(កណ្ដាល)៖ លោក ចៅ តុល អនុប្រធានអចិន្ត្រៃយ៍ក្រុមការងារគណបក្សប្រជាជនកម្ពុជាស្រុកកោះធំ ខេត្តកណ្តាល (ទទួលបន្ទុកចុះជួយឃុំព្រែកថ្មី) និងលោក លឹម ឡេង ប្រធានក្រុមការងារគណបក្សឃុំព្រែកថ្មី តំណាងរដ្ឋមន្ត្រី ប៉េង ពោធិ៍នា ប្រធានគណៈអចិន្ត្រៃយ៍ ក្រុមការងារគណបក្សប្រជាជនកម្ពុជាស្រុកកោះធំ កាលពីចុងសប្ដាហ៍នេះ បានអញ្ជើញជាអធិបតីក្នុងពិធីបោះឆ្នោតជ្រើសរើសថ្នាក់ដឹកនាំយុវជនគណបក្សប្រជាជនកម្ពុជា ឃុំព្រែកថ្មី ស្រុកកោះធំ ខេត្តកណ្តាល។

ក្នុងពិធីសំណេះសំណាលនេះ មានការចូលរួមពីក្រុមការងាររាជរដ្ឋាភិបាលចុះមូលដ្ឋានឃុំព្រែកថ្មី ព្រមទាំងប្រធានក្រុមប្រឹក្សាស្រុក សមាជិក-សមាជិកា រួមជាមួយយុវជនចំនួន៣៦០នាក់ ជាសមាជិកសម្រាប់បោះឆ្នោតជ្រើសរើសថ្នាក់ដឹកនាំយុវជនគណបក្សប្រជាជនកម្ពុជា ដែលឈរឈ្មោះជាបេក្ខជនចំនួន១០នាក់ សម្រិតសម្រាំងយកចំនួន៥នាក់មានប្រធាន អនុប្រធាន ដើម្បីដឹកនាំយុវជនឃុំព្រែកថ្មី ស្រុកកោះធំ ខេត្តកណ្តាល ឆ្ពោះទៅយុទ្ធនាការឃោសនាបោះឆ្នោតជ្រើសរើសក្រុមប្រឹក្សា ឃុំ-សង្កាត់ ឆ្នាំ២០២៧។

លោក ចៅ តុល បានផ្ដាំផ្ញើដល់ថ្នាក់ដឹកនាំយុវជនដែលជាប់ឆ្នោត ត្រូវខិតខំដឹកនាំប្រកបដោយយុទ្ធសាស្ត្រល្អ ដើម្បីកៀរគរ និងគាំទ្របោះឆ្នោតបក្សប្រជាជនជាប់ឆ្នោត ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០២៧ខាងមុខនេះ។ លើសនេះ លោក ចៅ តុល បានផ្ដាំផ្ញើដល់អាជ្ញាធរ ត្រូវខិតខំបម្រើពលរដ្ឋឲ្យបានល្អ ដោះស្រាយបញ្ហាជូនពួកគាត់ប្រកបដោយយុត្តិធម៌ លឿនរហ័ស បម្រើពលរដ្ឋឲ្យអស់ពីចិត្ត បញ្ចៀសការថ្នាំងថ្នាក់ណាមួយ៕