(បរទេស)៖ ព្រឹត្តិការណ៍បាល់ទាត់ពិភពលោក FIFA World Cup 2026 នឹងចាប់ផ្តើមលេងវគ្គ ៣២ក្រុមនៃថ្ងៃទី២ ចាប់ពីរាត្រីនេះតទៅ ដោយក្រុមខ្លាំងៗដូចជា សាំបាប្រេស៊ីល ឥន្រ្ទីដែកអាល្លឺម៉ង់ និងមច្ចុរាជទឹកក្រូចហូឡង់ ប៉ះគូប្រជែងមកពី ៣តំបន់ផ្សេងគ្នា។

ប្រេស៊ីល អតីតជើងឯក World Cup ៥សម័យកាលច្រើនជាងគេ មកពីតំបន់អាមេរិកឡាទីន ត្រូវប៉ះក្រុមសាម៉ូរៃខៀវ ជប៉ុន លេខ២ ពូល F នៃវគ្គខ្វែងចាប់ផ្តើមនាម៉ោង ១២យប់ថ្ងៃចន្ទ ទី២៩ ខែមិថុនា ឆ្នាំ២០២៦ ដែលជាគូទី៧៤ និងជាគូទី២ នៃវគ្គចាញ់-ធ្លាក់ ៣២ក្រុម បន្ទាប់ពីគូទី១ សហម្ចាស់ផ្ទះកាណាដាបានយកឈ្នះអាហ្រ្វិកខាងត្បូង ១-០ ឡើងវគ្គ ១៦ក្រុមមុនគេ។

ចំណែកឯឥន្រ្ទីដែកអាល្លឺម៉ង់ អតីតជើងឯក World Cup ៤សម័យកាលស្មើនឹងអាសូរីអ៉ីតាលីផងនោះ ត្រូវប៉ះប៉ារ៉ាហ្គាយ នាម៉ោង ៣៖៣០នាទីទៀបភ្លឺ (ម៉ោងនៅកម្ពុជា) ឈានចូលព្រឹកថ្ងៃអង្គារ ទី៣០ ខែមិថុនា ឆ្នាំ២០២៦។ ក្រុមខ្លាំងនៅអឺរ៉ុប អាល្លឺម៉ង់ជាក្រុមលេខ១ ប្រចាំពូល E ត្រូវប្រឈមមុខនឹងប៉ារ៉ាហ្គាយ ក្រុមលេខ៣ ល្អចេញពីពូល D ដែលមកពីតំបន់អាមេរិកខាងត្បូង ដែលជាគូទី៧៥ ក្នុងចំណោម ១០៤ប្រកួតសរុប។

មច្ចុរាជទឹកក្រូចហូឡង់ ប៉ះម៉ារ៉ុក នាម៉ោង ៨ព្រឹកស្អែក ដែលជាគូទី៧៦ និងជាគូទី៤ នៃវគ្គ ៣២ក្រុមចុងក្រោយនៃ World Cup 2026 ដែលមានសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា។

ទាំងហូឡង់ ក្រុមនៅអឺរ៉ុប និងម៉ារ៉ុក មកពីតំបន់អាហ្រ្វិក សុទ្ធតែពុំដែលឈ្នះជើងឯកពិភពលោក World Cup ដូចគ្នា ដ្បិតហូឡង់បានត្រឹមរងជើងឯកកាលឆ្នាំ២០១០ នៅអាហ្វ្រិកខាងត្បូង។ ម៉ារ៉ុក ជាក្រុមលេខ២ នៃពូល C បន្ទាប់ពីប្រេស៊ីល ដោយត្រូវប៉ះហូឡង់ ក្រុមលេខ១ ពូល F ដើម្បីប្រជែងកៅអីឡើងទៅវគ្គ ១៦ក្រុមជាបន្តទៀត៕