(កំពង់ធំ)៖ សាលាបឋមសិក្សាត្រពាំងក្នុង ជាថ្នាលអប់រំនៅទីជនបទ​ដ៏សំខាន់​សម្រាប់​កូនចៅ​ប្រជា​ពលរដ្ឋមកពីភូមិនានាក្នុងឃុំផាន់ញើម ស្រុកប្រាសាទបល្ល័ង្ក ខេត្តកំពង់ធំ។

សាលាបឋមសិក្សាដែលមានបង្រៀនពីកម្រិតមត្តេយ្យសិក្សា ដល់ថ្នាក់ទី៦នេះ បានបង្កើតឡើងក្រោមការផ្តួចផ្តើមរបស់ប្រជាពលរដ្ឋនៅក្នុងភូមិកាលពីឆ្នាំ២០០៦ ដើម្បីផ្តល់ការអប់រំដល់កូនចៅប្រជាពលរដ្ឋនៅក្នុងភូមិ។

សាលានេះបង្កើតឡើងដំបូងជាមួយអគារសិក្សាមួយខ្នងជារោងដោលសង់ឡើងដោយ​កម្លាំងប្រជាជន។ លុះក្រោយមកទើបមានអង្គការជួយអគារសិក្សាមួយខ្នង មាន៣បន្ទប់ធ្វើពីឥដ្ឋ។

លោក ណៃ ស៊ីណាង នាយកសាលាបឋមសិក្សាត្រពាំងក្នុង បានឱ្យដឹងថា បច្ចុប្បន្ន​នេះ សាលាមានសិស្សកំពុងសិក្សាទៅជាង២០០នាក់ ហើយមាន​កំណើន​ជារៀងរាល់ឆ្នាំ។ បញ្ហាប្រឈមរបស់សាលា គឺការខ្វះខាតបន្ទប់សិក្សា ជាពិសេស​រោង​ដោលធ្វើពីឈើប្រក់ស័ង្កសីដែលជាបន្ទប់រៀនចំនួន៤បន្ទប់ ពីថ្នាក់ទី៣ ដល់ថ្នាក់ទី៦នោះ កំពុងមានសភាពទ្រុឌទ្រោមខ្លាំងថែមទៀត។

ជញ្ជាំងខណ្ឌចែកពីបន្ទប់មួយទៅបន្ទប់មួយត្រូវបានធ្លុះធ្លាយ ជញ្ជាំងព័ទ្ធជុំវិញ និងសសរត្រូវពុកផុយ ដំបូលស័ង្កសីត្រូវបានធ្លុះធ្លាយ ពេលមានភ្លៀងត្រូវទឹក​សាច់ និងហូរចូលសាលារំខានដល់ការសិក្សារបស់សិស្ស។

លោក ណៃ ស៊ីណាង បានគោរពស្នើសុំសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ផ្តល់អគារសិក្សាមួយខ្នង៥បន្ទប់ ជាម្លប់កក់ក្តៅដល់​ការ​អប់រំ និងសិក្សារៀនសូត្ររបស់កូនចៅប្រជាពលរដ្ឋមកពីភូមិនានាក្នុង​ឃុំផាន់​ញើមនេះ៕