សម្តេចតេជោ ហ៊ុន សែន អញ្ជើញដល់កម្ពុជាវិញហើយ ក្រោយបញ្ចប់ដំណើរទស្សនកិច្ចនៅចិនរយៈពេល៣ថ្ងៃ
27-06-2026 12:09
(ភ្នំពេញ)៖ នៅវេលាម៉ោងជិត១២ថ្ងៃត្រង់ថ្ងៃសៅរ៍ ទី២៧ ខែមិថុនា ឆ្នាំ២០២៦នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជាវិញហើយ ក្រោយបំពេញទស្សនកិច្ចមិត្តភាពផ្លូវការរយៈពេល៣ថ្ងៃនៅរដ្ឋធានីប៉េកាំង ប្រទេសចិន។
តបតាមការអញ្ជើញរបស់បក្សកុម្មុយនីស្តចិន កាលពីថ្ងៃទី២៥ ខែមិថុនា ឆ្នាំ២០២៦កន្លងទៅនេះ សម្តេចតេជោ ហ៊ុន សែន បានអញ្ជើញដឹកនាំគណៈប្រតិភូជាន់ខ្ពស់របស់កម្ពុជា ដែលមានការអមដំណើរដោយមន្ត្រីជាន់ខ្ពស់របស់រាជរដ្ឋាភិបាលកម្ពុជាផងនោះ បំពេញទស្សនកិច្ចមិត្តភាពផ្លូវការនៅចិន។
ក្នុងដំណើរទស្សនកិច្ចលើកទី២នៅចិន ក្នុងឋានៈជាប្រធានព្រឹទ្ធសភាកម្ពុជា និងជាលើកទី១៧ រាប់ចាប់តាំងពីឆ្នាំ១៩៩៩មកនោះ សម្តេចតេជោ ហ៊ុន សែន ទទួលបានការស្វាគមន៍យ៉ាងកក់ក្តៅបំផុតពីមេដឹកនាំកំពូលៗរបស់ចិន រួមមាន លោក ស៊ី ជីនពីង អគ្គលេខាធិការ នៃគណបក្សកុម្មុយនីស្តចិន និងជាប្រធានាធិបតីចិន, លោក លី ឈាង នាយករដ្ឋមន្ត្រីចិន, លោក ចាវ ឡឺជី ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន និងលោក លូ ហៃស៊ីង រដ្ឋមន្ត្រីនៃគណៈទាក់ទងការបរទេសរបស់គណៈកម្មការកណ្តាលនៃបក្សកុម្មុយនីស្តចិន។
សម្តេចតេជោ ហ៊ុន សែន ជាមេដឹកនាំកម្ពុជាមួយរូប ដែលបានបន្តព្រះរាជតម្រិះរបស់សម្តេចព្រះបរមរតនកោដ្ឋ នរោត្តម សីហនុ ក្នុងការពូនជ្រុំទំនាក់ទំនងកម្ពុជា និងចិន ឱ្យកាន់តែល្អប្រសើរ និងរឹងមាំ ព្រមទាំងពង្រីកនូវកិច្ចសហប្រតិបត្តិការជាច្រើនជាមួយគ្នា។ ដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសចិននាពេលនេះ ត្រូវបានមេដឹកនាំចិនចាត់ទុកជាដំណើរទស្សនកិច្ចរបស់មិត្តចាស់ប្រកបដោយភាពស្មោះត្រង់ និងជឿទុកចិត្ត និងជាដំណើរទស្សនកិច្ចប្រៀបដូចកម្លាំងចលករជំរុញបន្ថែមនូវជំនឿទុកចិត្តរវាងកម្ពុជា និងចិន។
គ្រប់ជំនួប មេដឹកនាំចិន សុទ្ធតែបានបង្ហាញនូវការពេញចិត្តចំពោះភាពល្អប្រសើរនៃចំណងមេត្រីភាព និងកិច្ចសហប្រតិបត្តិការរវាងកម្ពុជា និងចិន។ លោក ស៊ី ជីនពីង បានបង្ហាញនូវក្តីរីករាយបានជួបស្វាគមន៍សម្តេចតេជោ ហ៊ុន សែន ជាថ្មី។
