(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី២៧ ខែមិថុនា ឆ្នាំ២០២៦នេះ បានថ្លែងថា សម្ដេចធ្លាប់តែអានសៀវភៅ សម្ដេចតេជោ ហ៊ុន សែន ចេញទៅចរចាសន្ដិភាព ប៉ុន្ដែពេលនេះសម្ដេច ជាអ្នកចេញទៅចរចាដោយខ្លួនឯងវិញម្ដង។

ការថ្លែងបែបនេះ ធ្វើឡើងក្នុងឱកាសដែល សម្តេចបវរធិបតី ហ៊ុន ម៉ាណែត អញ្ជើញជាអធិបតីក្នុងពិធីជួបសំណេះសំណាល ជាមួយមហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរសាទរទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា។ ពិធីនេះធ្វើឡើងនៅមជ្ឈមណ្ឌលសន្និបាត និងពិពរណ៍កោះពេជ្រ។

សម្តេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា៖ «ខ្ញុំធ្លាប់តែអានសៀវភៅសម្ដេចតេជោចេញទៅ ចរចាសន្តិភាព ចរចារឿងព្រះមហាក្សត្រ ចរចារឿងអន្តរជាតិ»។

បន្ថែមពីនេះ សម្តេចបវរធិបតី បានថ្លែងបន្ដថា ឥឡូវយើងត្រូវប្រឈម ក្នុងការដោះស្រាយ សង្គ្រាមប្រដាប់អាវុធ អត់មាន B៥២ ប៉ុន្តែមាន F១៦ ជនភៀសសឹក៧០ម៉ឺននាក់ក្នុងរយៈពេលមួយសប្តាហ៍ កន្លែងមួយចំនួនច្បាំងគ្នាសិស្សក្មេងអត់បានរៀន ប៉ះពាល់ទៅដល់ការភ័យខ្លាចទេសចរណ៍មកកម្ពុជា ហើយអ្នកវិនិយោគគេមើលមកស្រុកខ្មែរ មានសង្គ្រាមយើងត្រូវយកជម្រើសមួយណា ចេញទៅចរចាបញ្ចប់ដោះស្រាយដោយប្រើច្បាប់ ឬមួយក៏ប្រើប្រដាប់អាវុធ ការសម្រេចចិត្តត្រូវតែធ្វើ ហើយសុទ្ធតែអត់មានមេរៀនណាមកបង្រៀនមេរៀនហ្នឹងទេ ប៉ុន្តែយើងត្រូវធ្វើការសម្រេចចិត្ត៕