(ភ្នំពេញ)៖ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសពីអាអាទិភាពរបស់រាជរដ្ឋាភិបាល ដែលចាំបាច់ត្រូវដោះស្រាយមានចំនួន៣សំខាន់ៗគឺ ប្រទេសជាតិ និងប្រជាជន, ទឹកដី និងឯករាជ្យភាពជាតិ, ជីវភាពរស់នៅ និងអាយុជីវិតប្រជាជន។ នេះបើតាមប្រសាសន៍របស់សម្ដេច នៅក្នុងឱកាស ដែលសម្ដេចអញ្ជើញជួបសំណេះសំណាលមហាគ្រួសារសហគ្រាសធុនតូច មធ្យម និងសិប្បកម្មកម្ពុជា នាព្រឹកថ្ងៃទី២៧ ខែមិថុនា ឆ្នាំ២០២៦។

សម្ដេចធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «អាទិភាពរបស់រាជរដ្ឋាភិបាល ក្នុងការដោះស្រាយបញ្ហាធំទាំង៣ គឺប្រទេសជាតិ និងប្រជាជន, ទឹកដី និងឯករាជ្យភាពជាតិ, និងជីវភាពរស់នៅអាយុជីវិតប្រជាជន គឺជាគោលធំណាស់នៅក្នុងការដោះស្រាយទាំងអស់នេះ។ ការដោះស្រាយជម្លោះ ហេតុអ្វីបានជាយើងត្រូវទៅចរចា ជាជាងវាយគ្នាមិនចេះចប់? វាយគ្នាដូចរុស្ស៊ី-អ៊ុយក្រែន វាយគ្នា ៣-៤ឆ្នាំ ស្លាប់រាប់លាន ចង់បញ្ចប់នៅតែដោះស្រាយដោយការចរចាដដែល»។

សម្ដេចនាយករដ្ឋមន្រ្តី បានបន្តថា៖ «សម្រាប់យើងបើមានជម្រើសទៅដោះស្រាយដោយសន្តិវិធី ការពារទឹកដីត្រូវតែការពារតែត្រូវដោះស្រាយដោយវិធីអត់ធ្មត់បន្តិច ប្រើច្បាប់អន្តរជាតិឲ្យអស់លទ្ធភាព ការចរចានៅបន្តទៅមុខ កន្លែងណាទ្វេភាគីយើងចរចាទ្វេភាគី នៅព្រំដែនទឹក ព្រំដែនគោក។ កន្លែងណាដែលទ្វេភាគីបិទទ្វា នៅពេលដែលថៃគាត់លុបកិច្ចព្រមព្រៀង MoU 2001 យើងទៅតុលាការអន្តរជាតិ UNCLOS គឺជាតុលាការនៅក្រោមឆត្ររបស់ UN។ […] នេះមិនមែនថាយើងបោះបង់ការទាមទារទឹកដីស្របច្បាប់របស់យើងនោះទេ ថៃក៏ទាមទារទឹកដីស្របច្បាប់ និងក៏ទាមទារទឹកដីស្របច្បាប់ ឥលូវយើងមានឯកសារស្របច្បាប់ជាមួយគ្នាហើយ រកពេលធ្វើការជាមួយគ្នាទៅ ធ្វើបែបនេះដើម្បីកុំឲ្យប្រជាជនវេចបង្វេចរត់»។

ជាងនេះទៅទៀតសម្ដេចក៏បានសង្កត់ធ្ងន់ដែរថា ការពារទឹកដី គឺត្រូវតែការពារ ប៉ុន្ដែការចរចាក៏ត្រូវតែធ្វើទៅមុខដោយសន្តិវិធី ហើយក៏ដើម្បីរក្សាស្ថេរភាពសេដ្ឋកិច្ចរបស់ទេសជាតិ និងប្រជាជន កុំឲ្យខាតបង់ដោយសារតែសង្រ្គាម។ តួយ៉ាងដូចជាវិស័យទេសចរណ៍ គឺមិនមានភ្ញៀវទេចរណា ចង់មកលេងប្រទេសមួយដែលកំពុងមានសង្រ្គាមនោះទេ ហើយថវិកាជាតិ ត្រូវចំណាយទៅលើការទិញអាវុធ ជាជាងការអភិវៃឌ្ឍជាតិ។

ជាមួយគ្នានេះសម្ដេចធិបតី ហ៊ុន ម៉ាណែត ក៏បានថ្លែងអំណរគុណទៅកាន់ប្រជាពលរដ្ឋជាច្រើនដែលបានយល់ពីរដ្ឋាភិបាល មានឱកាសដោះស្រាយបញ្ហាដោយវិធីត្រជាក់ ប៉ុន្តែយើងមានសេចក្ដីសុខ ហើយមានឱកាសពង្រឹងសេដ្ឋកិច្ចសង្គម នៅក្នុងដំណាក់កាល៕