(ភ្នំពេញ)៖ លោកវេជ្ជបណ្ឌិត សុខ ជួរ ទីប្រឹក្សាក្រសួងសុខាភិបាល និងអគ្គនាយករងនៃនាយកដ្ឋានសុខាភិបាលកម្ពុជា បានថ្លែងអំណរគុណស្ថានទូតម៉ាឡេស៊ី ប្រចាំកម្ពុជា ដែលបានដើរតួនាទីយ៉ាងសំខាន់ ក្នុងការពង្រឹងវិស័យថែទាំសុខភាព និងគាំទ្រភាពជាដៃគូផ្នែកវេជ្ជសាស្រ្ដរវាងប្រទេសទាំងពីរ។

ការថ្លែងអំណរគុណបែបនេះ លោកវេជ្ជបណ្ឌិត សុខ ជួរ បានធ្វើឡើងនៅក្នុងពិធីបើកសម្ពោធកម្មវិធីពិព័រណ៍សុខាភិបាលម៉ាឡេស៊ី (MHX) ដែលជាពិព័រណ៍សុខាភិបាល ផ្តោតលើអ្នកប្រើប្រាស់លើកដំបូងគេបង្អស់នៅផ្សារទំនើប អ៉ីន ម៉ល សែនសុខ ស៊ីធី រាជធានីភ្នំពេញ ប្រទេសកម្ពុជា។ ប្រទេសកម្ពុជាកំពុងលេចមុខយ៉ាងឆាប់រហ័ស ក្នុងនាមជាទីផ្សារដ៏សំខាន់មួយសម្រាប់វិស័យសុខាភិបាលម៉ាឡេស៊ី ។ ចំនួនអ្នកដំណើរមកទទួលសេវាកម្មថែទាំសុខភាព ពីកម្ពុជាមានលើសពី ១២,០០០ នាក់ក្នុងឆ្នាំ ២០២៥ ខណៈដែលចំណូលពីទេសចរណ៍សុខាភិបាល បានកើនឡើងដល់ ៣០,៣ លានរីងហ្គីត ដែលបង្ហាញឱ្យឃើញពីការជឿជាក់កាន់តែខ្លាំងឡើង ដែលអ្នកជំងឺកម្ពុជាមានចំពោះប្រព័ន្ធអេកូឡូស៊ីថែទាំសុខភាពរបស់ ម៉ាឡេស៊ី ។

លោកវេជ្ជបណ្ឌិត សុខ ជួរ បានបញ្ជាក់ថា ពិព័រណ៍នេះជាព្រឹត្តិការណ៍ដ៏សំខាន់មួយ ដែលបង្ហាញពីកិច្ចខិតខំប្រឹងប្រែងរបស់វិស័យសុខាភិបាលម៉ាឡេស៊ី ក្នុងការពង្រឹងការចូលរួមជាមួយភ្ញៀវទេសចរសុខាភិបាលកម្ពុជា និងពង្រឹងជំហររបស់ម៉ាឡេស៊ី ក្នុងនាមជាគោលដៅថែទាំសុខភាព ដែលទទួលបានការពេញនិយមនៅក្នុងតំបន់។ ក្រោមយុទ្ធនាការឆ្នាំទេសចរណ៍វេជ្ជសាស្ត្រម៉ាឡេស៊ី ២០២៦ (MYMT 2026) ក្រោមប្រធានបទ «ការព្យាបាលជួបជាមួយនឹងបដិសណ្ឋារកិច្ច» (Healing Meets Hospitality) ព្រឹត្តិការណ៍នេះឆ្លុះបញ្ចាំងពី ការប្តេជ្ញាចិត្តរបស់វិស័យសុខាភិបាលម៉ាឡេស៊ី ក្នុងការនាំយកមកនូវសេវាកម្មថែទាំសុខភាពដ៏ល្អឥតខ្ចោះរបស់ ម៉ាឡេស៊ីឱ្យកាន់តែជិតស្និទ្ធជាមួយអ្នកជំងឺអន្តរជាតិ តាមរយៈការចូលរួមដោយផ្ទាល់ កិច្ចសន្ទនាដែលមានអត្ថន័យ និងការបង្កើនលទ្ធភាពទទួលបានការថែទាំសុខភាពប្រកបដោយគុណភាព។

បន្ថែមពីនេះ លោកវេជ្ជបណ្ឌិតក៏បានគូសបញ្ជាក់ពីភាពជាដៃគូផ្នែកថែទាំសុខភាពដែលកំពុងកើនឡើងរវាង ម៉ាឡេស៊ី និងកម្ពុជា។ MHTC ក៏សូមថ្លែងអំណរគុណយ៉ាងជ្រាលជ្រៅចំពោះការគាំទ្រជាបន្តបន្ទាប់ពីស្ថានទូតម៉ាឡេស៊ីប្រចាំកម្ពុជា ដែលបានដើរតួនាទីយ៉ាងសំខាន់ ក្នុងការពង្រឹងវត្តមានរបស់វិស័យថែទាំសុខភាពម៉ាឡេស៊ី ក្នុងទីផ្សារចាប់តាំងពីសកម្មភាពដំបូងៗមក។

ជាមួយគ្នានេះ លោក Suriaghandi Suppiah នាយកប្រតិបត្តិនៃ MHTC បានបន្ដថា ពិព័រណ៍នេះឆ្លុះបញ្ចាំងពីការប្តេជ្ញាចិត្តដ៏ធំធេងរបស់ វិស័យសុខាភិបាលម៉ាឡេស៊ី ចំពោះទីផ្សារកម្ពុជា។ លោកបានបន្ថែមថា៖ ដោយសារកម្មវិធី MHX ភ្នំពេញ នាំយកនូវមន្ទីរពេទ្យ និងអ្នកជំនាញមកជួបផ្ទាល់ជាមួយក្រុមគ្រួសារកម្ពុជា យើងសង្ឃឹមថា សេវាកម្មថែទាំសុខភាពដែលប្រកបដោយគុណភាព និងគួរឱ្យទុកចិត្ត កាន់តែមានភាពងាយស្រួលក្នុងការទទួលបាន និងស្វែងយល់។ នេះហើយជាអ្វីដែល Malaysia Year of Medical Tourism 2026 ចង់សម្រេចបានពោលគឺការទៅជួបអ្នកជំងឺដល់កន្លែងដែលពួកគេរស់នៅ និងការកសាងទំនាក់ទំនងយូរអង្វែងនៅទូទាំងតំបន់៕