នៅចំពោះមុខសម្តេចតេជោ ហ៊ុន សែន, លោក ស៊ី ជីនពីង បានថ្លែងថា ចិន ចាត់តុកកម្ពុជា ជាប្រទេសអាទិភាពសំខាន់នៃការទូតជិតខាងរបស់ចិន ហើយគាំទ្រយ៉ាងមុតមាំចំពោះប្រទេសកម្ពុជាក្នុងការការពារអធិបតេយ្យ និងសន្តិសុខ។ ចិន នឹងបន្តគាំទ្រមាគ៌ាអភិវឌ្ឍន៍ដែលសមស្របទៅនឹងលក្ខខណ្ឌជាតិរបស់ចិន។
លោក ស៊ី ជីនពីង បន្តថា ប្រទេសចិន មានឆន្ទៈក្នុងការធ្វើការជាមួយកងកម្លាំងការពារជាតិកម្ពុជា ដើម្បីរួមគ្នាការពារសន្តិភាព ស្វែងរកការអភិវឌ្ឍរួម និងបង្កើតវិបុលភាព។ លើសពីនេះ ការលើកកម្ពស់ការកសាងសហគមន៍ចិន-កម្ពុជា ដែលមានអនាគតរួម និងជំរុញការកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ និងធ្វើជាគំរូ។
នៅចំពោះមុខប្រធានាធិបតីចិន សម្ដេចតេជោ ហ៊ុន សែន បន្តបញ្ជាក់ជំហរនយោបាយរបស់កម្ពុជា ចំពោះចិន គឺនៅតែរឹងមាំដូចដែកថែប បើទោះបីជាពិភពលោកមានការប្រែប្រួល និងអាកាសធាតុមានការប្រែប្រួលបែបណាក្តី តែមិត្តភាពរវាងកម្ពុជា-ចិន មិនប្រែប្រួលនោះឡើយ។
សម្តេចតេជោ បានគូសរំលេចទៀតថា កម្ពុជា ចាត់ទុកចិន ជាមិត្តចាស់ ជាមិត្តពិត និងជាទីទុកចិត្តរបស់ប្រជាជនកម្ពុជា។
សម្តេចតេជោ និងលោក ស៊ី ជីនពីង ក៏បានជជែកគ្នាបន្ថែមទៀតលើការពង្រីកកិច្ចសហប្រតិបត្តិការទាំងក្របខណ្ឌសេដ្ឋកិច្ច ក្របខណ្ឌកសាងហេដ្ឋារចនាសម្ព័ន្ធ។ ជាពិសេសសម្ដេចតេជោ បានស្នើចិន ឱ្យបន្តគាំទ្រដល់ការកសាងហេដ្ឋារចនាសម្ព័ន្ធបន្តទៀត។ សម្ដេចតេជោ បានលើកឡើងថា ការកសាងហេដ្ឋាចនាសម្ព័ន្ធ ក៏ដូចជាសេដ្ឋកិច្ចក្នុងប្រទេសកម្ពុជា មិនអាចខ្វះបានឡើយនូវតួនាទីរបស់ចិននោះឡើយ។
ទន្ទឹមនឹងនោះ ភាគីទាំងពីរ ក៏បានពិភាក្សាគ្នាទាក់ទងទៅនឹងការពង្រឹងកិច្ចការនៅក្នុងក្របខណ្ឌពង្រឹងសន្តិសុខ ការផ្លាស់ប្ដូរព័ត៌មាន និងការផ្លាស់ប្ដូរនៃដំណើរទស្សនកិច្ចរវាងប្រតិភូជាន់ខ្ពស់នៃប្រទេសទាំងពីរ។ ភាគីទាំងពីរ ក៏បានជជែកគ្នាទៅលើកិច្ចសហប្រតិបត្តិការក្នុងក្របខណ្ឌគណបក្សនៃប្រទេសទាំងពីរ ដែលក្នុងដំណើរទស្សនកិច្ចរបស់សម្ដេចតេជោនាពេលនេះ ក៏មានការចុះហត្ថលេខាលើអនុស្សរណៈយោគយល់គ្នារវាងគណបក្សប្រជាជនកម្ពុជា និងបក្សកុម្មុយនីស្តចិន។ អនុស្សារណៈនេះ ជាផ្នែកដ៏សំខាន់ក្នុងការរុញច្រានទំនាក់ទំនង នៃកិច្ចសន្ទនានយោបាយនៅក្នុងក្របខណ្ឌគណបក្ស ការបណ្ដុះបណ្ដាលយុវជនរបស់គណបក្សនៃប្រទេសទាំងពីរឱ្យកាន់តែមានភាពសកម្មបន្ថែមទៀត។
