(ក្វាងចូវ)៖ ឆ្លៀតក្នុងឱកាសបំពេញទស្សនកិច្ចសិក្សា នៅសាធារណរដ្ឋប្រជាមានិតចិន លោកបណ្ឌិត អូស្មាន ហាស្សន់ ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញទស្សនកិច្ចនៅក្រុមហ៊ុន គ័ងទុង នីអូហ្វាម័រ ប៉ូលីត្រុន ថេកណូឡជីស អ៉ីនឃ័រ (Guangdong Neofarmer Polytron Technologies Inc.) នៅរសៀលថ្ងៃទី២៥ ខែមិថុនា ឆ្នាំ២០២៦ ក្នុងគោលបំណងសិក្សាស្វែងយល់ពីខ្សែច្រវាក់ផលិតកម្មទំនើប និងស្វែងរកឱកាសកិច្ចសហប្រតិបត្តិការ។

ក្រុមហ៊ុននេះ គឺជាអ្នកផលិត និងកែច្នៃផលិតផលម្ហូបអាហារដ៏មានសក្តានុពល ដោយមានសមត្ថភាពផលិតទំនិញរហូតដល់ទៅជាង ៦,០០០ មុខ សម្រាប់ផ្គត់ផ្គង់ទៅឱ្យក្រុមហ៊ុនលំដាប់អន្តរជាតិធំៗ ដូចជា ក្រុមហ៊ុន Nestlé ក្រុមហ៊ុនអាកាសចរណ៍ China Southern និងក្រុមហ៊ុនធំៗផ្សេងទៀត។ នៅក្នុងខ្សែច្រវាក់ផលិតកម្មរបស់ខ្លួន ក្រុមហ៊ុននេះបានធ្វើការយ៉ាងជិតស្និទ្ធជាមួយកសិករ តាមរយៈការប្រមូលទិញកសិផលចម្រុះ រួមមាន បន្លែបង្ការ និងសាច់សត្វ (មាន់ ទា ក្ងាន ត្រី សាច់) ដើម្បីយកមកកែច្នៃ។

ដំណើរទស្សនកិច្ចនេះ ក៏មានការអញ្ជើញចូលរួមពីម្ចាស់រោងចក្រ រួមទាំងមានការចូលរួមពីបណ្ដាសហគ្រិនផ្សេងៗទៀតផងដែរ។ ក្នុងចំណោមនោះ ក៏មានវត្តមានសហគ្រិនដែលជាម្ចាស់រោងចក្រ ផលិតផលិតផលការពារបរិស្ថានដ៏ធំមួយ ហើយជាអាជីវកម្មដ៏មានសក្តានុពលខ្ពស់ ដោយអាចរកចំណូលបានរហូតដល់រាប់ពាន់លានដុល្លារក្នុងមួយឆ្នាំៗ។

ឆ្លៀតក្នុងឱកាសនេះ លោកទេសរដ្ឋមន្ត្រី បានជម្រាបជូនបណ្តាវិនិយោគិនចិន អំពីសក្តានុពលដ៏សម្បូរបែបរបស់កម្ពុជា ដែលអាចផ្តល់នូវឱកាសក្នុងការវិនិយោគលើវិស័យជាច្រើន រួមមាន កសិកម្ម សុខាភិបាល បច្ចេកវិទ្យា ទេសចរណ៍ និងឧស្សាហកម្មហាឡាល ជាដើម។ លោកក៏បានលើកឡើងថា រាជរដ្ឋាភិបាលកម្ពុជា បានដាក់ចេញនូវគោលនយោបាយលើកទឹកចិត្តការវិនិយោគជាច្រើន ដោយផ្តល់នូវការអនុគ្រោះពន្ធ មានច្បាប់ធានា និងការពារវិនិយោគិនយ៉ាងច្បាស់លាស់ ព្រមទាំងផ្តល់អត្ថប្រយោជន៍ និងបរិយាកាសវិនិយោគប្រកបដោយស្ថិរភាព សន្តិសុខ និងភាពអំណោយផល សម្រាប់វិនិយោគិនបរទេស។

បណ្តាវិនិយោគិនចិន និងតំណាងក្រុមហ៊ុនខាងលើ បានសម្តែងនូវការចាប់អារម្មណ៍យ៉ាងខ្លាំងចំពោះបរិយាកាសវិនិយោគនៅកម្ពុជា និងបានបង្ហាញបំណងក្នុងការបញ្ជាទិញផលិតផលកសិកម្មពីកម្ពុជា ដើម្បីយកទៅបំពេញតម្រូវការខ្សែច្រវាក់ផលិតកម្មរបស់ខ្លួននាពេលខាងមុខផងដែរ៕