(ភ្នំពេញ)៖ ក្រសួងទេសចរណ៍ ចេញសេចក្ដីប្រកាសព័ត៌មាន ស្ដីពីការរៀបចំ «វេទិកា និងពិព័រណ៍ទេសចរណ៍មូស្លីមកម្ពុជា ឆ្នាំ២០២៦» ចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៦ នៅរាជធានីភ្នំពេញ។ នេះបើយោងតាមសេចក្ដីជូនដំណឹង ដែលបណ្ដាញព័ត៌មាន Fresh News ទទួលបាន។

តាមរយៈសេចក្ដីជូនដំណឹង បានបញ្ជាក់ថា ក្រសួងទេសចរណ៍ នឹងរៀបចំ «វេទិកា និងពិព័រណ៍ទេសចរណ៍មូស្លីមកម្ពុជា ឆ្នាំ២០២៦» ក្រោមមូលបទ «ទឹកដីពោរពេញដោយភាពស្រស់ត្រកាល និងជាផ្ទះដែលផ្តល់ទំនុកចិត្តសម្រាប់ការធ្វើដំណើរ» ដែលនឹងប្រព្រឹត្តទៅចំនួន៣ថ្ងៃ ចាប់ពីថ្ងៃសុក្រ ១១រោច ដល់ថ្ងៃអាទិត្យ ១៣រោច ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៦ នៅទីតាំងបរិវេណវិមានអាហារ (OCIC) សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

ព្រឹត្តិការណ៍នេះ ប្រារព្ធឡើងក្នុងគោលបំណង៖
*ទី១៖ ការផ្សព្វផ្សាយកិត្តិនាមកម្ពុជា ជាគោលដៅទេសចរណ៍ប្រកបដោយសុវត្ថិភាព ភាពកក់ក្ដៅ និងទំនុកចិត្ត សម្រាប់ទេសចរគ្រប់ជាតិសាសន៍មកពីគ្រប់ទិសទី។
*ទី២៖ ការផ្លាស់ប្ដូរវប្បធម៌ពីគ្នាទៅវិញទៅមក។
*ទី៣៖ ការកសាងបណ្ដាញទំនាក់ទំនង និងបញ្ជ្រាបការយល់ចំណេះដឹងអំពីនិន្នាការ និងតម្រូវការទេសចរណ៍មូស្លីម ប្រកបដោយភាពធន់ និងនវានុវត្តន៍ ស្របតាមយុគសម័យឌីជីថល។

ទន្ទឹមនឹងនេះ ក៏នឹងមានការរៀបចំ «វេទិកាជជែកពិភាក្សា» ដែលប្រព្រឹត្តទៅនៅថ្ងៃទី១០ ខែកក្កដា ឆ្នាំ២០២៦ ដោយមានវាគ្មិនជាមន្ត្រីរាជរដ្ឋាភិបាល អ្នកជំនាញទេសចរណ៍ ថ្នាក់ដឹកនាំសហគមន៍មូស្លីម ធុរជន និងវិស័យឯកជន ដែលនឹងជជែកពិភាក្សា ចែករំលែកនូវគំនិតយោបល់ ផ្លាស់ប្ដូរបទពិសោធន៍ល្អៗ និងផ្តល់ធាតុចូលសំខាន់ៗ ដើម្បីចូលរួមការអភិវឌ្ឍវិស័យទេសចរណ៍កម្ពុជា ប្រកបដោយនិរន្តរភាព ភាពធន់ និងបរិយាបន្ន។

ជាមួយគ្នានេះដែរ ក្រសួងទេសចរណ៍ នឹងមានការរៀបចំស្តង់ពិព័រណ៍ទេសចរណ៍មូស្លីម (Muslim Friendly Tourism Fair) ដែលនឹងដាក់បង្ហាញនូវសេវាកម្ម និងផលិតផលទេសចរណ៍ នៅទីតាំងបរិវេណខាងលើផងដែរ៕