ភាគីទាំងពីរ ក៏បានជជែកទៅលើបញ្ហាអន្តរជាតិមួយចំនួន ដែលបានកើតឡើង នាពេលបច្ចុប្បន្ន ដែលមានការប្រែប្រួលយ៉ាងឆាប់រហ័សនេះ តម្រូវឱ្យកម្ពុជា និងចិន ពួតដៃគ្នាបន្ថែមទៀត ក្នុងការសហការ និងការគាំទ្រគ្នាទៅវិញទៅមកនៅក្នុងឆាកអន្តរជាតិ។
ក្រៅពីជួបជាមួយមេដឹកនាំកំពូលៗរបស់ចិនហើយនោះ ក្នុងដំណើរទស្សនកិច្ចនេះ សម្ដេចតេជោ ហ៊ុន សែន បានជួបជាមួយលោក សុង ហៃឡាង ប្រធានក្រុមហ៊ុន China Communications Construction Company Ltd. (CCCC)។
ក្នុងជំនួបនោះ លោក សុង ហៃឡាង ក៏បានជម្រាបសម្ដេចតេជោ អំពីវឌ្ឍនភាពរបស់ក្រុមហ៊ុននៅទូទាំងសកលលោក ជាពិសេសវឌ្ឍនភាពរបស់ក្រុមហ៊ុននៅកម្ពុជា ដែលមានសាខារហូតដល់ទៅ២៣សាខា ហើយកម្មករច្រើនជាង៧០ភាគរយ ជាជនជាតិខ្មែរ។ រយៈពេលជាង២០ឆ្នាំកន្លងទៅនេះ ក្រុមហ៊ុន CCCC មានគម្រោងសាងសង់ហេដ្ឋារចនាសម្ព័ន្ធប្រមាណជា ៧០គម្រោងនៅកម្ពុជា ដែលជាផ្នែកមួយជួយដល់ការអភិវឌ្ឍហេដ្ឋារចនាសម្ព័ន្ធនៅកម្ពុជាឱ្យកាន់តែរីកចម្រើន។
លោក សុង ហៃឡាង ក៏បានប្ដេជ្ញាចិត្តក្នុងការគាំទ្រដល់ការកសាងហេដ្ឋារចនាសម្ព័ន្ធក្នុងប្រទេសកម្ពុជា ជាពិសេស គឺការចូលរួមចំណែកជាមួយរាជរដ្ឋាភិបាលដែលដឹកនាំដោយសម្ដេចមហាបវរធិបតី ហ៊ុន ម៉ាណែត ជួយដល់កម្ពុជាទៅលើការផ្លាស់ប្ដូរទម្រង់អភិវឌ្ឍបៃតង។
សម្ដេចតេជោ ហ៊ុន សែន បានវាយតម្លៃខ្ពស់ចំពោះក្រុមហ៊ុនដែលបានជួយជ្រោមជ្រែងដល់ការកសាងហេដ្ឋារចនាសម្ព័ន្ធនៅកម្ពុជានាពេលកន្លងមក។ សម្ដេចតេជោ បានស្នើឱ្យក្រុមហ៊ុនបន្តយកចិត្តទុកដាក់ទៅលើគម្រោងនានាដែលក្រុមហ៊ុនកំពុងតែអនុវត្តនៅកម្ពុជា ដូចជាការកសាងព្រែកជីកហ្វូណនតេជោ គម្រោងផ្លូវល្បឿនលឿនភ្នំពេញ-បាវិត, គម្រោងផ្លូវជាតិលេខ៥០ស៊ី ពីកំពង់ឆ្នាំងទៅកំពង់ធំ ជាដើម។
សម្ដេចតេជោ បានជំរុញឱ្យមានការយកចិត្តទុកដាក់ និងការគាំទ្របន្ថែមទៀត ទៅលើការអនុវត្តគម្រោងទាំងអស់នេះ ដើម្បីឱ្យចេញជារូបរាងសម្រាប់ហេដ្ឋារចនាសម្ព័ន្ធនៅកម្ពុជា។
សូមបញ្ជាក់ថា ក្នុងកំលុងពេលនៃដំណើរទស្សនកិច្ចនេះ សម្តេចតេជោ ហ៊ុន សែន និងកូនប្រុសពីររូប (លោក ហ៊ុន ម៉ានិត និងលោក ហ៊ុន ម៉ានី) បានអញ្ជើញចូលក្រាបបង្គំគាល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត នៅឯព្រះរាជដំណាក់ក្នុងរដ្ឋធានីប៉េកាំង ប្រទេសចិនដែរ៕
