(ភ្នំពេញ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី២៧ ខែមិថុនា ឆ្នាំ២០២៦នេះ បានណែនាំដល់់ក្រសួងស្ថាប័នជំនាញពាក់ព័ន្ធធ្វើការរួមគ្នា កែសម្រួល កាត់បន្ថយនីតិវិធី ក្នុងការស្នើសុំចុះបញ្ជី ការសុំអាជ្ញាបណ្ណ ការត្រួតពិនិត្យទំនិញជាដើម កុំឱ្យមានភាពស្មុគស្មាញ ចំណាយពេលយូរ និងកុំធ្វើការជាន់តួនាទីគ្នា ដែលអាចរារាំងដល់ការធ្វើធុរកិច្ច។

សម្តេចបញ្ជាក់ថា ការកែសម្រួលភាពស្មុគស្មាញនេះក្នុងករណីរកឃើញថា មានឯកសារគតិយុត្តិរបស់ក្រសួងស្ថាប័នណាខ្ទាស់ ឬបង្កើតឱ្យមានភាពស្មុគស្មាញ នោះត្រូវកែសម្រួលចេញ មិនអាចទុកឱ្យរាំងស្ទះនោះទេ។

សម្តេចនាយករដ្ឋមន្ត្រីសង្កត់ធ្ងន់ថា ការកែសម្រួលនេះនឹងជួយដល់អ្នកធុរកិច្ច ដែលងាយស្រួលជាងមុនផង និងជួយដល់អ្នកប្រើប្រាស់ ឱ្យប្រើប្រាស់ផលិតមានគុណភាព និងសុវត្ថិភាពផងដែរ។

សម្តេចបានថ្លែងដូច្នេះថា «ការធ្វើនេះ [កែសម្រួល] ជួយទាំងពីរ ជួយទាំងអ្នករកស៊ី ជួយធំបំផុតគឺអតិថិជន បានផលិតផលមួយដែលធានាគុណភាព ហើយនីតិវិធីមិនស្មុគស្មាញ ការទទួលខុសត្រូវរបស់មន្ត្រីអនុវត្តន៍ក៏ស្រួល ដែលមានគោលការច្បាស់លាស់មិនជាន់គ្នា»។

ការលើកឡើងរបស់សម្តេចបវរធិបតី ហ៊ុន ម៉ាណែត ធ្វើឡើងក្នុងឱកាសអញ្ជើញជួបសំណេះសំណាលជាមួយមហាគ្រួសារសហគ្រាសធុនតូច មធ្យម និងសិប្បកម្មកម្ពុជា នាព្រឹកថ្ងៃទី២៧ ខែមិថុនា ឆ្នាំ២០២៦។

ក្នុងឱកាសនោះដែរ សម្ដេចមហាបវរធិបតី ហ៊ុន ម៉ាណែត បានណែនាំក្រសួងសុខាភិបាល យកចិត្តទុកដាក់ពង្រឹងសុវត្ថិភាព គ្រឿងថែរក្សាសម្រស់ ពិសេសឡេ ដោយត្រូវត្រួតពិនិត្យ និងណែនាំអំពីការប្រើប្រាស់ឱ្យបានច្បាស់លាស់។

សម្ដេចមហាបវរធិបតី ហ៊ុន ម៉ាណែត ក៏បានណែនាំក្រសួងស្ថាប័នពាក់ព័ន្ធ ត្រូវកាត់បន្ថយអ្វីមិនចាំបាច់ ពង្រឹងអ្វីដែលចាំ ដោយត្រូវធ្វើឲ្យលឿន សុក្រិត្យ និងគុណភាពច្បាស់លាស់ ដើម្បីបង្កើនការទុកចិត្តដល់ប្រជាជន៕