(កំពង់ធំ)៖ លោក ផាង វី ប្រធានក្រុមការងារគណបក្សប្រជាជនកម្ពុជាចុះមូលដ្ឋានឃុំទ្រា ក្នុងនាមតំណាងលោក ថោ ជេដ្ឋា អនុប្រធានក្រុមការងារគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកស្ទោង នារសៀលថ្ងៃសៅរ៍ ទី២៧ ខែមិថុនា ឆ្នាំ២០២៦ បានដឹកនាំក្រុមការងារចុះពិនិត្យការដំឡើងស្លាកគណបក្សប្រជាជនកម្ពុជា និងប្រព័ន្ធភ្លើងសូឡាបំភ្លឺផ្លូវ ស្ថិតក្នុងមូលដ្ឋានឃុំទ្រា ស្រុកស្ទោង ខេត្តកំពង់ធំ។

ក្នុងឱកាសនោះ លោកប្រធានក្រុមការងារ បានបញ្ជាក់ថា ស្លាកគណបក្សប្រជាជនកម្ពុជាថ្មី ចំនួន ៣២ ស្លាក ប្រព័ន្ធភ្លើងសូឡាបំភ្លឺផ្លូវសាធារណៈ ចំនួន ១៤០ ដើម និង កង់ចំនួន ២គ្រឿង គឺជាអំណោយលោករដ្ឋមន្ដ្រី ថោ ជេដ្ឋា។ សមិទ្ធផលថ្មីដ៏ស្រស់ស្អាតនេះ អាចលេចចេញជារូបរាងឡើងបាន គឺដោយសារមានការសម្របសម្រួល យកចិត្តទុកដាក់ និងការដឹកនាំការដំឡើងផ្ទាល់ពីសំណាក់ក្រុមការងារចុះជួយមូលដ្ឋានឃុំទ្រា។

សកម្មភាពចុះបំពេញការងារនាពេលនេះ គឺពិតជាបានឆ្លុះបញ្ចាំងឱ្យឃើញយ៉ាងច្បាស់ពីស្មារតីសាមគ្គីភាព ឯកភាពផ្ទៃក្នុង និងការទទួលខុសត្រូវខ្ពស់របស់ក្រុមការងារ ក្នុងការលើកកម្ពស់សោភ័ណភាពមូលដ្ឋាន ក៏ដូចជាការផ្សព្វផ្សាយអត្តសញ្ញាណរបស់គណបក្ស ឱ្យកាន់តែស្ថិតនៅកៀកជាប់ជាមួយបងប្អូនប្រជាពលរដ្ឋជានិច្ច។

ទន្ទឹមនឹងនេះ លោក ផាង វី និងក្រុមការងារ ក៏បានឆ្លៀតឱកាសជួបសំណេះសំណាលជាមួយសមាជិកបក្ស និងអាជីវករផ្សារហប់ ដោយបានបញ្ជាក់ថា អំពូលសូឡាទាំងនេះនឹងជួយសម្រួលដល់ការធ្វើដំណើរ ការលក់ដូរ ក៏ដូចជាការលើកកម្ពស់សន្តិសុខក្នុងមូលដ្ឋានផងដែរ។ ជាមួយគ្នានេះ បងប្អូនប្រជាពលរដ្ឋ និងអាជីវករ បានសម្តែងនូវក្តីសប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះក្រុមការងារ ដែលតែងតែគិតគូរពីសុខទុក្ខ និងការអភិវឌ្ឍនៅក្នុងឃុំ៕