(ភ្នំពេញ)៖ នារសៀលថ្ងៃសៅរ៍ ទី២៧ ខែមិថុនា ឆ្នាំ២០២៦នេះ លោក ជីវ ស៊ុនហេង សមាជិកយុវជនគណបក្សថ្នាក់កណ្តាល និងជាប្រធានក្រុមការងារគណបក្សចុះមូលដ្ឋានឃុំកំពង់ចិនជើង ក្នុងនាមតំណាងដ៏ខ្ពង់ខ្ពស់ លោករដ្ឋមន្ត្រី ថោ ជេដ្ឋា អនុប្រធានក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង បានអញ្ជើញដឹកនាំកិច្ចប្រជុំក្រុមការងារយុវជនឃុំកំពង់ចិនជើង ដើម្បីពិភាក្សាអំពីផែនការសកម្មភាពឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧។

ថ្លែងក្នុងអង្គប្រជុំនាឱកាសនោះ លោកប្រធានក្រុមការងារ បានគូសបញ្ជាក់ពីតួនាទីដ៏មានសារៈសំខាន់របស់កម្លាំងយុវជន ដែលជាសសរទ្រូង និងជាកម្លាំងចលករដ៏រស់រវើករបស់គណបក្ស ក្នុងការបម្រើប្រជាពលរដ្ឋនៅមូលដ្ឋាន។ ជាមួយគ្នានេះ លោក ជីវ ស៊ុនហេង បានដឹកនាំការពិភាក្សាយ៉ាងផុសផុល ដើម្បីរៀបចំយុទ្ធសាស្ត្រ និងដាក់ចេញនូវផែនការសកម្មភាពជាក់ស្តែង ឆ្ពោះទៅកាន់ការដណ្តើមជ័យជម្នះក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ខាងមុខ។

បន្ទាប់ពីបញ្ចប់កិច្ចប្រជុំ លោកប្រធាន និងសហការី បានអញ្ជើញពិសានំបញ្ចុកសាមគ្គីជាមួយយុវជនបក្សឃុំសរុបប្រមាណ ៧០នាក់ ក្នុងបរិយាកាសដ៏ស្និទ្ធស្នាល។ ជំនួបអាហារសាមញ្ញនេះ គឺជាឱកាសដ៏វិសេសវិសាលក្នុងការផ្សារភ្ជាប់ទំនាក់ទំនង ស្វែងយល់ពីសុខទុក្ខ បញ្ហាប្រឈម និងបំណងប្រាថ្នារបស់យុវជន ដើម្បីរួមគ្នាពង្រឹងមនសិការស្នេហ៍ជាតិ និងជំនឿជឿជាក់លើការដឹកនាំរបស់គណបក្ស ក្នុងការបម្រើជាតិ និងប្រជាជន។

នៅរសៀលថ្ងៃដដែល លោក ជីវ ស៊ុនហេង សមាជិកយុវជនគណបក្សថ្នាក់កណ្តាល និងជាប្រធានក្រុមការងារគណបក្សចុះមូលដ្ឋានឃុំកំពង់ចិនជើង និងសហការី បានអញ្ជើញចុះពិនិត្យជាក់ស្តែងវឌ្ឍនភាពការងារជួសជុល និងឈូសសម្រួលផ្លូវនាងសល្ងាច ប្រវែង ៦០០០ម៉ែត្រ និងការងារស្តារប្រឡាយរងចំនួន ០១ខ្សែ ប្រវែង ២៦០០ម៉ែត្រ ចាប់ពីចំណុចផ្លូវនាងសល្ងាច រហូតដល់អូរក្រពើ ដែលបច្ចុប្បន្នសម្រេចបានលទ្ធផល ១០០% រួចរាល់ហើយ ព្រមទាំងការស្ថាបនាផ្លូវសងខាងប្រឡាយ ដែលមានទទឹងសរុប ២០ម៉ែត្រ ដោយមានការចូលរួមបរិច្ចាគដីធ្លីពីបងប្អូនប្រជាពលរដ្ឋក្នុងមូលដ្ឋានដោយស្ម័គ្រចិត្តផងដែរ៕