(ភ្នំពេញ)៖ នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ នៅរសៀលថ្ងៃទី២៩ ខែមិថុនា ឆ្នាំ២០២៦នេះ បានអញ្ជើញគោរពវិញ្ញាណក្ខន្ធ និងបំពាក់ស័ក្តិជាកិច្ចបច្ឆាមរណៈវរសេនីយ៍ទោ (ស័ក្តិ៤កន្លះ) ជូនវរនគរបាល ម៉ៃ ឡាក់ នាយប៉ុស្តិ៍អូរទឹកខៀវ នៃវរសេនាតូចនគរបាលការពារព្រំដែនគោកលេខ៧៩៥ ចំណុះនាយកដ្ឋាននគរបាលការពារព្រំដែនគោក ដែលលោកទទួលមរណភាពដោយដោយរោគាពាធ (ជំងឺសួត)។

ឆ្លងកាត់ការប្រយុទ្ធគ្នា២លើកជាមួយទាហានសៀម វរនគរបាល ម៉ៃ ឡាក់ ឈរជើងនៅគោលដៅទ្វារដែកមុខប្រាសាទព្រះវិហារ ដោយដឹកនាំច្បាំងដ៏អង់អាចក្លាហានជាមួយសត្រូវដោយមិនខ្លាចរអារនោះឡើយ បើទោះបីត្រូវការវាយប្រហារដោយអាវុធធ្ងន់ និងការប្រើយន្តហោះចម្បាំងក៏ដោយ។

នៅចំពោះមុខភរិយា និងគ្រួសាររបស់វរនគរបាល ម៉ៃ ឡាក់ នាយឧត្តមសេនីយ៍ ខេង សុមេធ ហៅថា ភ្នំ១០០ មានសេចក្ដីក្ដុកក្ដួលយ៉ាងខ្លាំង និងសោកស្តាយជាអនេក ដោយបានទទួលដំណឹង ដ៏ក្រៀមក្រំអំពីមរណភាព របស់លោកវរសេនីយ៍ត្រី ម៉ៃ ឡាក់។ លោកមានអាយុ ៥៨ឆ្នាំ បានទទួលមរណភាពដោយរោគាពាធ (ជំងឺសួត) នៅវេលាម៉ោង ២១៖៣៥នាទីថ្ងៃអាទិត្យ ទី២៨ ខែមិថុនា ឆ្នាំ២០២៦»។

នាយឧត្តមសេនីយ៍បានចាត់ទុកថា «មរណភាពរបស់លោកវរសេនីយ៍ត្រី ម៉ៃ ឡាក់ គឺជាការបាត់បង់នូវ កូន ស្វាមី ឪពុក បងប្អូន ជាទី គោរពស្រលាញ់ប្រកបដោយព្រហ្មវិហារធម៌ ក៏ដូចជាការបាត់បង់នូវធនធានមនុស្ស បុគ្គលឆ្នើមដែល មានសមត្ថភាព មានឆន្ទៈ អង់អាចក្លាហាន បានលះបង់កម្លាំងកាយចិត្ត ចូលរួមការពារបូរណភាពទឹកដី និងចូលរួមថែរក្សាសន្តិសុខ សណ្តាប់ធ្នាប់សាធារណៈសុវត្ថិភាពជូនប្រជាពលរដ្ឋនៅតំបន់ព្រំដែនកម្ពុជា-ថៃ ជាពិសេសកាលកន្លងទៅថ្មីៗនេះ លោកបានចូលរួមប្រយុទ្ធតតាំងយ៉ាងអង់អាចក្លាហាន ប្រឆាំងទ័ពខ្មាំងសៀម ដែលរំលោភបំពានមកលើដែនអធិបតេយ្យនៃព្រះរាជាណាចក្រកម្ពុជា»។

ក្នុងឱកាសដ៏សែនក្រៀមក្រំនេះ នាយឧត្តមសេនីយ៍ និងក្រុមការងារទាំងអស់ សូមចូលរួមរំលែកនូវមរណទុក្ខដ៏សែន ក្រៀមក្រំដោយក្តីសោកស្តាយអាឡោះអាល័យជាទីបំផុត ជាមួយក្រុមគ្រួសារសព និងសូមបួងសួងឧទ្ទិស កុសលផលបុណ្យជូនដល់ដួងវិញ្ញាណក្ខន្ធរបស់លោកវរសេនីយ៍ត្រី ម៉ៃ ឡាក់ សូមឆាប់បានយោនយកកំណើតចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ៕