(ស្វាយរៀង)៖ កម្លាំង​គណៈបញ្ជាការឯកភាពរដ្ឋបាលខេត្តស្វាយរៀង បានចុះ​ធ្វើ​រដ្ឋ​បាល ស្រាវជ្រាវទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)​ ចំនួន៥តាំងនៅក្រុងបាវិត រកឃើញជនបរទេសគ្មានលិខិត ឆ្លងដែនចំនួន ១១នាក់។

ប្រតិបត្តិការនេះ បានធ្វើឡើងក្រោមការបញ្ជាពីលោក ប៉េង ពោធិ៍សា អភិបាលខេត្តស្វាយរៀង និង​លោក​ឧត្ដមសេនីយ៍​ទោ​ ពេជ្រ​ វីរៈ​ ស្នងការ​នគរបាល​ខេត្ត​ស្វាយរៀង។

សមត្ថកិច្ចនគរបាលក្រុងបាវិតបានឲ្យដឹងថាកាលពីថ្ងៃទី២៤ ខែមិថុនា ឆ្នាំ២០២៦ លោក សេង សីលា អភិបាលរងខេត្ត និងលោក ម៉ែន ចាន់រ៉ា អភិបាលក្រុងបាវិត បានដឹកនាំកម្លាំងចម្រុះ និងកម្លាំងគណៈបញ្ជាការឯកភាពក្រុង ចុះត្រួតពិនិត្យ និងធ្វើរដ្ឋបាលបើកចំហ តាមបណ្ដាសណ្ឋាគារ ផ្ទះសំណាក់ វីឡា និងបន្ទប់ជួលស្នាក់នៅ ចំនួន៥ ទីតាំង ជាលទ្ធផល ក្រុមការងារ បានពិនិត្យឃើញមានជនបរទេសសរុបចំនួន ១៨នាក់ មាន២សញ្ជាតិ។

ផ្សាររាត្រី បាវិត ២៤អេច ឯ.ក ស្ថិតនៅភូមិបាវិតកណ្ដាល សង្កាត់បាវិត៖

*ទីតាំងទី១ ហាងអាហារសម្រន់ និងកាហ្វេពេលព្រឹក មានជនជាតិវៀតណាម ចំនួន ៣នាក់ *ទីតាំងទី២ ហាងលាង និងតុបតែងរថយន្ត មានជនជាតិវៀតណាម ចំនួន ១នាក់។
*ទីតាំងទី៣ តូប C7 មានជនជាតិចិន ចំនួន ២នាក់ សម្រាប់ទីតាំងទាំង៣ខាងលើ ជនបរទេស មានលិខិតឆ្លងដែន និងទិដ្ឋាការមានសុពលភាពត្រឹមត្រូវ។
*ទីតាំងទី៤ បន្ទប់ជួល របស់លោកស្រី សួន អានី ស្ថិតនៅភូមិតាបឹប សង្កាត់បាវិត មានជនបរទេសស្នាក់នៅ ចំនួន៨នាក់ និងគ្មានលិខិតឆ្លងដែន ចំនួន ៧នាក់។
*ទីតាំងទី៥ បន្ទប់ជួល របស់លោកស្រី ជៃ សោភា ស្ថិតនៅភូមិតាបឹប សង្កាត់បាវិត មានជនបរទេសស្នាក់នៅ ចំនួន ៤នាក់ គ្មានលិខិតឆ្លងដែន ជនបរទេសទាំង ១១នាក់ ដែលគ្មានលិខិតឆ្លងដែនសមត្ថកិច្ចបានបញ្ជូន ទៅកាន់អធិការដ្ឋាននគរបាលក្រុងបាវិត ដើម្បីបន្តនីតិវិធី។

ចំពោះការចុះធ្វើរដ្ឋបាលចំហនេះដោយមានការចូលរួមពី លោក ស្នងការរងខេត្ត លោក អភិបាលរងក្រុង លោក អធិការនគរបាលក្រុង លោក អធិការរងនគរបាលក្រុង លោក នាយយករងរដ្ឋបាលក្រុង លោក សេនាធិការកងរាជអាវុធហត្ថក្រុងផងដែរ៕