(តាកែវ)៖ លោក ឈឹម ធី អភិបាលរងស្រុកអង្គរបូរី តំណាងលោក កង អាណាន់ អភិបាលស្រុក នៅថ្ងៃសុក្រ ទី២៦ ខែមិថុនា ឆ្នាំ២០២៦ បានដឹកនាំមន្ត្រីការិយាល័យជំនាញពាក់ព័ន្ធ រួមជាមួយអាជ្ញាធរភូមិ-ឃុំ ចុះពិនិត្យស្ថានភាពជាក់ស្តែងនៅទីតាំងមានទំនាស់ និងបន្តបើកកិច្ចប្រជុំសម្រុះសម្រួលករណីប្រជាពលរដ្ឋស្នើសុំកាយប្រឡាយ ស្ថិតនៅភូមិតាមូង ឃុំព្រៃផ្គាំ ស្រុកអង្គរបូរី ខេត្តតាកែវ។

ក្នុងកិច្ចប្រជុំនោះ អាជ្ញាធរបានស្តាប់ការលើកឡើងពីភាគីពាក់ព័ន្ធ ពិនិត្យលើស្ថានភាពជាក់ស្តែង និងពិភាក្សាដោះស្រាយដោយឈរលើគោលការណ៍ច្បាប់ ស្មារតីយោគយល់អធ្យាស្រ័យ និងគោលនយោបាយ «ឈ្នះ-ឈ្នះ» ដើម្បីធានាផលប្រយោជន៍រួម និងរក្សាសាមគ្គីភាពក្នុងសហគមន៍។

ជាលទ្ធផល ភាគីទាំងពីរ និងភាគីពាក់ព័ន្ធទាំងអស់ បានឯកភាពគ្នាបញ្ចប់វិវាទដោយសន្តិវិធី និងសះជានឹងគ្នា ដែលជាការរួមចំណែកលើកកម្ពស់ការឯកភាព សាមគ្គីភាព និងការរស់នៅប្រកបដោយសុខដុមរមនាក្នុងមូលដ្ឋាន៕