(កំពង់ធំ)៖ ២០ថ្ងៃក្រោយសន្យា ការដ្ឋានសាងសង់ស្ពានបាឡេឆ្លងស្ទឹងស្ទោង ស្ថិតនៅក្នុងភូមិគេន្ទាក ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ បានចាប់​ផ្តើមបុកគ្រឹះសាងសង់ហើយ។ ពិធីបញ្ចុះបឋមសិលាសាងសង់​ស្ពាន​ដែក​បាឡេ​ឆ្លង​ស្ទឹងស្ទោង ត្រូវបានធ្វើឡើងនៅព្រឹកថ្ងៃទី២៧ ខែឧសភា ឆ្នាំ២០២៦នេះ។

ពិធីប្រព្រឹត្តទៅក្រោមអធិបតីភាពលោក ទ្រី ដាលុច តំណាងដ៏ខ្ពង់ខ្ពស់លោកអ្នក​ឧកញ៉ា បណ្ឌិត ទ្រី ភាព ប្រធានក្រុមការងារយុវជនគណបក្សចុះមូល​ដ្ឋានស្រុក​ប្រា​សាទ​បល្ល័ង្ក។

ប្រជាពលរដ្ឋរស់នៅឃុំសាគ្រាមជួបការលំបាកជាច្រើនក្នុង​ការ​ធ្វើ​ដំណើរ​ឆ្លងស្ទឹង​ស្ទោងទាំងការធ្វើដំណើរ និងការដឹកជញ្ជូនកសិផលនានា។ បច្ចុប្បន្នមធ្យោបាយ​ក្នុងការឆ្លងស្ទឹងស្ទោងនេះ គឺដើរនៅលើស្ពានយោលមួយខ្សែ ដែលត្រូវបានធ្វើយូរ​ឆ្នាំ​មកហើយ។ ស្ពានយោលនេះ អាចឆ្លងបានតែថ្មើរជើង កង់ ម៉ូតូ ឬគោយន្ត​ប៉ុណ្ណោះ។ ការដឹកធ្ងន់ៗមិនអាចឆ្លងកាត់លើស្ពានយោលនេះបានឡើយ។

ដោយមើលឃើញការលំបាករបស់ប្រជាពលរដ្ឋនៅក្នុងឃុំនេះ កាលពីថ្ងៃទី៨ ខែមិថុនា ឆ្នាំ២០២៦ ក្រោមការចង្អុលបង្ហាញរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានោះ លោកអ្នកឧកញ៉ា ទ្រី ភាព បានប្រកាសសាងសង់​ស្ពាន​ដែកបាឡេនេះជាចំណងដៃជូនដល់ប្រជាពលរដ្ឋនៅក្នុងឃុំសាគ្រាមនេះ។

ស្ពាននេះមានបណ្ដោយប្រវែង ១១៣ម៉ែត្រ ទទឹង ៦ម៉ែត្រ ដែលអាចទ្រទម្ងន់​បាន ២៥តោន គ្រោងចំណាយថវិកាអស់ ២២០ ០០០ដុល្លារអាមេរិក។ គ្មាន​ស្ពាន​ឆ្លងស្ទឹងបានក្លាយជាការលំបាកសម្រាប់ប្រជាពលរដ្ឋនៅឃុំសាគ្រាម​យូរ​ឆ្នាំ​ណាស់មកហើយ។ ការចាប់ផ្តើមសាងសង់ស្ពានដែកបាឡេឆ្លងស្ទឹងនេះ បាននាំ​មក​នូវក្តីរីករាយឥតឧបមាសម្រាប់អាជ្ញាធរក្នុងមូលដ្ឋាន និងប្រជាពលរដ្ឋ។ គ្រ​ប់​គ្នាសុទ្ធតែបង្ហាញក្តីរំពឹងថា ក្តីលំបាកទាំងឡាយដែលពួកគេបានជួបក្នុងការឆ្លង​ស្ទឹងនឹងត្រូវបញ្ចប់នាពេលខាងមុខដ៏ខ្លី។

សូមបញ្ជាក់ថា នៅក្នុងពិធីនាព្រឹកមិញនេះ លោក ទ្រី ដាលុច បាននាំយក​អំណោយ​​របស់លោកអ្នកឧកញ៉ាបណ្ឌិត ទ្រី ភាព ចែកជូនគណបក្សស្រុក គណបក្សឃុំ កងកម្លាំងប្រដាប់អាវុធ និងលោកយាយជីលោកតាជីជាង ១០០ នាក់ ដែលបានអញ្ជើញចូលរួមក្នុងកម្មវិធីដោយចំណាយថវិកាអស់ប្រមាណ ៣០.០០០.០០០រៀល៕