លោក សុឹម វណ្ណៈ និងក្រុមគ្រួសារ អញ្ជើញប្រគេនទៀនព្រះវស្សា និងទេយ្យវត្ថុដល់ព្រះសង្ឃគង់ចាំព្រះវស្សាអស់ត្រីមាសចំនួន ៦វត្ត នៅខេត្តកំពង់ឆ្នាំង
28-06-2026 21:49
(កំពង់ឆ្នាំង)៖ លោក សុឹម វណ្ណៈ និង លោកស្រី សៅ សារៀម ព្រមទាំងបុត្រ នៅថ្ងៃទី២៨ ខែមិថុនា ឆ្នាំ២០២៦នេះ បានអញ្ជើញប្រគេនទៀនព្រះវស្សា និងទេយ្យវត្ថុដល់ព្រះសង្ឃគង់ចាំព្រះវស្សាអស់ត្រីមាសចំនួន ៦វត្ត នៅខេត្តកំពង់ឆ្នាំង ដែលតាមទំនៀមជាប្រពៃណីនៃព្រះពុទ្ធសាសនាព្រះសង្ឃគ្រប់ព្រះអង្គទាំងឡាយ គ្រប់វត្តអារាម នៅកម្ពុជា ត្រូវនិមន្តចូលកាន់ព្រះវស្សាអស់ថេរវេលា ៣ខែ ចាប់តាំងពីថ្ងៃ ១រោច ខែអាសាធ តទៅ ដល់ថ្ងៃ១៥កើត ខែកត្តិក)។
ពិធីបុណ្យនេះដែរក៏មាននមស្សការព្រះរតនត្រ័យ និមន្តព្រះសង្ឃ ចម្រើនព្រះបរិត្ត ដើម្បីឧទ្ទិសមហា កុសលផលបុណ្យ ជូនដល់ញ្ញាតិការទាំង ៧សណ្តាន និងបុព្វការីជនដែលបានចែកឋានទៅកានបរមលោកខាងមុខ មកទទួលយកផល្លាអានិសង្ឃ ដែលកើតចេញ អំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធសាសនា ដែលជាសាសនារបស់រដ្ឋ។
ទេយ្យទានដែលបានវេរ និងប្រគេនដល់ព្រះសង្ឃដល់វត្តទាំង៦រួមមាន៖ វត្ត វាំងចាស់ (ខេត្តកំពង់ស្ពឺ), វត្តទឹកជុំ (ខេត្តកំពង់ឆ្នាំង), វត្ត តាសុត របស់ព្រះអង្គចន្ទមុនី (ខេត្តកំពង់ឆ្នាំង), វត្តស្ទឹង (ខេត្តកំពង់ឆ្នាំង), វត្តក្រឡាញ់ចាស់ (ខេត្តកំពង់ឆ្នាំង) និងវត្តធម្មយុត្តិ (ខេត្តកំពង់ឆ្នាំង) ដោយក្នុងមួយវត្តៗប្រគេនទៀនវស្សា ១គូរ អង្ករ ៥បាវ ស្មើនឹង ២៥០kg មី ១០កេស ទឹកសុទ្ធ ១០កេស ភេសជ្ជៈ ១០កេស និងបញ្ជ័យក្នុងមួយវត្តចំនួន ១ ៥០០ ០០០រៀល និងចែកថវិកាជូនចាស់ៗក្នុងមួយវត្ត ២០នាក់ក្នុងម្នាក់ៗទទួលបាន ២មុឺន ៥ម៉ឺន និង ១០ម៉ឺនរៀលផងដែរ។
ក្នុងឱកាសនោះលោក សុឹម វណ្ណៈ និង លោកស្រី សៅ សារៀម ព្រមទាំងបុត្រ បានបួងសួងបារមីវត្តទាំង៦ ដើម្បីសុំសេចក្តីសុខ សេចក្តីចម្រើនជូនដល់ថ្នាក់ដឹកនាំគ្រប់លំដាប់ថ្នាក់ ក៏ដូចជាប្រជាពលរដ្ឋនៅទូទាំងប្រទេសកម្ពុជា សូមមានភាពសម្បូរណ៍សប្បាយគ្រប់ៗ ក្រុមគ្រួសារជាពិសេសសូមឱ្យប្រទេសជាតិមានសុខសន្តិភាព និងទទួលបានសមិទ្ធផលថ្មីៗបន្ថែមទៀត៕
