(កំពង់ធំ)៖ លោកស្រី ឃួន ឃុនឌី សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកកំពង់ស្វាយ ថ្ងៃទី២៧ ខែមិថុនា ឆ្នាំ២០២៦ បានដឹកនាំក្រុមការងារចុះអញ្ជើញពិនិត្យវឌ្ឍនភាពការសាងសង់ ទីស្នាក់ការគណបក្សប្រជាជនកម្ពុជា ស្រុកកំពង់ស្វាយ ដែលគិតត្រឹមពេលនេះសម្រេចបានជាង ៣៥%។

ក្នុងឱកាសចុះពិនិត្យវឌ្ឍនភាពការសាងសង់ស្នាក់ការគណបក្ស លោកស្រី ប្រធានក្រុមការងារ បានលើកឡើងថាការសាងសង់ស្នាក់ការថ្មីនេះគឺជាការបង្ហាញឱ្យឃើញពីភាពរឹងមាំ សាមគ្គីភាព និងការចាក់ឫសយ៉ាងជ្រៅរបស់គណបក្ស ប្រជាជនកម្ពុជា នៅតាមមូលដ្ឋាន ដើម្បីបន្តបម្រើប្រជាពលរដ្ឋប្រកបដោយប្រសិទ្ធភាពនិងនិរន្តរភាព។

លោកស្រីបានបន្តថា អគារស្នាក់ការថ្មីប្រកបដោយក្បាច់រចនាបែបសាមញ្ញនេះ នឹងក្លាយជាកន្លែងជួបជុំដ៏សុខដុមរមនា និងតំណាងឱ្យកម្លាំងសាមគ្គីភាព មិត្តភាព ក្រោមការដឹកនាំរបស់គណបក្ស ប្រជាជនកម្ពុជានៅមូលដ្ឋាន ស្រុកកំពង់ស្វាយទាំងក្នុងពេលអតីតកាល បច្ចុប្បន្នកាល និងអនាគត។

លោកស្រីបញ្ជាក់ថា ចំពោះការលេចចេញនូវសមិទ្ធផលថ្មីៗផ្សេងទៀត ក្រោមការដឹកនាំរបស់គណបក្សប្រជាជន ជាពិសេសសម្ដេចតេជោ ហ៊ុន សែន បានយកចិត្ដទុកដាក់ និងអភិវឌ្ឍន៍ប្រទេសជាតិលើគ្រប់វិស័យ ជាក់ស្ដែងសមិទ្ធផលថ្មីៗ ដែលត្រូវបានកសាងឡើង ដោយរាជរដ្ឋាភិបាល មានគ្រប់ទីកន្លែងដែលមានសម្តេចមហាបវរធិបតី ហ៊ុន ម៉ាណែត ជាប្រមុខ។

សូមបញ្ចាក់ថា ស្នាក់ការគណបក្សថ្មីនេះ ចាប់ផ្តើមការសាងសង់ឡើងកាលពីថ្ងៃទី១៧ ខែមេសា ឆ្នាំ២០២៦ ដែលមានបណ្តោយ ៣២ម៉ែត្រ និងទទឹង ១៦ម៉ែត្រ ស្ថិតក្នុងភូមិព្រៃព្រាល ខ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ៕