(ភ្នំពេញ)៖ លោកសាស្ដ្រាចារ្យ ម៉ម ប៊ុនហេង អ្នកតំណាងរាស្ដ្រមណ្ឌលរាជធានីភ្នំពេញ និងជាអនុប្រធានក្រុមការងារចុះជួយខណ្ឌសែនសុខ បានបន្ដជំរុញលើកទឹកចិត្ដដល់សមាជិកគណបក្ស ត្រូវខិតខំប្រឹងប្រែងបំពេញភារកិច្ចដោយការយកចិត្ដទុកដាក់ខ្ពស់ បើមានបញ្ហាអ្វីត្រូវសាមគ្គីគ្នារកដំណោះស្រាយ ពិសេសត្រូវបន្ដរក្សាភូមិឃុំមានសុវត្ថិភាពជូនប្រជាពលរដ្ឋ។

ការថ្លែងយ៉ាងដូច្នេះរបស់លោកសាស្រ្ដាចារ្យ ក្នុងឱកាសសំណេះសំណាលជាមួយប្រធាន អនុប្រធាន ជំនួយការ និងប្រធាន អនុប្រធានអនុសាខាបក្ស ព្រមទាំងប្រធានក្រុមបក្ស ក្នុងភូមិទំនប់ ដើម្បីអបអរសាទរខួបអនុស្សាវរីយ៍លើកទី ៧៥ ថ្ងៃបង្កើតគណបក្សប្រជាជនកម្ពុជា ២៨មិថុនា ឆ្នាំ ១៩៥១- ២៨មិថុនា ឆ្នាំ២០២៦ នៅស្នាក់ការគណបក្សសង្កាត់ភ្នំពេញថ្មី។

អ្នកតំណាងរាស្ដ្រមណ្ឌលរាជធានីភ្នំពេញបានថ្លែងបានថ្លែងទៀតថា ជំនួបក្នុងថ្ងៃនេះ គឺជាជំនួបមួយដ៏មានសារៈសំខាន់ ដើម្បីផ្សព្វផ្សាយបន្ដនៃសាររបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ក្នុងទិវារំឭកខួបលើកទី៧៥ នៃថ្ងៃបង្កើតគណបក្សប្រជាជនកម្ពុជា ជូនសមាជិកបក្ស។

«នាឱកាសនេះខ្ញុំក៏សូមឱ្យសមាជិកបក្សយើងទាំងអស់ ត្រូវពង្រីកសមត្ថភាព និងពង្រឹងសា្មរតី ក្នុងការបម្រើ និងឆ្លើយតបនឹងតម្រូវការរបស់ប្រជាពលរដ្ឋយើងឱ្យទាន់ពេលវេលា ក្រៅពីផ្ដល់សុវត្ថិភាពក្នុងភូមិឃុំ យើងត្រូវតែចុះស្វែងយល់ពីបញ្ហាផ្សេងៗទៀតដែលប្រជាជនយើងជួបប្រទះ ជាពិសេលើបញ្ហាសុខុមាលភាពរបស់ពួកគាត់ ។លើសពីនោះគឺក្រុមគ្រួសារវីរកងទ័ពយើងដែលរស់នៅក្នុងមូលដ្ឋានយើង ត្រូវផ្ដល់ភាពកក់ក្ដៅជូនគាត់ កុំឱ្យមានភាពចន្លោះ»។

លោកសាស្ដ្រាចារ្យក៏បានថ្លែងអំណរគុណដល់សមាជិក សមាជិកបក្សទាំងអស់ ដែលកន្លងមកនេះ បានខិតខំបំពេញភារកិច្ចដោយការទទួលខុសត្រូវខ្ពស់ តែទោះជាយ៉ាងណាលោកសាស្ដ្រាចារ្យ នៅតែណែនាំ និងផ្ដល់អនុសាសន៍គន្លឹះបន្ថែមទៀត ដើម្បីបន្ដទទួលបានការជឿទុកចិត្ដពីប្រជាជននៅក្នុងមូលដ្ឋាន៕