(ត្បូងឃ្មុំ)៖ នាថ្ងៃទី២៨ ខែមិថុនា ឆ្នាំ២០២៦នេះ ជាថ្ងៃដ៏វិសេសវិសាល គម្រប់ខួបលើកទី៧៥ នៃថ្ងៃបង្កើតគណបក្សប្រជាជនកម្ពុជា (១៩៥១-២០២៦) ជាមួយគ្នានោះ លោក ផារ៉ា មង្គល សមាជិកគណៈកម្មាធិការកណ្តាលគណបក្ស និងប្រធានក្រុមការងារគណបក្សចុះមូលដ្ឋានស្រុកក្រូចឆ្មារ បានដឹកនាំប្រកាសទទួលស្គាល់សមាជិកគណបក្សប្រជាជនកម្ពុជាថ្មី ចំនួន៦៦២នាក់ មកពី១២ឃុំ ក្នុងស្រុកក្រូចឆ្មារ ខេត្តត្បូងឃ្មុំ និងបានសម្តែងនូវការកោតសរសើរ និងមោទនភាពយ៉ាងខ្លាំងចំពោះការខិតខំប្រឹងប្រែងរបស់ក្រុមការងារ ដែលបានកសាងកម្លាំងបក្សថ្មីបន្ថែមជាបន្តបន្ទាប់ ក្នុងឆមាសទី១ ឆ្នាំ២០២៦នេះ។

ថ្លែងសំណេះសំណាល ទៅកាន់សមាជិកបក្សថ្មីទាំងអស់ ស្ថិតនៅស្នាក់ការគណបក្សស្រុកក្រូចឆ្មារ លោក ផារ៉ា មង្គល បានពាំនាំនូវការសាកសួរសុខទុក្ខ និងពរជ័យសិរីសួស្តីពីសម្តេចតេជោ ហ៊ុន សែន ប្រធានគណបក្ស សម្តេចចក្រី ហេង សំរិន ប្រធានកិត្តិយសគណបក្ស និងសម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជា ក៍ដូចជាលោក ជា សុផារ៉ា ប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ ជូនសមាជិកសមាជិកាគណបក្សទាំងអស់។

ក្នុងឱកាសនោះ លោក ផារ៉ា មង្គល បានផ្សព្វផ្សាយ និងបញ្ជូននូវសារដ៏មានអត្ថន័យរបស់ សម្តេចតេជោ ហ៊ុន សែន ប្រធានគណបក្ស ក្នុងឱកាសខួបលើកទី៧៥ នៃថ្ងៃបង្កើតគណបក្សប្រជាជនកម្ពុជា ជូនដល់សមាជិកថ្មីទាំងអស់ ដើម្បីជាមាគ៌ាដឹកនាំ និងជាកម្លាំងចិត្តក្នុងការបន្តបេសកកម្មរបស់គណបក្ស។

លោក បានគូសបញ្ជាក់ថា សមាជិក សមាជិកាបក្សទាំងចាស់និងថ្មី គឺជាសសរទ្រូង និងជាគ្រឹះដ៏រឹងមាំរបស់ស្រុកក្រូចឆ្មារ ក្នុងនោះសមាជិកបក្សទាំងអស់ ត្រូវធ្វើជាគំរូល្អ និងជួយយកអាសាអ្នកភូមិផងរបងជាមួយ ដើម្បីឱ្យប្រជាពលរដ្ឋកាន់តែមានសេចក្តីទុកចិត្តលើគណបក្ស តាមរយៈទង្វើជាក់ស្តែង។

ប្រធានក្រុមការងារ រូបនេះ ក៏បានរំលឹកផងដែរថា សមាជិកបក្សម្នាក់ គឺជានិមិត្តរូបនៃសន្លឹកឆ្នោតមួយសំឡេង ដើម្បីរួមគ្នារុញច្រានស្រុកក្រូចឆ្មារឱ្យកាន់តែរីកចម្រើនទៅមុខបន្ថែមទៀត ខណៈសមិទ្ធផលនានាក្នុងស្រុកជាច្រើន មានដូចជា ផ្លូវជាតិលេខ ៧១c មន្ទីរពេទ្យ សាលារៀន និងវត្តអារាម ត្រូវបានកសាងឡើង និងកំពុងបន្តកសាងជាបន្តបន្ទាប់បន្ថែមទៀត។

ជាមួយគ្នានោះ លោក ផារ៉ា មង្គល បានលើកឡើងថា មនុស្សយើងកើតមកមានវាសនាខុសគ្នា តែមាន ២យ៉ាងដែលត្រូវតែស្មើគ្នា គឺ «សិទ្ធិបោះឆ្នោត និងសិទ្ធិទទួលបានការអប់រំ» ដែលជាឱកាសផ្លាស់ប្តូរជីវិតរបស់កូនចៅជំនាន់ក្រោយ ជាពិសេសក្រុមគ្រួសារបងប្អូនប្រជាកសិករ។

លោក បានណែនាំឱ្យសមាជិកបក្សទាំងអស់ ត្រូវទៅចុះឈ្មោះបោះឆ្នោតទាំងអស់គ្នា និងពិនិត្យផ្ទៀងផ្ទាត់ឈ្មោះឱ្យបានត្រឹមត្រូវ ចាប់ពីថ្ងៃទី៧ ខែតុលា ដល់ថ្ងៃ៣០ ខែវិច្ឆិកា ឆ្នាំ២០២៦ ខាងមុខនេះ នៅតាមសាលាឃុំរៀងៗខ្លួន។

ទន្ទឹមនេះ លោក ប្រធានក្រុមការងារ រួមទាំងសមាជិកបក្សទាំងអស់ បានបង្ហាញជំហរយ៉ាងរឹងមាំ ប្តេជ្ញាបន្តគាំទ្រ សម្តេចតេជោ ហ៊ុន សែន ជាប្រធានគណបក្ស និងគាំទ្រពេញទំហឹងចំពោះការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ជាចុងក្រោយ ឆ្លៀតក្នុងឳកាសនោះ លោក ផារ៉ា មង្គល បានជំរុញឱ្យសមាជិកបក្ស និងពលរដ្ឋ ត្រូវស្វែងយល់អំពីច្បាប់ដីធ្លី ដើម្បីការពារសិទ្ធិស្របច្បាប់របស់ខ្លួន កុំឱ្យមានការយល់ច្រឡំ ឬត្រូវគេឆបោក ព្រោះមានតែការអនុវត្តត្រឹមត្រូវតាមនីតិវិធីប៉ុណ្ណោះ ទើបធ្វើឱ្យសិទ្ធិលើដីធ្លីមានតម្លៃ និងគ្មាននរណាអាចមកដកហូតបាន៕