(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី២៧ ខែមិថុនា ឆ្នាំ២០២៦ បានថ្លែងថា បញ្ហាដែលយើងជួបប្រទះក្នុងរយៈពេល២ឆ្នាំមកនេះ រដ្ឋាភិបាលបានប្រឈមមុខដោះស្រាយដោយមិនគេចវេសនោះឡើយ។

ការថ្លែងបែបនេះរបស់សម្ដេច បានធ្វើឡើងនាឱកាសដែល សម្ដេច អញ្ជើញជាអធិបតីភាពដ៏ខ្ពង់ខ្ពស់ក្នុងពិធីជួបសំណេះសំណាលមហាគ្រួសារសហគ្រាសធុនតូច និងមធ្យម។

នាឱកាសនោះ សម្ដេចបវរធិបតី បានថ្លែងថា ពិភពលោកប្រែប្រួល វាមានពេលល្អ និងពេលអាក្រក់ ដូចនឹងអាកាសធាតុម្ដងរាំងម្ដងភ្លៀងម្ដងខ្យល់ មិនស្ថិតស្ថិរនោះទេ។

សម្ដេចនាយករដ្ឋមន្ត្រី បានថ្លែងបន្តថា បញ្ហាប្រឈមមួយចំនួនដែលយើងបាននិងកំពុងជួបប្រទះ និងជួបប្រទះនៅពេលខាងមុខ។ សេដ្ឋកិច្ចពិភពលោកកំពុងជួបនឹងភាពមិនច្បាស់លាស់ ការប្រែប្រួលនៃច្រវាក់ផ្គត់ផ្គង់ ការកើនឡើងនូវវិធានការការពារសភាពាណិជ្ជកម្ម ការប្រកួតប្រជែងផ្នែកបច្ចេកវិទ្យា និងភាពតានតឹងក្នុងភូមិសាស្ត្រនយោបាយ ដែលបាននិងកំពុងជះឥទ្ធិពលអវិជ្ជមានដល់សេដ្ឋកិច្ចកម្ពុជា។

ប្រមុខរដ្ឋាភិបាលកម្ពុជា បានបន្តថា កម្ពុជាបន្តរងនូវការឈ្លានពានពីប្រទេសថៃ ផលវិបាកសេដ្ឋកិច្ចតាមរយៈការឆបោកតាមប្រព័ន្ធបច្ចេកវិទ្យា និងការបាត់បង់សេដ្ឋកិច្ចនៅតាមបន្ទាត់ព្រំដែន សេដ្ឋកិច្ចទីផ្សារមានការប្រកួតប្រជែង បញ្ញាសិប្បនិម្មិតកាន់តែវាយលុកជាដើម។

សម្ដេចនាយករដ្ឋមន្ត្រី បានថ្លែងដូច្នេះថា៖ «ទោះបីជាមានបញ្ហាខ្លះៗដូចខាងលើ យើងក៏មានសក្ដានុពលមួយចំនួន ដែលយើងអាចទាញយកមកពង្រឹងខ្លួនឯង ក៏ដូចជាកិច្ចការមួយចំនួនដែលយើងត្រូវធ្វើក្នុងការកែទម្រង់ ដើម្បីឱ្យយើងកាន់តែមានសក្ដានុពលបន្ថែម»។

សម្ដេចបវរធីបតី ហ៊ុន ម៉ាណែត បានលើកឡើងពីចំណុចពិសេសដែលកម្ពុជាមាន រយមទាំងទីតាំងភូមិសាស្ត្រ កម្លាំងពលកម្ម ការអនុគ្រោះពន្ធនិងកិច្ចព្រមព្រៀងទីផ្សារសេរី ដែលបើកចំហយ៉ាងទូលាយសម្រាប់វិនិយោគិនជាតិ និងអន្តរជាតិ។

សម្ដេច បានថ្លែងបន្តថា ពេលខ្លះបញ្ហាជាឱសថសម្រាប់យើងព្យាបាល។ ពេលជួបបញ្ហាប្រឈម យើងមានជម្រើសពីរ គឺផ្ដេកផ្ដួល យំស្រែក បាក់ទឹកចិត្ត និងជម្រើសមួយទៀត គឺយើងត្រូវប្រឈមមុខជាមួយនឹងបញ្ហា ដើម្បីពង្រឹងខ្លួនឯង៕