(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី២៧ ខែមិថុនា ឆ្នាំ២០២៦នេះ បានបញ្ជាដល់ក្រសួង ស្ថាប័នពាក់ព័ន្ធទាំងអស់ ត្រូវបន្ដយកចិត្តទុកដាក់ពង្រឹងគុណភាពចំណីអាហារ ដើម្បីបញ្ចៀសផលប៉ះដល់សុខភាពប្រជាពលរដ្ឋ។

ការណែនាំរបស់សម្ដេចមហាបវរធិបតី ហ៊ុន ម៉ាណែត បានធ្វើឡើងក្នុងឱកាសអញ្ជើញជាអធិបតី ពិធីជួបសំណេះសំណាលជាមួយមហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរសាទរទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា។

ការណែនាំ ប្រៀបដូចបទបញ្ជារបស់សម្ដេចមហាបវរធិបតី នាយករដ្ឋមន្ដ្រីនៃកម្ពុជា បន្ទាប់ពីសម្ដេចជួបខ្លួនឯងផ្ទាល់នៅពេលចុះទៅតាមបណ្ដាខេត្ត ហើយម្ចាស់ហាងគុយទាវមួយកន្លែង ហាមសម្ដេចមិនឲ្យទទួលទានប្រហិតសាច់គោនោះទេ។ ប៉ុន្ដែសម្ដេចមិនបានសួរអំពីមូលហេតុនោះទេ តែអាចសន្និដ្ឋានបានថាមកពីមូលហេតុអ្វី។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «ក្នុងកិច្ចប្រជុំគណៈរដ្ឋមន្ដ្រី ខ្ញុំបានលើកឧទាហរណ៍មួយរឿងពិត ខ្ញុំបានទៅគុយទាវខេត្តមួយមុនកម្មវិធី ចូលទៅដល់ខ្ញុំកម្មង់គុយទាវប្រហិតសាច់គោ អ្នករត់តុខ្សិបប្រាប់ខ្ញុំថា ខ្ញុំសូមជូនយោបល់បងកុំហូបប្រហិតសាច់គោ ឥលូវសួរថាបើសិនជាអ្នកលក់ខ្លួនឯងដឹងហើយ ខ្លួនឯងមិនហូប តើលក់ឲ្យគេទេ សូមឲ្យគិតរឿងនេះផង។ បើអត់ដឹងរឿងមួយ តែបើដឹងហើយសូមកុំធ្វើបែបនេះ រដ្ឋមិនចង់ធ្វើជាតួអង្គដើរចាប់នោះទេ យើងត្រូវសហការគ្នា ព្រោះអថិតិជនក៏ស្រលាញ់សុខភាពដូចយើងដែរ»។

ក្នុងន័យនេះ សម្ដេចមហាបវរធិបតី ហ៊ុន ម៉ាណែត បានសង្កត់ធ្ងន់ថា រាជរដ្ឋាភិបាលរដ្ឋ ជួយដល់វិស័យឯកជន ហើយវិស័យឯកជនត្រូវជួយខ្លួនឯង ដើម្បីជួយអតិថិជន តាមរយៈការខិតខំផលិតរបស់មានគុណភាព សុចរិតភាព តម្លាភាព គិតគូរពីសុខភាព ផលប្រយោជន៍របស់អ្នកប្រើប្រាស់។ សម្ដេចបន្ដទៀតថា រាជរដ្ឋាភិបាល នឹងជួយសម្រួល ប៉ុន្ដែបើវិស័យឯកជនដើរតួនាទីជួយពិនិត្យខ្លួនឯង។

បន្ថែមពីនេះ សម្ដេចមហាបវរធិបតី ហ៊ុន ម៉ាណែត បានគូសបញ្ជាក់ថា ស្ថាប័នរដ្ឋមិនចង់ដើរតួជាអ្នកដាក់វិធានការច្រើនដើម្បីដើរតាមផលិតផលដែលគ្មានគុណភាព ឬប៉ះពាល់សុខភាពប្រជាពលរដ្ឋនោះទេ ពោលវិស័យឯកជន ត្រូវតែមានភាពម្ចាស់ការណ៍ ដើម្បីបង្កើនទំនុកចិត្តដល់អតិថិជន ខណៈរដ្ឋនឹងខិតខំកាត់បន្ថយនីតិវិធី ដើម្បីជួយសម្រួលហើយវិស័យឯកជនត្រូវរួមគ្នា ដើម្បីធ្វើយ៉ាងណាពង្រឹងសមត្ថភាព និងគុណភាពនៃការផលិតនេះ៕