(ម៉ុងហ្គោលី)៖ នាថ្ងៃទី២៧ ខែមិថុនា ឆ្នាំ២០២៦ ក្នុងឱកាសអញ្ជើញចូលរួមក្នុងកិច្ចប្រជុំគណៈកម្មាធិការអចិន្រ្តៃយ៍ នៃសន្និសីទអន្តរជាតិ នៃបណ្តាគណបក្សនយោបាយនៅអាស៊ី (ICAPP) លើកទី៤៥ លោក សុខ សូកេន រដ្ឋមន្រ្តីក្រសួងអធិការកិច្ច សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានវេទិកាយុវជន នៃ ICAPP ដឹកនាំគណៈប្រតិភូ ចូលជួបសម្ដែងការគួរសមជាមួយ ឯកឧត្តម Uchral Nyam-Osor នាយករដ្ឋមន្ត្រីនៃប្រទេសម៉ុងហ្គោលី និងជាប្រធានគណបក្សប្រជាជនម៉ុងហ្គោលី នៅវិមានរដ្ឋាភិបាល ប្រទេសម៉ុងហ្គោលី។

កិច្ចប្រជុំនេះសម្រេចបាននូវលទ្ធផលសំខាន់ៗជាច្រើន ដើម្បីធានាបាននូវប្រសិទ្ធភាពកាន់តែខ្ពស់ ភាពលេចធ្លោកាន់តែប្រសើរ និងការពង្រីកវិសាលភាពគ្របដណ្តប់ឱ្យកាន់តែទូលំទូលាយនៅទូទាំងតំបន់អាស៊ី។

លោកបានកោតសរសើរចំពោះបដិសណ្ឋារកិច្ចដ៏កក់ក្តៅរបស់ម្ចាស់ផ្ទះ គឺគណបក្សប្រជាជនម៉ុងហ្គោលី ហើយនឹងទន្ទឹងរង់ចាំសកម្មភាពបន្ថែមទៀតនាពេលខាងមុខ និងរង់ចាំចូលរួមសកម្មភាពជាច្រើនទៀតនាពេលខាងមុខ រួមទាំងមហាសន្និបាត ដែលនឹងប្រព្រឹត្តទៅនៅទីក្រុងសេអ៊ូល សាធារណរដ្ឋកូរ៉េ។

លោករដ្ឋមន្ត្រីក៏បានជួបពិភាក្សា និងផ្លាស់ប្តូរយោបល់ជាមួយសមាជិកទាំងអស់រួមមានប្រទេសចិន ម៉ុងហ្គោលី វៀតណាម សាធារណរដ្ឋកូរ៉េ ឡាវ មីយ៉ាន់ម៉ា ស្រីលង្កា បង់ក្លាដែស និងប្រទេសដទៃទៀត។

គណៈប្រតិភូកម្ពុជាក៏បានចូលរួមកម្មវិធីដាំដើមឈើមិត្តភាព ICAPP ក្រោមអធិបតីភាពរបស់ ឯកឧត្តម Chung Eui-yong ប្រធានគណៈកម្មាធិការអចិន្រ្តៃយ៍ ICAPP នៅឧទ្យានជាតិ ប្រទេសម៉ុងហ្គោលី និងចូលរួមពិធីជប់លៀងក្រោមអធិបតីភាព ឯកឧត្តម Uchral Nyam-Osor នាយករដ្ឋមន្ត្រីនៃប្រទេសម៉ុងហ្គោលី និងជាប្រធានគណបក្សប្រជាជនម៉ុងហ្គោលី នៅវិមាន Khan-Uul ប្រទេសម៉ុងហ្គោលី។

សន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) ត្រូវបានបង្កើតឡើងក្នុងឆ្នាំ២០០០ ដើម្បីជាវេទិកាសម្រាប់គណបក្សនយោបាយនៅទូទាំងទ្វីបអាស៊ី ក្នុងការផ្លាស់ប្តូរយោបល់ បង្កើនការយោគយល់គ្នា និងជំរុញកិច្ចសហប្រតិបត្តិការនយោបាយ សន្តិភាព និងការអភិវឌ្ឍន៍ក្នុងតំបន់។ វេទិកានេះរួមមានសមាជិកពីគណបក្សនយោបាយជាច្រើនប្រទេស និងរៀបចំកិច្ចប្រជុំជាប្រចាំ ដើម្បីពិភាក្សាបញ្ហាសំខាន់ៗដែលពាក់ព័ន្ធនឹងអាស៊ី និងពិភពលោក។

ICAPP ក៏មានគោលបំណងពង្រឹងតួនាទីគណបក្សនយោបាយក្នុងការដោះស្រាយបញ្ហាសកល ដូចជា សន្តិសុខ សេដ្ឋកិច្ច និងការអភិវឌ្ឍប្រកបដោយចីរភាព ព្រមទាំងជំរុញការចូលរួមរបស់យុវជន និងស្ត្រីក្នុងដំណើរការនយោបាយផងដែរ៕