាប់វិនិយោគ និងអនុក្រឹត្យ ពាក់ព័ន្ធនឹងការអនុវត្តច្បាប់វិនិយោគ,
* នីតិវិធីត្រួតពិនិត្យបញ្ជីមេមុខទំនិញស្នើសុំការលើកទឹកចិត្តរបស់គម្រោងវិនិយោគ,
* កិច្ចដំណើរការស្នើសុំលិខិតអនុញ្ញាតគយ តាមប្រព័ន្ធបញ្ជរតែមួយជាតិ,
* ការពង្រឹងប្រសិទ្ធភាពនៃការគ្រប់គ្រងការលើកទឹកចិត្តពន្ធគយ,
* ការកត់ត្រាទិន្នន័យចំណាយសារពើពន្ធ ជាពិសេសការពង្រឹងការអនុវត្តវិធានការមុតស្រួចរបស់អគ្គនាយកដ្ឋានគយ និងរដ្ឋាករកម្ពុជា៕
