(ត្បូងឃ្មុំ)៖ ស្ត្រីវ័យ៧១ឆ្នាំម្នាក់ រស់នៅភូមិចន្ទនិមិត្ត ឃុំរកាប្រាំ ស្រុកត្បូងឃ្មុំ ខេត្តត្បូងឃ្មុំ​ មិនទាន់ទទួលបានយុត្តិធម៌នៅឡើយទេ ពាក់ព័ន្ធបញ្ហាដីធ្លី១កន្លែង ដែលជាដីកេរ្តិ៍ ដីភូមិរបស់គាត់ទំហំ១៦ម៉ែត្រ គុណនឹង១០០ម៉ែត្រ ដោយផ្តើមចេញពីការចងការប្រាក់ចំនួន៥០០ដុល្លារ កាលពី២៤ឆ្នាំមុន។

យោងតាមឯកសារនានាដែលបណ្តាញព័ត៌មាន Fresh News ទទួលបាននៅថ្ងៃទី២៧ ខែមិថុនា​ ឆ្នាំ២០២៦ បានបញ្ជាក់ពីសារបានថា លោកយាយ ពៅ សុភី អាយុ៧១ឆ្នាំ កាលពីថ្ងៃទី២៥ ខែកក្កដា ឆ្នាំ២០០២ បានជួបវិបត្តិគ្រួសារ ដោយកូនប្រុសរបស់លោកយាយអាយុ១០ឆ្នាំ ត្រូវបានជនជាតិអាល្លឺម៉ង់​ លួចយកទៅ ដែលធ្វើឱ្យលោកយាយពិបាកចិត្តយ៉ាងខ្លាំង តែគ្មានថវិកាគ្រប់គ្រាន់ក៏បានបញ្ចាំដី និងផ្ទះមានទំហំ១៦ម៉ែត្រ គុណនឹង១០០ម៉ែត្រ ដែលក្នុងដីនោះ មានផ្នូរប្តីរបស់ខ្លួន ដែលបានស្លាប់កាលពីឆ្នាំ១៩៩៥ យកទៅបញ្ចាំចំនួន ៥០០ដុល្លារ ជាមួយម្ចាស់លុយ​ឈ្មោះ ញ៉ុង ខេន និងប្រពន្ធឈ្មោះ គង់ យ៉ារ៉ាន់ ដើម្បីយកថវិកានេះ ធ្វើដំណើរស្វែងរកកូនប្រុសរបស់ខ្លួនដែលបាត់នោះ។

ដោយសារតែជាប់រវល់ដើររកកូនប្រុស និងមិនមានលុយបង់ការប្រាក់ បានធ្វើឱ្យម្ចាស់បំណុល ដោយសំអាងកិច្ចសន្យាទិញ-លក់ ដែលកើតចេញពីលិខិតបញ្ចាំដីភូមិ និងផ្ទះ ចែងថា «បើមិនបានសងតាមការកំណត់ខាងលើនេះទេ នាងខ្ញុំ ពៅ សុភី សូមប្រគល់ដី នឹងផ្ទះនេះឱ្យទៅឈ្មោះ ខេន យ៉ារ៉ាន់ នៅភូមិពងទឹក ដោយគ្មានការតវ៉ាអ្វីឡើយ»។ លិខិតបញ្ចាំធ្វើឡើងរវាងម្ចាស់បំណុល និងកូនបំណុលនេះ ជាផ្លូវមួយឱ្យម្ចាស់បំណុលកែច្នៃប្រឌិត បង្កើត ជាកិច្ចសន្យាលក់-ដី ចុះថ្ងៃទី២៣ ខែកញ្ញា ឆ្នាំ២០០៣ ដើម្បីមករឹបអូសយកដី​ និងផ្ទះរបស់គាត់ ដើម្បីទូទាត់ប្រាក់ជំពាក់ទាំងដើមទាំងការ។

