(បន្ទាយមានជ័យ)៖ លោក កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា អ្នកតំណាងរាស្រ្ត និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានគូសរំលេចថា ៧៥ឆ្នាំ មកនេះ គណបក្សប្រជាជនកម្ពុជា បានរក្សាខ្ជាប់នូវអត្តសញ្ញាណ គោលបំណង និងឧត្តមគតិដើម្បីប្រជាជន។

លោកថ្លែងបែបនេះ ក្នុងកិច្ចប្រជុំបូកសរុបលទ្ធផលការងារគណបក្សឆមាសទី១ ឆ្នាំ២០២៦ និងផ្សព្វផ្សាយផែនការសកម្មភាពការងារគណបក្សឆ្ពោះទៅកាន់ការបោះឆ្នោតជ្រើសរើស ក្រុមប្រឹក្សាឃុំ/សង្កាត់ អាណត្តិទី៦ ឆ្នាំ២០២៧ នាថ្ងៃទី២៧ ខែមិថុនា ឆ្នាំ២០២៦។

ក្នុងឱកាសនោះលោក កែ គឹមយ៉ាន បានពាំនាំការផ្ដាំផ្ញើសួរសុខទុក្ខ និងជូនពរជ័យ កោតសសើរ អរគុណ ពីថ្នាក់ដឹកនាំគណបក្សពិសេសសម្ដេចតេជោ ហ៊ុន សែន ជូនសមាជិក សមាជិកាគណបក្ស ថ្នាក់ដឹកនាំគ្រប់អង្គភាព កងកម្លាំងប្រដាប់អាវុធគ្រប់ប្រភេទ និងជនរួមជាតិទាំងអស់នៅក្នុងខេត្តបន្ទាយមានជ័យ។

ក្នុងឱកាសនោះលោក កែ គឹមយ៉ាន បានកោតសរសើរចំពោះកិច្ចខិតខំប្រឹងប្រែងរបស់ក្រុមប្រឹក្សាឃុំសង្កាត់ទាំងអស់នៅក្នុងខេត្តបន្ទាយមានជ័យ ដែលបានយកចិត្តខិតខំប្រឹងប្រែងអនុវត្តភារកិច្ច ប្រកបដោយការទទួលខុសត្រូវបម្រើ និងអភិវឌ្ឍមូលដ្ឋានរបស់ខ្លួន និងសូមបន្តរួមគ្នា កាន់ដៃ អនុវត្តនៅរាល់ផែនការសកម្មភាពឆ្ពោះទៅកាន់ការបោះឆ្នោតជ្រើសក្រុមប្រឹក្សាឃុំ សង្កាត់ នីតិកាលទី៦ ឲ្យបន្តទទួលបានជោគជ័យត្រចះត្រចង់។

ជាមួយគ្នានេះលោក កែ គឹមយ៉ាន បានថ្លែងបន្តថាថាក្នុងរយៈពេល៧៥ឆ្នាំ ចាប់ពីថ្ងៃបដិសន្ធិមកគណបក្សប្រជាជនកម្ពុជា តែងតែបានរក្សាខ្ជាប់ឥតប្រែប្រួលនូវអត្តសញ្ញាណ គោលបំណង និងឧត្តមគតិរបស់ខ្លួនជាគណបក្ស របស់ប្រជាជន អាស្រ័យដោយប្រជាជន និងដើម្បីប្រជាជន រួមសុខ រួមទុក្ខជាមួយប្រជាជន ដើម្បីកសាង ការពារ និងអភិវឌ្ឍប្រទេសកម្ពុជា ជាប្រទេសមួយមានឯករាជ្យភាព សន្តិភាព សេរីភាព ប្រជាធិបតេយ្យអព្យាក្រឹត និងវឌ្ឍនភាពសង្គម នយោបាយឈ្នះ ឈ្នះ បញ្ចប់សង្គ្រាមនាំមកនូវការឯកភាពជាតិ-ទឹកដី បង្កើតបាននូវសន្តិភាពពេញលេញ នីតិរដ្ឋ លទ្ធិប្រជាធិបតេយ្យ សេរីពហុបក្ស អនុវត្តការបោះឆ្នោតសកល និងអសកលយ៉ាងទៀងទាត់។

ជាមួយគ្នានេះលោក កែ គឹមយ៉ាន ក៏បានថ្លែងបន្តទៀតថា គណបក្សប្រជាជនកម្ពុជា បានដឹកនាំប្រទេសជាតិ រក្សាបាននូវភាពសុខសាន្តរបស់ប្រជាជន និងបានស្នុំឱ្យបន្តពង្រឹងគណៈកម្មាធិការគណបក្សគ្រប់ថ្នាក់ របៀបរបបធ្វើការ ប្រជុំជីវភាពទៀងទាត់ ប្រកាន់ខ្ជាប់គោលការណ៍សមូហភាពដឹកនាំ បុគ្គលទទួលខុសត្រូវ រក្សាសាមគ្គីភាព ឯកភាពផ្ទៃក្នុងរឹងមាំ និងអនុវត្តត្រឹមត្រូវនូវតួនាទី ភារកិច្ច សិទ្ធិអំណាចរបស់អង្គការចាត់តាំងបក្សនីមួយៗ។ ពង្រឹង និងពង្រីកសមាជិកគណបក្ស ព្រមទាំងបង្កើនគុណភាពបក្សឱ្យបានតាមគោលការណ៍ «សមាជិកបក្សម្នាក់ គឺសម្លេងឆ្នោត១»៕