(បាត់ដំបង)៖ លោក អ៊ុយ រី ប្រធានក្រុមប្រឹក្សាខេត្ត និងលោក សុខ លូ អភិបាលខេត្តបាត់ដំបង នាថ្ងៃទី២៦ ខែមិថុនា ឆ្នាំ២០២៦ បានអញ្ជើញជាអធិបតី ក្នុងពិធីប្រកាសចូលកាន់មុខតំណែង អភិបាលនៃគណៈអភិបាលស្រុកឯកភ្នំ។ យោងតាមអនុក្រឹត្យរបស់រាជរដ្ឋាភិបាលបានសម្រេចតែងតាំង លោក ប៊ី សុភាព អភិបាលស្រុកឯកភ្នំ ជំនួសលោក ម៉ិល សុផល ដែលត្រូវបានផ្ទេរភារកិច្ច ឲ្យទៅបម្រើការងារនៅរដ្ឋបាលខេត្តបាត់ដំបង។

ក្នុងឱកាសនោះ លោក សុខ លូ បានណែនាំដល់គណៈបញ្ជាការឯកភាពរដ្ឋបាលស្រុកឯកភ្នំ ត្រូវបន្តពង្រឹងរួបរួមសាមគ្គីគ្នាជាធ្លុងមួយ ដឹកនាំអភិវឌ្ឍន៍ស្រុកឯកភ្នំ ឲ្យកាន់តែមានការរីកចម្រើនបន្ថែមលើគ្រប់វិស័យ។ លោកបានស្នើដល់សហគមន៍នេសាទ និងប្រជាពលរដ្ឋពាក់ព័ន្ធចូលរួមជួយថែរក្សាការពារព្រៃលិចទឹក ឡូតិ៍អភិរក្ស និងទប់ស្កាត់បទល្មើសនេសាទ ឲ្យមានប្រសិទ្ធភាពបំផុត។

ជាមួយគ្នានោះ លោកបញ្ជាឲ្យអាជ្ញាធរ កងកម្លាំង និងមន្រ្តីជំនាញស្រាវជ្រាវរកមេខ្លោង ដែលប្រព្រឹត្តបទល្មើសនេសាទកន្លងមកដើម្បីចាត់វិធានការតាមផ្លូវច្បាប់ឲ្យបានម៉ឺងម៉ាត់។ លោកក៏បានក្រើនរំឭកដល់អាជ្ញាធរ ត្រូវបង្កើនការចុះអប់រំផ្សព្វផ្សាយដល់ប្រជាពលរដ្ឋអំពីផលផលប៉ះពាល់ នៃការនេសាទខុសច្បាប់ និងប្រគល់ឧបករណ៍នេសាទ ជូនអាជ្ញាធរមានសមត្ថកិច្ច សំដៅរួមគ្នាលុបបំបាត់ការនេសាទខុសច្បាប់រក្សាធនធានមច្ឆាជាតិ សម្រាប់កូនចៅជំនាន់ក្រោយ។

ទន្ទឹមនឹងនេះ លោកអភិបាលខេត្ត ណែនាំដល់អាជ្ញាធរ និងកងកម្លាំងគ្រប់លំដាប់ថ្នាក់ ត្រូវយកចិត្តទុកដាក់ពង្រឹងការទប់ស្កាត់ និងបង្រ្កាបការប្រើប្រាស់ និងជួញដូរគ្រឿងញៀន នៅក្នុងសហគមន៍ ជាពិសេសតំបន់ជាប់បឹងទន្លេសាប ព្រមទាំងបន្តបង្ក្រាបល្បែងស៊ីសងគ្រប់ប្រភេទឲ្យមានប្រសិទ្ធភាព។ លោកក៏បានផ្តល់អនុសាសន៍ដល់លោកអភិបាលស្រុកថ្មី ឲ្យបន្តយកចិត្តទុកដាក់លើការអភិវឌ្ឍ និងលើកស្ទួយផលិតផលសក្តានុពលប្រចាំតំបន់ ដើម្បីជំរុញសេដ្ឋកិច្ចមូលដ្ឋាន និងលើកកម្ពស់ជីវភាពរស់នៅរបស់ប្រជាពលរដ្ឋឲ្យកាន់តែល្អប្រសើរ។

លោកអភិបាលខេត្ត បានថ្លែងអំណរគុណដល់លោក ម៉ិល សុផល ដែលកន្លងមក បានខិតខំបំពេញតួនាទីភារកិច្ច និងរួមចំណែកក្នុងការដឹកនាំអភិវឌ្ឍស្រុកឯកភ្នំ។ ទន្ទឹមនឹងនេះ លោកក៏បានផ្តាំផ្ញើដល់លោក ប៊ី សុភាព ត្រូវបន្តដឹកនាំរដ្ឋបាលស្រុក ដោយស្មារតីទទួលខុសត្រូវខ្ពស់ ពង្រឹងសាមគ្គីភាពផ្ទៃក្នុង និងសហការជាមួយមន្ត្រីរាជការគ្រប់ជាន់ថ្នាក់ ដើម្បីបម្រើប្រជាពលរដ្ឋឲ្យកាន់តែមានប្រសិទ្ធភាព និងឆ្លើយតបតាមតម្រូវការជាក់ស្តែងរបស់មូលដ្ឋាន៕