យោងតាមការបំភ្លឺនៅក្នុងឯកសារ បានបញ្ជាក់ថា កិច្ចសន្យាទិញ​-លក់ដី ក្នុងតម្លៃ ១៥០០ដុល្លារ ចុះថ្ងៃទី២៣ ខែកញ្ញា ឆ្នាំ២០០៣ ម្ចាស់បំណុលបានរៀបចំចុះហត្ថលេខាក្លែងបន្លំ ជំនួសមេភូមិ ពីព្រោះបើសិនឱ្យមេភូមិឈ្មោះ គឹម ណារ៉ា ចុះហត្ថលេខា លើកិច្ចសន្យាទិញលក់ដីមួយនេះ ក៏លោកមេភូមិមិនព្រមនោះទេ។

លោក គឹម ណារ៉ា ដែលពេលនោះជាមេភូមិចន្ទនិមិត្ត ឃុំរកាប្រាំ ក៏បានមកបំភ្លឺដែលថា កិច្ចសន្យាទិញ លក់ដី លោកទើបតែឃើញថ្មីៗនេះទេមានន័យថា លោកមិនបានចូលរួមចុះហត្ថលេខានោះឡើយ។

ករណីនេះ ដើម្បីចង់គ្រប់គ្រងដីភូមិរបស់លោកយា ពៅ សុភី ម្ចាស់បំណុលដែលផ្តើមចេញពីរឿងចងការប្រាក់ ​៥០០ដុល្លារ ក៏បានដាក់ពាក្យបណ្តឹងទៅកាន់សាលាដំបូងខេត្តត្បូងឃ្មុំ ដើម្បីសុំផ្ទេរកម្មសិទ្ធិដីធ្លី និងផ្តល់ការសម្រេចជាម្ចាស់ដីធ្លី នៃទំហំដីខាងលើ។

លោកយាយ ពៅ សុភី ដើម្បីចង់បន្តការរស់នៅនៅលើដីភូមិរបស់ខ្លួន ក៏បានស្វែងរកការជួយអន្តរាគមន៍ផ្លូវច្បាប់ពីមេធាវី ដោយមិនគិតថវិកា និងរហូតដាក់ពាក្យបណ្តឹងសុំកិច្ចអន្តរាគមន៍ពីរដ្ឋមន្ត្រីក្រសួងយុត្តិធម៌ ទៅកាន់សាលាដំបូង និងតំណាងអយ្យការ អមសាលាដំបូងខេត្តត្បូង ដើម្បីជួយដោះស្រាយ ហើយអនុញ្ញាតឱ្យលោកយាយ អាចបន្តរស់នៅលើដីភូមិរបស់ខ្លួនបានដូចដើម។

ករណីនេះ គេសង្ឃឹមថារដ្ឋមន្ត្រីក្រសួងយុត្តិធម៌ និងអាជ្ញារខេត្តត្បូងឃ្មុំ រួមទាំងអាជ្ញាធរដោះស្រាយវិវាទក្រៅប្រព័ន្ធតុលាការ (អ.ដ.ក) យកធ្វើជាប្រធានបទរួមគ្នាមួយ ដើម្បីដោះស្រាយបញ្ចប់ក្រោមនយោបាយឈ្នះឈ្នះ ទាំងសងខាងជាការចូលរួមលុបបំបាត់បញ្ហាអូសបន្លាយ និងក្លាយជាជំងឺមហារីកមួយរបស់ប្រជាពលរដ្ឋនៅតាមមូលដ្ឋាន។

ខាងក្រោមនេះបណ្តាញព័ត៌មាន Fresh News សូមបង្ហាញឯកសារពាក់នានាជូនស្ថាប័ន អាជ្ញាធរ និងមន្ត្រីជំនាញ ដើម្បីពិនិត្យធ្វើជាមូលដ្ឋានក្នុងការដោះស្រាយបញ្ហាជូនលោកយាយ ពៅ សុភី៕