(ភ្នំពេញ)៖ លោកឧត្តមសេនីយ៍ទោ ស៊ឹម សំអាត ប្រធាននាយកដ្ឋាននគរបាលការពារព្រំដែនគោក នៃអគ្គស្នងការដ្ឋាននគរបាលជាតិ បានផ្ញើសារលិខិតរំលែកមរណទុក្ខជូនលោកស្រី ឆិល ច្រឹប និងក្រុមគ្រួសារ ចំពោះមរណភាព របស់លោកវរសេនីយ៍ត្រី ម៉ៃ ឡាក់ នាយប៉ុស្តិ៍អូរទឹកខៀវ នៃវរសេនាតូចនគរបាលការពារព្រំដែនគោកលេខ៧៩៥ ចំណុះនាយកដ្ឋាន នគរបាលការពារព្រំដែនគោក ដោយរោគាពាធ (ជំងឺសួត)។

លិខិតរំលែកមរណទុក្ខរបស់លោកឧត្តមសេនីយ៍ទោ ស៊ឹម សំអាត បានបញ្ជាក់ថា «យើងខ្ញុំទាំងអស់គ្នាជាថ្នាក់ដឹកនាំ និងកងកម្លាំងនគរបាលនៃនាយកដ្ឋាននគរបាលការពារ ព្រំដែនគោកទាំងអស់ មានសេចក្ដីក្ដុកក្ដួលយ៉ាងខ្លាំង និងសោកស្តាយជាអនេក ដោយបានទទួលដំណឹង ដ៏ក្រៀមក្រំអំពីមរណភាពរបស់លោកវរសេនីយ៍ត្រី ម៉ៃ ឡាក់ អត្តលេខ ១៦៩៦២ អាយុ ៥៨ឆ្នាំ ឋានៈ នាយប៉ុស្តិ៍អូរទឹកខៀវ នៃវរសេនាតូចនគរបាលការពារព្រំដែនគោក លេខ៧៩៥ ចំណុះនាយកដ្ឋាន នគរបាលការពារព្រំដែនគោក បានទទួលមរណភាពដោយរោគាពាធ (ជំងឺសួត)នៅវេលាម៉ោង២១:៣៥នាទី ថ្ងៃអាទិត្យ ទី២៨ ខែមិថុនា ឆ្នាំ២០២៦»។

មរណភាពរបស់លោកវរសេនីយ៍ត្រី ម៉ៃ ឡាក់ គឺជាការបាត់បង់នូវ កូន ស្វាមី ឪពុក បងប្អូន ជាទី គោរពស្រលាញ់ប្រកបដោយព្រហ្មវិហារធម៌ ក៏ដូចជាការបាត់បង់នូវធនធានមនុស្ស បុគ្គលឆ្នើមដែល មានសមត្ថភាព មានឆន្ទៈ អង់អាចក្លាហាន បានលះបង់កម្លាំងកាយចិត្ត ចូលរួមការពារបូរណភាពទឹកដី និង ចូលរួមថែរក្សាសន្តិសុខ សណ្តាប់ធ្នាប់សាធារណៈ សុវត្ថិភាពជូនប្រជាពលរដ្ឋនៅតំបន់ព្រំដែនកម្ពុជា-ថៃ ជាពិសេសកាលកន្លងទៅថ្មីៗនេះ រូបលោកបានចូលរួមប្រយុទ្ធតតាំងយ៉ាងអង់អាចក្លាហាន ប្រឆាំងទ័ពខ្មាំងសៀម ដែលរំលោភបំពានមកលើដែនអធិបតេយ្យនៃព្រះរាជាណាចក្រកម្ពុជា។

ក្នុងឱកាសដ៏សែនក្រៀមក្រំនេះ យើងខ្ញុំទាំងអស់គ្នា សូមចូលរួមរំលែកនូវមរណទុក្ខដ៏សែន ក្រៀមក្រំ ដោយក្តីសោកស្តាយអាឡោះអាល័យជាទីបំផុត ជាមួយក្រុមគ្រួសារសព និងសូមបួងសួងឧទ្ទិស កុសលផលបុណ្យជូនដល់ដួងវិញ្ញាណក្ខន្ធរបស់លោកវរសេនីយ៍ត្រី ម៉ៃ ឡាក់ សូមឆាប់បានយោនយកកំណើតចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ៕